ភ្នំពេញៈ លោកនាយករដ្ឋមន្ត្រី ហ៊ុន សែន ប្រកាសបើកយុទ្ធនាការចាក់វ៉ាក់សាំងកូវីដ ១៩ សម្រាប់កុមារអាយុពី ៦ ឆ្នាំ ដល់ក្រោម ១២ ឆ្នាំ ចាប់ពីថ្ងៃទី ១៧ ខែកញ្ញាតទៅដើម្បីផ្តល់លទ្ធភាពបើកសាលាថ្នាក់បឋមសិក្សាឡើងវិញ ខណៈគ្រឹះសា្ថនសិក្សាសាធារណៈ និងឯកជនជាច្រើន បានចាប់បើកដំណើរការវិញពីថ្ងៃទី ១៥ ខែកញ្ញា។
លោកនាយករដ្ឋមន្ត្រី ហ៊ុន សែន បានថ្លែងតាមរយៈសារសំឡេងនាថ្ងៃទី ១៥ ខែកញ្ញា ដោយលោកបានលើកឡើងពីការសម្រេចចិត្តចាក់វ៉ាក់សាំងកូវីដ ១៩ ឱ្យកុមារដែលមានអាយុចាប់ពី ៦ ឆ្នាំ ទៅដល់ក្រោម ១២ ឆ្នាំ។
លោកមានប្រសាសន៍ថា៖ «កម្ពុជានឹងបើកយុទ្ធនាការចាក់វ៉ាក់សាំងកូវីដ ១៩ បន្តសម្រាប់កុមារដែលមានអាយុពី ៦ ឆ្នាំ ដល់ក្រោម ១២ ឆ្នាំ ដែលមានចំនួនប្រមាណជាជិត ១,៩ លាននាក់ស្របពេលដែលយុទ្ធនាការចាក់វ៉ាក់សាំងដល់មនុស្សអាយុចាប់ពី ១២ ឆ្នាំ ដល់ក្រោម ១៨ ឆ្នាំ ក៏ឈានជិតបញ្ចប់ផងដែរ»។
លោក ហ៊ុន សែន បានបន្ថែមថា ការបើកយុទ្ធនាការចាក់វ៉ាក់សាំងកូវីដ ១៩ សម្រាប់កុមារនេះនឹងត្រូវធ្វើក្នុងក្របខ័ណ្ឌទូទាំងប្រទេសនៅថ្ងៃសុក្រទី ១៧ ខែកញ្ញា ឯថ្នាក់ជាតិនឹងប្រកាសបើកនៅវិមានសន្តិភាព ហើយលោកក៏នឹងធ្វើសន្និសីទសារព័ត៌មាននាពេលនោះផងដែរ។
លោកបានថ្លែងថា៖ «ជាជំហានបន្ទាប់ទៀត យើងកំពុងគិតធ្វើសម្រាប់ក្មេងនៅកម្រិតថ្នាក់មតេ្តយ្យដែលមានអាយុពី ៣ ឆ្នាំ ទៅ ៦ ឆ្នាំផងដែរ ដែលយើងចាត់ទុកជាជំហានបន្ទាប់មួយទៀត ប៉ុន្តែអ្វីដែលយើងត្រូវដោះស្រាយគឺការចាក់វ៉ាក់សាំងសម្រាប់កុមារអាយុពី ៦ ឆ្នាំ ទៅក្រោម ១២ ឆ្នាំ ដែលវាផ្តល់ឱកាសឱ្យកុមាររបស់យើងអាចចូលសិក្សាថ្នាក់បឋមសិក្សា ដែលនឹងត្រូវបើកជាបន្តបន្ទាប់ទៀតពីបើកថ្នាក់អនុវិទ្យាល័យ វិទ្យាល័យ និងមហាវិទ្យាល័យដែលយើងកំពុងតែធ្វើនៅថ្ងៃនេះ»។
ជាមួយគ្នានេះលោកនាយករដ្ឋមន្ត្រីក៏បានស្នើឱ្យក្រសួងសុខាភិបាល ពិសេសគណៈកម្មការចំពោះកិច្ចចាក់វ៉ាក់សាំងទូទាំងប្រទេសក៏ដូចជាអនុគណៈកម្មការចាក់វ៉ាក់សាំងនៅតាមបណ្តារាជធានី-ខេត្ត ត្រូវប្រុងប្រៀបរៀបចំការបែងចែកវ៉ាក់សាំង និងរៀបចំក្រុមគ្រូពេទ្យដើម្បីអនុវត្តនូវការចាក់វ៉ាក់សាំងសម្រាប់ក្រុមកុមារទាំងនេះផងដែរ។
