ភ្នំពេញៈ រដ្ឋបាលរាជធានីភ្នំពេញ និងបណ្តាខេត្តមួយចំនួនទៀតបានប្រកាសពីទីតាំង និងកាលបរិច្ឆេទនៃការចាប់ផ្តើមចាក់វ៉ាក់សាំងកូវីដ ១៩ ដល់កុមារដែលមានអាយុចាប់ពី ៦ ឆ្នាំដល់ក្រោម ១២ ឆ្នាំ បន្ទាប់ពីលោកនាយករដ្ឋមន្ត្រី ហ៊ុន សែន បានសម្រេចឱ្យចាក់វ៉ាក់សាំងដល់ក្រុមកុមារក្នុងវ័យទាំងនេះ។
លោក ឃួង ស្រេង អភិបាលរាជធានីភ្នំពេញបានជូនដំណឹងនៅថ្ងៃទី ១៦ ខែកញ្ញានេះថា រដ្ឋបាលរាជធានីភ្នំពេញនឹងដំណើរការចាក់វ៉ាក់សាំងបង្ការជំងឺកូវីដ ១៩ ជូនកុមារដែលមានអាយុចាប់ពី ៦ ឆ្នាំ ដល់ក្រោម ១២ ឆ្នាំ ក្នុងភូមិសាស្ត្ររាជធានីភ្នំពេញសម្រាប់ដូសទី១ ចាប់ផ្តើមពីថ្ងៃទី ១៧ ខែកញ្ញា ដល់ថ្ងៃទី ៣ ខែ តុលា ឆ្នាំ ២០២១។
លោកបានបន្ថែមថា សម្រាប់ដូសទី២ នឹងចាប់ផ្តើមពីថ្ងៃទី ៨ ដល់ថ្ងៃទី ២៤ ខែ តុលា ឆ្នាំ ២០២១ នៅរៀងរាល់ ម៉ោង ៨:០០ នាទីព្រឹក ដល់ម៉ោង ១៧:០០ នាទីរសៀល តាមរយៈការអញ្ជើញ និងទំនាក់ទំនងជាមួយអាជ្ញាធរមូលដ្ឋាន ដែលមានចំនួន ៤២ ទីតាំង។
ចំណែក អភិបាលខេត្តប៉ៃលិន លោកស្រី បាន ស្រីមុំ ក៏បានប្រកាសពីការបើកយុទ្ធនាការចាក់វ៉ាក់សាំងសម្រាប់កុមារអាយុពី ៦ ឆ្នាំ ដល់ក្រោម ១២ ឆ្នាំផងដែរ ក្នុងភូមិសាស្ត្រខេត្តប៉ៃលិន ដែលនឹងចាប់ផ្តើមនៅថ្ងៃទី ១៧ ខែកញ្ញា តទៅនៅក្នុងមន្ទីរពេទ្យបង្អែកចំនួន។
ដូចគ្នានេះដែរ ខេត្តបន្ទាយមានជ័យ ក៏បានប្រកាសចាប់ផ្តើមយុទ្ធនាការនេះផងដែរ ដោយរដ្ឋបាលខេត្តនឹងចាប់ផ្តើមដំណើរការចាក់វ៉ាក់សាំងនេះចាប់ពីថ្ងៃទី ១៨ ខែកញ្ញា នៅតាមក្រុង-ស្រុកចំនួន ៩។
គួរបញ្ជាក់ផងដែរថា លោកនាយករដ្ឋមន្ត្រី ហ៊ុន សែន កាលពីថ្ងៃទី ១៥ ខែកញ្ញា បានបញ្ជាក់ក្នុងសារជាសំឡេងថា កម្ពុជានឹងប្រកាសបើកយុទ្ធនាការចាក់វ៉ាក់សាំងកូវីដ ១៩ សម្រាប់កុមារអាយុពី៦ឆ្នាំដល់ក្រោម ១២ ឆ្នាំ ចាប់ពីថ្ងៃទី ១៧ ខែ កញ្ញា ឆ្នាំ ២០២១ តទៅ ដែលមានចំនួនប្រមាណជាជាង ១,៨ លាននាក់៕