កោះកុងៈ មន្ត្រីក្រសួងសុខាភិបាលជំរុញ និងណែនាំដល់រដ្ឋបាលថ្នាក់ក្រោមជាតិ ពិសេសថ្នាក់ខេត្ត ត្រូវបញ្ជូនក្រុមគ្រូពេទ្យនាំយកវ៉ាក់សាំងកូវីដ ១៩ ដើម្បីចាក់ជូនប្រជាពលរដ្ឋនៅតាមខ្នងផ្ទះរបស់ពួកគាត់ ដែលនៅឆ្ងាយពិបាកធ្វើដំណើរមកទីតាំងសម្រាប់ទទួលវ៉ាក់សាំង។
ជាមួយគ្នានេះ គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) ក៏នឹងចាប់ផ្តើមចាក់វ៉ាក់សាំងដូសជំរុញជូនប្រជាពលរដ្ឋទូទៅចាប់ពីខែតុលា តទៅផងដែរ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ដែលក៏ជាប្រធាន គ.វ.ក-១៩ បានថ្លែងនាថ្ងៃទី ១៥ កញ្ញា ក្នុងពេលបិទបញ្ចប់យុទ្ធនាការចាក់វ៉ាក់សាំង នៅខេត្តកោះកុងថា គ.វ.ក-១៩ បានធ្វើការណែនាំរួចទៅ-ហើយដោយសុំឱ្យរដ្ឋបាលខេត្តទាំងអស់ត្រូវធ្វើការបត់បែន ដោយត្រូវបញ្ជូនក្រុមគ្រូពេទ្យទៅចាក់វ៉ាក់សាំងដល់ផ្ទះរបស់ប្រជាពលរដ្ឋ ដែលពិបាកក្នុងការធ្វើដំណើរ ឬនៅឆ្ងាយពីទីតាំងចាក់វ៉ាក់សាំង។
លោកស្រីថ្លែងថា៖ «យើងត្រូវចេះបត់បែន យើងមានទីតាំងចល័តសម្រាប់ចាក់វ៉ាក់សាំងហើយ ប៉ុន្តែយើងក៏ត្រូវមើលតាមស្ថាន-ភាពជាក់ស្តែងផងដែរ។ ប្រសិនបើមានគ្រួសារណា ដែលគាត់នៅឆ្ងាយ មិនអាចធ្វើដំណើរមកបាន អ៊ីចឹងយើងត្រូវតែបញ្ជូនក្រុមគ្រូពេទ្យ ដើម្បីចាក់ជូនពួក-គាត់ដល់ផ្ទះតែម្តង»។
លោកស្រីបន្ថែមថា នៅពេលការចាក់វ៉ាក់សាំងរំកិលខ្លួនជិតមកដល់គោលដៅចំនួន ១០ លាននាក់នេះ ប្រជាពលរដ្ឋនៅសល់តិចតួចប៉ុណ្ណោះ។ ជាហេតុ គ.វ.ក-១៩ តែងតែធ្វើការណែនាំទៅដល់រដ្ឋបាលថ្នាក់ក្រោមជាតិធ្វើសម្រង់ចំនួនប្រជាពលរដ្ឋឱ្យបានច្បាស់លាស់។ ពិសេសត្រូវក្តាប់ឱ្យបានពីចំនួនប្រជាពលរដ្ឋក្នុងមូលដ្ឋានរបស់ខ្លួនប៉ុន្មានដែលមិនទាន់បានចាក់។
ទន្ទឹមនឹងនេះ ចំពោះយុទ្ធនាការចាក់វ៉ាក់សាំងកូវីដ ១៩ ដែលបាននិងកំពុងតែធ្វើការបិទបញ្ចប់ជុំទី១ ជាបណ្តើរៗនៅពេលនេះក៏ពិតមែន ក៏ប៉ុន្តែការចាក់វ៉ាក់សាំងនៅតែបន្តសម្រាប់អ្នកដែលមិនទាន់បានចាក់សោះ។ ថ្វីដ្បិតតែល្បឿននៃការចាក់វ៉ាក់សាំងបានលឿន និងជិតបានដល់គោលដៅកំណត់ ប៉ុន្តែក្រសួងនៅតែបន្តជំរុញបន្ថែមទៀត ដើម្បីឱ្យការចាក់នេះបានទៅដល់គោលដៅ។