បើតាមលោក ហ៊ុន សែន វ៉ាក់សាំងកូវីដ១៩ដែលនឹងត្រូវចាក់ជូនក្រុមកុមារទាំងនេះ គឺជាប្រភេទវ៉ាក់សាំងស៊ីណូវ៉ាក់ (Sinovac) ដែលវ៉ាក់សាំងនេះ ក៏បានសិក្សាតាមបណ្ដាប្រទេសនានា និងប្រើប្រាស់សម្រាប់ក្មេងមានអាយុក្រោម ១២ ឆ្នាំរួចមកហើយដែរ។
លោកថា៖ «ចំពោះពេលវេលា មិនមែនជាបញ្ហាធំធេងនោះទេ ដោយសារយើងមានក្រុមគ្រូពេទ្យ និងមានវ៉ាក់សាំងនៅតាមមូលដ្ឋានរួចស្រេចហើយដែរ។ ដូចនេះ សូមឱ្យមានការរៀបចំ ដោយកន្លែងណាដែលបានបិទក៏ត្រូវតែបើកឡើងវិញ សម្រាប់ចាក់វ៉ាក់សាំងឱ្យកុមាររបស់យើងបន្ថែមទៀត ចំណែកក្រុមយុវវ័យបានចាក់បានជាង ១,៧ លាននាក់ហើយ»។
ដោយឡែក នៅព្រឹកថ្ងៃទី ១៥ ខែកញ្ញា គ្រឹះស្ថានសាធារណៈនិងឯកជនជាង ២០០ ទីតាំងក្នុងរាជធានីភ្នំពេញ បានចាប់ផ្តើមដំណើរការចូលរៀនវិញផងដែរ បន្ទាប់ពីបានផ្អាករយៈពេលប្រមាណជា ៧ ខែ។
លោក ឃួង ស្រេង អភិបាលរាជធានីភ្នំពេញ បានឱ្យដឹងក្នុងពេលចុះពិនិត្យការបើកដំណើរការគ្រឹះស្ថានសិក្សាសាធារណៈ និងឯកជនលើកដំបូងថា សាលារាជធានីភ្នំពេញនឹងផ្អាកជាបណ្តោះអាសន្ននូវសាលា ឬថ្នាក់ដែលមានអ្នកឆ្លងវីរុសកូវីដ ១៩ ចាប់ពីក្រោម ១០ ភាគរយនៃចំនួនសិស្សក្នុងថ្នាក់ឬលោកគ្រូអ្នកគ្រូ និងបុគ្គលិកអប់រំ ដើម្បីបង្ការការរាលដាលមេរោគកូវីដ ១៩។
លោកបានបន្តថា រដ្ឋបាលរាជធានីភ្នំពេញមិនបានបង្ខំឱ្យគ្រឹះស្ថានទាំងអស់បើកឡើងវិញព្រមៗគ្នាដូចការបើកបវេសនកាលនោះទេ គឺបើកដំណើរការចំពោះតែសាលាណាដែលអនុវត្តបានល្អតាមគោលការណ៍ប្រតិបត្តិស្តង់ដា (SOP) របស់ក្រសួងអប់រំយុវជន និងកីឡា និងការណែនាំរបស់រដ្ឋបាលរាជធានីភ្នំពេញប៉ុណ្ណោះ។
លោក ឃួង ស្រេង បានបញ្ជាក់ថា៖ «ប្រសិនបើទីតាំងសាលាមានការផ្ទុះនូវការឆ្លងរាលដាលវីរុសកូវីដ ១៩ យើងនឹងមានវិធានការបិទផ្អាកសាលាតែម្តង ហើយបើគ្រាន់តែមានការឆ្លងក្នុងថ្នាក់រៀន យើងនឹងចាត់វិធានការដូចយើងធ្វើនៅតាមខ្នងផ្ទះរបស់ប្រជាពលរដ្ឋទូទៅ ឬដូចនឹងរោងចក្រ សហគ្រាសដែរ»។
ជាមួយគ្នានេះលោក ឃួង ស្រេង ក៏បានលើកឡើងផងដែរថា ក្នុងនាមជាអាណាព្យាបាលដែលមានលោកនាយករដ្ឋមន្ត្រី ហ៊ុន សែន ជាប្រមុខ រួមទាំងរដ្ឋមន្ត្រីក្រសួងអប់រំ យុវជន និង
កីឡា ក្រសួងសុខាភិបាល និងស្ថាប័នពាក់ព័ន្ធគឺពិតជាមានការព្រួយបារម្ភណាស់ក្នុងការបើកដំណើរការសាលារៀនឡើងវិញនេះ។
លោកបានបន្តថា ការអនុញ្ញាតឱ្យបើកសាលាឡើងវិញនេះ ក៏មិនមែនជាការយកអាយុជីវិតពលរដ្ឋមកសាកល្បងដែរ។
