ភ្នំពេញៈ ចាប់ពីថ្ងៃទី ១ ខែកក្កដា ដល់ ថ្ងៃទី ១៤ ខែកញ្ញា មន្ដ្រីជំនាញនៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (កបប)បានចុះពិនិត្យអាជីវកម្មប្រេងឥន្ធនៈតាមបណ្ដាស្ថានីយ និងដេប៉ូទូទាំងប្រទេសចំនួន ៦៨៣ ទីតាំង ក្នុងនោះរកឃើញ ៣០១ ទីតាំង ប្រកបអាជីកម្មមិនសុចរិត ដែលមិនអនុលោមនឹងច្បាប់។ នេះបើតាមអគ្គនាយកដ្ឋានក.ប.ប.។
លោក ផាន អូន អគ្គនាយក ក.ប.ប.ប្រាប់ ភ្នំពេញ ប៉ុស្ដិ៍ នៅថ្ងៃទី ១៥ ខែកញ្ញាថា ចាប់ពីថ្ងៃទី ១ ខែកក្កដា ដល់ថ្ងៃទី ១៤ ខែ កញ្ញា ឆ្នាំ ២០២១ មន្ត្រីអគ្គនាយកដ្ឋាន ក.ប.ប. បានចុះប្រតិបត្តិការត្រួតពិនិត្យភាពអនុលោមក្នុងការប្រកបអាជីវកម្មប្រេងឥន្ធនៈនៅតាមបណ្តាស្ថានីយ និងដេប៉ូនៅទូទាំងប្រទេសបានចំនួន ៦៨៣ ស្ថានីយ និងដេប៉ូ។ ក្នុងនោះរកឃើញដេប៉ូចំនួន ៣០១ ទីតាំង បានប្រកបអាជីវកម្មមិនសុចរិត ដែលមិនអនុលោមទៅនឹងច្បាប់ស្តីពីកិច្ចការពារអ្នកប្រើប្រាស់។
ក្នុងនោះរយៈពេលតែ ១ ថ្ងៃ នៅថ្ងៃទី ១៤ កញ្ញា មន្ត្រីក.ប.ប.បានរកឃើញស្ថានីយ និងដេប៉ូប្រេងឥន្ធនៈចំនួន ១៦ ទីតាំង ដែលមិនបានអនុលោមទៅតាមច្បាប់ស្ដីពីកិច្ចការពារអ្នកប្រើប្រាស់។ ចំនួននេះ ស្ថិតក្នុងចំណោមស្ថានីយ និងដេប៉ូប្រេងឥន្ធនៈចំនួន ៣៧ ទីតាំង ដែលមន្ត្រីជំនាញបានចុះត្រួតពិនិត្យក្នុងខេត្តព្រៃវែង ខេត្តកំពង់ធំ ខេត្តសៀមរាប ខេត្តស្វាយរៀង និងរាជធានីភ្នំពេញ។
លោក ផាន អូន ឱ្យដឹងថា បើយោងលើច្បាប់ស្តីពីកិច្ចការពារអ្នកប្រើប្រាស់ជំពូកទី១០ មាត្រា ៤១ កថាខណ្ឌទី២ បានចែងថា «ក្នុងករណីទទួលរងនូវការព្រមានជាលាយលក្ខណ៍អក្សរម្តងរួចហើយ នៅតែបន្តប្រព្រឹត្តល្មើស តាមកថាខណ្ឌទី១ ខាងលើនេះត្រូវព្យួរដកហូត ឬលុបចោលវិញ្ញាបនបត្រចុះបញ្ជីពាណិជ្ជកម្ម ឬអាជ្ញាប័ណ្ណ»។
លោកបន្តថា៖ «ក្នុងករណីជនល្មើសមិនព្រមបង់ប្រាក់ពិន័យអន្តរការណ៍ មន្ត្រីស៊ើបអង្កេតត្រូវកសាងសំណុំរឿង នៃបទល្មើសបញ្ជូនទៅតុលាការមានសមត្ថកិច្ច»។
លោកបញ្ជាក់ថា បន្ទាប់ពីបានរកឃើញភាពមិនអនុលោមទៅតាមច្បាប់ស្តីពីកិច្ចការពារអ្នកប្រើប្រាស់ មន្ត្រីជំនាញបានធ្វើការពិន័យអន្តរការណ៍ទៅលើម្ចាស់ដេប៉ូ ដែលប្រព្រឹត្តល្មើសនឹងច្បាប់។