សម្រាប់ការចាក់ដូសជំរុញ លោកស្រី ឱ វណ្ណឌីន បញ្ជាក់ថា លោកនាយករដ្ឋមន្ត្រី ហ៊ុន សែន បានណែនាំដល់ គ.វ.ក-១៩ រួចរាល់ហើយផងដែរ ក្នុងការផ្តល់ការចាក់វ៉ាក់សាំងដូសជំរុញដល់ក្រុមមនុស្សអាយុពី ១៨ ឆ្នាំឡើងទៅ ដែលក្រុមនេះបានចាក់វ៉ាក់សាំងត្រូវទៅតាមពេលវេលាកំណត់។
លោកស្រីថ្លែងថា៖ «ការចាក់ដូសជំរុញនេះ គ.វ.ក-១៩ នឹងចាត់ចែងរៀបចំ ចាប់ផ្តើមចាក់ចាប់ពីខែតុលា ខាងមុខនេះទៅ។ ការអនុវត្តដូសជំរុញនេះ ក៏មិនខុសប្លែកពីការចាក់វ៉ាក់សាំងជុំទី១ ដែរ គឺយើងអនុវត្តតាមយុទ្ធសាស្ត្រ ផ្ការីកដែលនឹងចាប់ផ្តើមចេញពីរាជធានីភ្នំពេញ ខេត្តកណ្តាល និងខេត្តផ្សេងៗជាបន្តបន្ទាប់»។
គិតត្រឹមថ្ងៃទី ១៥ កញ្ញា រាជធានី-ខេត្តចំនួន ៨ ហើយត្រូវបានប្រកាសបិទបញ្ចប់នូវយុទ្ធនាការចាក់វ៉ាក់សាំងកូវីដ ១៩។ បន្ទាប់មក ខេត្តចំនួន ៧ ទៀត នឹងត្រូវប្រកាសបិទជាបន្ទាប់ទៀត ដែលក្នុងនោះមានខេត្តរតនគិរី ខេត្តស្ទឹងត្រែង ខេត្តព្រះវិហារ ខេត្តកំពង់ចាម ខេត្តតាកែវ ខេត្តសៀមរាប និងខេត្តឧត្តរមានជ័យ។
លោក វ៉ី សំណាង អភិបាលខេត្តកំពង់ស្ពឺ ថ្លែងនៅថ្ងៃទី ១៤ កញ្ញាថា រដ្ឋបាលខេត្តបានសម្រួល ក្នុងការនាំយកវ៉ាក់សាំងកូវីដ ១៩ ទៅចាក់ជូនប្រជាពលរដ្ឋនៅជិតផ្ទះរបស់ពួកគាត់តែម្តង ដោយសារប្រជាពលរដ្ឋមួយចំនួនមានវ័យជរាពិបាកធ្វើដំណើរ ប៉ុន្តែពួកគាត់ចង់ចាក់វ៉ាក់សាំងដែរ។
លោកថា៖ «រាជរដ្ឋាភិបាលតែងតែគិតគូរ និងយកចិត្តទុកដាក់ចំពោះសុខភាពរបស់ប្រជាពលរដ្ឋ ដោយសម្តេច [ហ៊ុន សែន] បានជំរុញឱ្យរដ្ឋបាលខេត្តបង្ខិតសេវាសាធារណៈ ឱ្យជិតផ្ទះប្រជាពលរដ្ឋ ដោយសារប្រជាពលរដ្ឋមួយចំនួនរស់នៅតាមភូមិដាច់ស្រយាលឆ្ងាយពីទីប្រជុំជន»។
យោងតាមរបាយការណ៍របស់ក្រសួងសុខាភិបាលគិតត្រឹមថ្ងៃទី ១៤ ខែកញ្ញា ប្រជាពលរដ្ឋ អាយុពី ១៨ ឆ្នាំឡើង ដែលបានចាក់វ៉ាក់សាំងរួច មានចំនួន ៩៧,៧៤% ធៀបនឹងចំនួនប្រជាជនគោលដៅ ១០ លាននាក់។ ក្រុមអាយុពី ១២ ឆ្នាំ ទៅក្រោមអាយុ ១៨ ឆ្នាំ មានចំនួន ៨៧,២៣% ធៀបនឹងប្រជាជនគោលដៅជិត ២ លាននាក់។ ចំណែកអ្នកដែលបានចាក់ដូសជំរុញ រួមមានចំនួនជាង ៧៩ ម៉ឺននាក់ផងដែរ៕
វីដេអូ៖