ភ្នំពេញៈ តំណាងអង្គការសហប្រជាជាតិប្រចាំកម្ពុជា បានបង្ហាញចក្ខុវិស័យស្តីពីប្រព័ន្ធស្បៀងប្រកបដោយចីរភាពនៅកម្ពុជា ដោយមើលឃើញថា ប្រជាពលរដ្ឋកម្ពុជានឹងទទួលបានរបបអាហារសុខភាព និងអាហារប្រកបដោយសុវត្ថិភាពនៅឆ្នាំ ២០៣០ ដោយផ្អែកលើគោលនយោបាយ និងយុទ្ធសាស្ត្រនានារបស់រាជរដ្ឋាភិបាល និងដៃគូអភិវឌ្ឍន៍ ដែលបាននិងកំពុងអនុវត្តនៅកម្ពុជា។
យោងផែនទីបង្ហាញផ្លូវស្តីពីប្រព័ន្ធស្បៀងអាហារសម្រាប់ការអភិវឌ្ឍប្រកបដោយចីរភាពនៅកម្ពុជា ឆ្នាំ ២០៣០ ដែលមាន ១០ ទំព័រ ចេញផ្សាយដោយអង្គការសហប្រជាជាតិប្រចាំកម្ពុជា កាលពីថ្ងៃទី ១៥ ខែកញ្ញានេះ បានឱ្យដឹងថា ក្នុងរយៈពេល ២ ទសវត្សរ៍ចុងក្រោយនេះ ប្រទេសកម្ពុជា សម្រេចបាននូវសមិទ្ធកម្មសេដ្ឋកិច្ចដ៏ខ្លាំងក្លា និងវឌ្ឍនភាពគួរឱ្យកត់-សម្គាល់ក្នុងការអភិវឌ្ឍសេដ្ឋកិច្ចប្រកបដោយចីរភាព និងមានវិសាលភាពកាន់តែទូលំទូលាយ ហើយបានកាត់បន្ថយ ភាពក្រីក្រក្នុងអត្រាមួយដ៏ខ្ពស់។
សេចក្តីប្រកាសបន្តថា ទន្ទឹមនឹងការអភិវឌ្ឍនេះក៏ដោយ ប៉ុន្តែវិសមភាពក៏នៅតែបន្តមាននៅឡើយ ហើយប្រជាពលរដ្ឋ ២២ ភាគរយ នៅពុំអាចមានលទ្ធភាពទទួលបានរបបអាហារសុខភាពនៅឡើយទេ។
សេចក្តីប្រកាសបានបន្តថា៖ «អត្រាកង្វះអាហារូបត្ថម្ភនៅមានកម្រិតខ្ពស់ក្នុងចំណោមកុមារអាយុក្រោម ៥ ឆ្នាំ ក្នុងនោះកុមារ ៣២,៤ ភាគរយ មានបញ្ហាក្រិសក្រិន ២៤ ភាគរយមានទម្ងន់មិនគ្រប់ និង ១០ ភាគរយ មានបញ្ហាស្គមស្គាំង»។ «អត្រានៃភាពក្រីក្រ និងបញ្ហាអាហារូបត្ថម្ភ ប្រែប្រួលខុសគ្នាពីខេត្ត ១ ទៅខេត្ត ១ ហើយតួលេខខ្ពស់មាននៅតាមតំបន់ភ្នំតាមបណ្ដោយព្រំដែន កម្ពុជាក៏ជាប្រទេសមួយក្នុងចំណោមប្រទេសនៅអាស៊ីអាគ្នេយ៍ ដែលងាយរងគ្រោះ ដោយសារគ្រោះមហន្តរាយធម្មជាតិ ជាពិសេសដោយសារឥទ្ធិពលនៃការប្រែប្រួលអាកាសធាតុ»។