គិតត្រឹមថ្ងៃទី ១៥ ខែ កញ្ញា ឆ្នាំ ២០២១ នេះ ពុំទាន់មានម្ចាស់ស្ថានីយ ឬដេប៉ូណាមួយត្រូវបានមន្ត្រីស៊ើបអង្កេតអគ្គនាយកដ្ឋាន ក.ប.ប. កសាងសំណុំរឿងបញ្ជូនទៅតុលាការនៅឡើយទេ។ នេះជាការបញ្ជាក់ របស់លោកផាន អូន។
លោកឱ្យដឹងថា អគ្គនាយកដ្ឋាន- ក.ប.ប. នឹងបន្តចុះត្រួតពិនិត្យតាមបណ្តាស្ថានីយ និងដេប៉ូចែកចាយប្រេងឥន្ធនៈនៅទូទាំងប្រទេស និងអនុវត្តវិធានការច្បាប់យ៉ាងម៉ឺងម៉ាត់បំផុត ដើម្បីទប់ស្កាត់ឱ្យបានដាច់ខាតការប្រកបអាជីវកម្មមិនសុចរិតពាក់ព័ន្ធនឹងប្រេងឥន្ធនៈ ដើម្បីការពារផលប្រយោជន៍ប្រជាពលរដ្ឋដែលជាអ្នកប្រើប្រាស់។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា សង្កេតឃើញភាពមិនប្រក្រតីក្នុងអាជីវកម្មប្រេងឥន្ធនៈ បានកើតឡើងយូរឆ្នាំមកហើយ។ បញ្ហានេះទាមទារឱ្យអគ្គនាយកដ្ឋាន ក.ប.ប. ស្នើទៅរាជរដ្ឋាភិបាលចាត់វិធានការតាមច្បាប់ឱ្យបានតឹងរ៉ឹង ព្រោះការកេងបន្លំបរិមាណ ឬគុណភាពប្រេងនេះ ប៉ះពាល់ដល់ជីវភាពប្រចាំថ្ងៃរបស់ប្រជាពលរដ្ឋ។
លោកថ្លែងថា៖«បញ្ហាដែលកំពុងកើតមាននេះ គឺមានផលប៉ះពាល់ខ្លាំងមែនទែនទៅដល់ជីវភាពរស់នៅរបស់ប្រជាពលរដ្ឋ។ ព្រោះពលរដ្ឋជាអ្នកប្រើប្រាស់សេវាប្រេងឥន្ធនៈដូច្នេះរដ្ឋាភិបាល ត្រូវតែដោះស្រាយជាបន្ទាន់»។
លោក ប៉ិច ពិសី លើកឡើងថា ផលិតផលប្រេងឥន្ធនៈ ជាផលិតផលមួយ ដែលជួយសម្រួលដល់ការផលិតផ្សេងៗ តាមរយៈការប្រើប្រាស់ម៉ាស៊ីន យានយន្ត ជាដើម។ ដូច្នេះបើសិនជាការលក់ដូរប្រេងឥន្ធនៈមានបញ្ហា ដោយមិនប្រក្រតីនេះ ចរន្តផលិតកម្ម នៃផលិតផលផ្សេងៗក៏មានការប៉ះពាល់ ឬឡើងថ្លៃដែរ។
លោកលើកជាឧទាហរណ៍ បើពលរដ្ឋធ្លាប់ប្រើប្រាស់ប្រេង-ឥន្ធនៈ ១០ លីត្រ សម្រាប់បូមទឹកដាក់ស្រែទំហំ ១ ហិកតា ប៉ុន្ដែបើពលរដ្ឋទិញប្រេងឥន្ធនៈដែលមានការកេងបន្លំនៅសល់ត្រឹម ៩ លីត្រ នោះប្រជាពលរដ្ឋត្រូវចំណាយថវិកា ទិញប្រេងបន្ថែម ដើម្បីបូមទឹកដាក់ស្រែឱ្យបានគ្រប់។
លោកបន្តថា ដូច្នេះការកេងបន្លំនេះ ធ្វើឱ្យប៉ះពាល់ទាំងជីវភាពប្រជាពលរដ្ឋ និងការផលិតផ្សេងៗ ហើយនាំឱ្យទំនិញឡើងថ្លៃ។ ពេលទំនិញឡើងថ្លៃ ក៏បានប៉ះពាល់ដល់ជីវភាពរស់នៅរបស់ប្រជាពលរដ្ឋ ដទៃទៀតដែលប្រើប្រាស់ផលិតផលនៅក្នុងទីផ្សារផងដែរ៕
វីដេអូ៖