ដូចនេះហើយបានជាមានការបង្កើតនូវក្រុមការងារ ដើម្បីត្រួតពិនិត្យតាមសាលានីមួយៗ និងបានណែនាំឱ្យនាយកសាលា និងបុគ្គលិកសិក្សាធ្វើតេស្តរហ័សផងដែរ។
គួរបញ្ជាក់ផងដែរថា មុនពេលចាប់ផ្តើមបើកដំណើរការសាលាឡើងវិញនេះ លោកគ្រូ-អ្នកគ្រូ និងបុគ្គលិកអប់រំតម្រូវឱ្យធ្វើតេស្តរហ័សរកមេរោគកូវីដ ១៩ ដោយក្នុងនោះមានគ្រូ និងបុគ្គលិកអប់រំចំនួន ២៤ នាក់ ឬស្មើនឹង ០,២៣ ភាគរយ ត្រូវបានរកឃើញវិជ្ជមានជំងឺកូវីដ ១៩ ក្នុងចំណោមចំនួន ១០ ៤៤៣ នាក់ ដែលបានធ្វើតេស្ត។
យោងតាមសេចក្តីប្រកាសព័ត៌មានរបស់រដ្ឋបាលរាជធានីភ្នំពេញ កាលពីថ្ងៃទី ១៤ ខែកញ្ញា លោកគ្រូ-អ្នកគ្រូ និងបុគ្គលិកអប់រំដែលបានរកឃើញវិជ្ជមានជំងឺកូវីដ ១៩ គឺមានស្ថានភាពសុខភាពធម្មតា និងមិនមានរោគសញ្ញាធ្ងន់ធ្ងរទេ ដោយសារពួកគាត់បានទទួលវ៉ាក់សាំងចំនួន ២ ដូស និងខ្លះទៀតបានទទួលវ៉ាក់សាំងដូសជំរុញរួចហើយផងដែរ។
ក្នុងពេលចាប់ផ្តើមដំណើរការគ្រឹះស្ថានសិក្សាឡើងវិញលោក-គ្រូអ្នកគ្រូ បុគ្គលិកអប់រំ និងសិស្សានុសិស្សទាំងអស់ក៏តម្រូវឱ្យបង្ហាញបណ្ណចាក់វ៉ាក់សាំងការពារជំងឺកូវីដ ១៩ មុនពេលចូលក្នុងគ្រឹះស្ថានសិក្សារបស់ខ្លួនផងដែរ។
ដោយឡែកលោក គង់ សោភ័ណ្ឌ អភិបាលខេត្តកណ្តាលបានឱ្យដឹងនៅថ្ងៃទី ១៥ ខែកញ្ញាថា នៅពេលនេះ មានសាលារៀនចំនួន ១៤០ រួមមានអនុវិទ្យាល័យ និងវិទ្យាល័យនៅទូទាំងខេត្តនេះ ត្រូវបានបើកឱ្យដំណើរការឡើងវិញ ក្នុងជំហានទី១ បន្ទាប់ពីរដ្ឋបាលខេត្តបានពិនិត្យ និងវាយតម្លៃរួច។
លោកបានបញ្ជាក់ថា៖ «គ្រឹះស្ថានសិក្សាកម្រិតអនុវិទ្យាល័យ និងវិទ្យាល័យទាំងជាង ១០០ នេះ ក្នុងនោះអនុវិទ្យាល័យចំនួន ១០១ សាលា និងវិទ្យាល័យចំនួន ៣៩ សាលាត្រូវបានរដ្ឋបាលខេត្តបានពិនិត្យរួចរាល់ដោយមានលក្ខណសម្បត្តិគ្រប់គ្រាន់ស្របតាមគោលការណ៍ប្រតិបត្តិស្តង់ដា (SOP) របស់ក្រសួងអប់រំ យុវជន និងកីឡា»។
លោក ចេង សំអុល ប្រធានមន្ទីរអប់រំ យុវជន និងកីឡាខេត្តនេះក៏បានឱ្យដឹងដែរថា សម្រាប់កម្រិតអនុវិទ្យាល័យ និងវិទ្យាល័យចាប់ពីថ្នាក់ទី៩ ដល់ថ្នាក់ទី១២ បានត្រៀមលក្ខណសម្បត្តិគ្រប់គ្រាន់ស្របតាមគោលការណ៍ប្រតិបត្តិស្តង់ដា (SOP) ដោយបែងចែកជាបណ្តុំដែល ១ ថ្នាក់ មានសិស្សត្រឹមតែ ១៥ នាក់ប៉ុណ្ណោះ៕