យ៉ាងណាក៏ដោយ អង្គការសហប្រជាជាតិប្រចាំកម្ពុជា បានគូសបញ្ជាក់ថា ដោយផ្អែកទៅលើគោលនយោបាយ និងយុទ្ធសាស្ត្រនានា ដែលបាននិងកំពុងអនុវត្តនៅកម្ពុជា ផ្តោតលើកត្តាជាច្រើនដែលនាំឱ្យមានការផ្លាស់ប្ដូរប្រព័ន្ធស្បៀង និងផ្ដល់នូវក្របខ័ណ្ឌ ដើម្បីជំរុញឱ្យមានការធ្វើសកម្មភាពតាមវិស័យនានា។ «នៅត្រឹមឆ្នាំ ២០៣០ ប្រជាពលរដ្ឋកម្ពុជានឹងទទួលបានរបបអាហារសុខភាព និងអាហារប្រកបសុវត្ថិភាព ដោយមានការយកចិត្តទុកដាក់ជាចម្បងលើស្ត្រី និងកុមារ ដើម្បីបំបែកវដ្តអន្តរជំនាន់នៃបញ្ហារូបត្ថម្ភ និងឆ្លើយតបទៅនឹងដំណើរការប្រែប្រួលអាហារូបត្ថម្ភ»។
តំណាង UN ប្រចាំកម្ពុជាឱ្យដឹងដែរថា ប្រទេសកម្ពុជា មានប្រជាជនប្រមាណ ១៥,៥ លាននាក់ ដែលភាគច្រើនជាយុវជន ក្នុងនោះ ៥៥,៨ ភាគរយ អាយុក្រោម ៣០ ឆ្នាំ និងមានប្រព័ន្ធស្បៀងចម្រុះ និងមានមុខម្ហូបសម្បូរបែបក្នុងប្រវត្តិសាស្ត្រ។
តំណាង UN ប្រចាំកម្ពុជាបានបន្តទៀតថា ដើម្បីសម្រេចចក្ខុវិស័យឱ្យបានត្រឹមឆ្នាំ ២០៣០ ទាមទារឱ្យមានការធ្វើ សកម្មភាពជាពហុវិស័យតាមរយៈការផ្តល់សន្តិសុខស្បៀង និងអាហារូបត្ថម្ភ ការពង្រីកការទទួលបានសេវាសុខភាព និងសេវាអាហារូបត្ថម្ភ ការបង្កើតឱកាសការងារ ការលើកកម្ពស់ចំណេះដឹងអ្នកប្រើប្រាស់ និងការអប់រំ ការលើកកម្ពស់ទំនើបកម្មវិ-ស័យកសិកម្ម និងខ្សែចង្វាក់តម្លៃស្បៀង ការធ្វើពិពិធកម្មគ្រប់មុខដំណាំប្រកបដោយបរិយាប័ន្ន និងប្រកួតប្រជែង។ ការលើកកម្ពស់ការផលិតអាហារសុខភាព និងអាហារសុវត្ថិភាព ការផ្គត់ផ្គង់ទឹកស្អាត អនាម័យ និងការរៀបចំទម្លាប់រស់នៅប្រកបដោយអនាម័យល្អ តាមរយៈការលើកម្ពស់ការ-យល់ដឹង និងការពង្រឹងគុណភាពប្រព័ន្ធនានា ព្រមទាំងការផ្ដល់ជំនួយសង្គម។
លោក ហ៊ូ ក្រើន តំណាងរងនៃអង្គការ ហេឡែន ខេលល័រ អន្តរជាតិប្រចាំកម្ពុជា (HKI) បានថ្លែងថា ដើម្បីសម្រេចឱ្យបាននូវផែនការដែលគ្រោងទុកលុះត្រាមានការចូលរួមពីគ្រប់ភាគីពាក់ព័ន្ធទាំងដៃគូពាក់ព័ន្ធ ជាពិសេសស្ថាប័នរដ្ឋាភិបាល។
លោកថា៖ «សម្រាប់ការងារនេះយើងបានពិភាក្សាគ្នាយ៉ាងច្រើនទម្រាំបានលទ្ធផលការរំពឹងទុកនៅឆ្នាំ ២០៣០ ប៉ុន្តែលទ្ធផលយ៉ាងណានោះត្រូវមានអ្នកចូលរួមច្រើន ពីអង្គការសង្គមស៊ីវិល ដៃគូឯកជន និងអង្គការសហប្រជាជាតិហើយរដ្ឋាភិបាលគឺជាកម្លាំងស្នូលនៃការអនុវត្តគម្រោង»។
