.jpg)
ក្រុមគ្រូពេទ្យយកសំណាកប្រជាពលរដ្ឋរស់នៅផ្សារធំថ្មី ដើម្បីរកមេរោគកូវីដ ១៩ កាលពីថ្ងៃទី ១៤ កញ្ញា។ ហុង មិនា
ភ្នំពេញៈ មនុស្សចំនួន ១១ នាក់បន្ថែមទៀត បានស្លាប់ដោយសារជំងឺកូវីដ ១៩ និងបានរកឃើញអ្នកឆ្លងថ្មីជិត ៧០០ នាក់ រីឯអ្នកដែលបានព្យាបាលជាសះស្បើយជាង ៤០០ នាក់។ នេះបើយោងតាមសេចក្តីប្រកាសរបស់ក្រសួងសុខាភិបាលនៅថ្ងៃទី ១៦ ខែកញ្ញានេះ។
ក្រសួងបានឱ្យដឹងថា មនុស្សចំនួន ៦៩៣ នាក់បន្ថែមទៀត ត្រូវបានរកឃើញមានវិជ្ជមានវីរុសកូវីដ ១៩ និងមានអ្នកជាសះស្បើយចំនួន ៤៤៣ នាក់។ អ្នកដែលរកឃើញវិជ្ជមានទាំងនោះមានករណីឆ្លងក្នុងសហគមន៍ចំនួន ៥៨១ នាក់ និងអ្នកដំណើរពីបរទេស ចំនួន ១១២ នាក់។
គិតត្រឹមព្រឹកថ្ងៃទី ១៦ ខែកញ្ញា ឆ្នាំ ២០២១ កម្ពុជាមានអ្នកឆ្លងវីរុសកូវីដ ១៩ សរុបចំនួន ១០២ ១៣៦ នាក់ អ្នកជាសះស្បើយសរុបចំនួន ៩៥ ៨១០ នាក់ និងអ្នកស្លាប់បានកើនឡើងចំនួន ២ ០៧៨ នាក់៕