លោកអះអាងថា កត្តាដែលពលរដ្ឋកម្ពុជាមិនទទួលបានអាហារូបត្ថម្ភ ដោយសារកត្តាចំណេះដឹង ការផ្លាស់ប្តូរឥរិយា-បថធនធាន និងកត្តាផលិត-ផលក្នុងស្រុកជាដើម។
តំណាង UN ប្រចាំកម្ពុជាបញ្ជាក់ថា៖ «ទោះបីកម្ពុជា ជាប្រទេសដែលមានប្រព័ន្ធស្បៀងចម្រុះនិងសម្បូរដោយអាហារដែលមានសុវត្ថិភាព និងមានសារជាតិចិញ្ចឹម ប៉ុន្តែគ្រួសារក្រីក្រមួយចំនួនពុំមានលទ្ធភាពរកបានអាហារដែលមានសុវត្ថិភាព និងសម្បូរសារជាតិចិញ្ចឹមបានគ្រប់គ្រាន់ទេ»។
យោងតាមអង្គការសហប្រជាជាតិប្រចាំកម្ពុជាថ្លែងថា យុទ្ធសាស្ត្រ នានាដែលកំពុងអនុវត្តនៅកម្ពុជានាំទៅរកភាពជោគជ័យរួមមាន ផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ គោលដៅអភិវឌ្ឍន៍ប្រកបដោយចីរភាពកម្ពុជា ២០១៦-២០៣០ យុទ្ធសាស្ត្រជាតិស្តីពីសន្តិសុខស្បៀង និងអាហារូបត្ថម្ភលើកទី២ ឆ្នាំ ២០១៩-២០២៣ ក្របខ័ណ្ឌគោលនយោបាយជាតិគាំពារ សង្គម២០១៦-២០២៥ និងយុទ្ធសាស្ត្រតាមវិស័យពាក់ព័ន្ធនានារួមមាន ផែនការយុទ្ធសាស្ត្រអភិវឌ្ឍន៍វិស័យ កសិកម្ម ២០១៩-២០២៣ និងគោលនយោបាយអភិវឌ្ឍន៍ឧស្សាហកម្មកម្ពុជា ២០១៥-២០២៥។ល។
លោក សុខ ស៊ីឡូ អគ្គលេខាធិការនៃអគ្គលេខាធិការដ្ឋានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ប្រាប់ ភ្នំពេញ ប៉ុស្តិ៍ថា នៅថ្ងៃទី ១៥ ខែកញ្ញានេះថា រាជរដ្ឋាភិបាលកម្ពុជា បាននិងកំពុងរៀបចំអនុវត្តផែនការ ទាំងថ្នាក់ជាតិ ថ្នាក់ក្រោមជាតិ និងថ្នាក់សហគមន៍ រួមនឹងនៅតាមគ្រឹះស្ថានសិក្សាជាដើម ដើម្បីអនុវត្តគម្រោងនេះទទួលបានជោគជ័យ។
លោកថា៖ «រាជរដ្ឋាភិបាលបានកំណត់គោលដៅអាទិភាពការបញ្ចប់ភាពអត់ឃ្លាន សម្រេចឱ្យបាននូវសន្តិស្បៀង លើកកម្ពស់អាហារូបត្ថម្ភ ជំរុញការអភិវឌ្ឍវិស័យកសិកម្មប្រកបដោយចីរភាព ការលើកកម្ពស់ភាពអង់អាចរបស់យុវជន ស្រ្តី និងជនងាយរងគ្រោះ ពង្រឹងភាពធន់ របរចិញ្ចឹមជីវិត ពង្រឹងបណ្តាញការងារ...»៕