.jpg)
ក្រសួងសុខាភិបាលហាម និងចាត់វិធានការច្បាប់លើគណនីហ្វេសប៊ុក ៣ ផ្សាយផលិតផលគ្មានច្បាប់។ រូបថត ក្រសួងសុខាភិបាល
ភ្នំពេញៈ ក្រសួងសុខាភិបាល នៅថ្ងៃទី ១៤ ខែកញ្ញានេះ បានប្រកាសហាមឃាត់ និងចាត់វិធានការផ្លូវច្បាប់ចំពោះ គណនីហ្វេសប៊ុក ចំនួន ៣ បន្ថែមទៀត ដែលកំពុងផ្សព្វផ្សាយលក់ ឱសថបុរាណ ផលិតផលគ្រឿងសម្អាង និងផលិតផលបំប៉នសុខភាព គ្មានលេខបញ្ជិកា និងគ្មានច្បាប់អនុញ្ញាតពីក្រសួង ដែលអាចប៉ះពាល់ដល់សុខភាពអ្នកប្រើប្រាស់។ យោងតាមសេចក្ដីប្រកាសព័ត៌មានរបស់ក្រសួងសុខាភិបាល។
គណនីហ្វេសប៊ុក រួមមាន ទី១ N&MLocalBrands ស្រីតូច ទី២ ឱសថបុរាណសញ្ញាប្រាសាទព្រះវិហារ និងទី៣ DR.A សុខភាពធម្មជាតិដែលបានប្រកាសផ្សព្វផ្សាយលក់ផលិតផល និងឱសថ គ្មានលេខបញ្ជិកា និងគ្មានច្បាប់អនុញ្ញាតឱ្យផ្សព្វផ្សាយពីក្រសួងសុខាភិបាលឡើយ។
បើអនុលោមតាមច្បាប់ស្តីពីការគ្រប់គ្រងឱសថនិងច្បាប់ស្តីពីវិសោធនកម្មច្បាប់ស្តីពីការគ្រប់គ្រងឱសថ តម្រូវឱ្យរាល់ការចរាចរឱសថ ឬគ្រឿងសម្អាងគ្រប់ប្រភេទក្នុងព្រះរាជាណាចក្រកម្ពុជាត្រូវមានលេខបញ្ជិកា ឬលេខប្រវេទន៍ពីក្រសួងសុខាភិបាលហើយការផ្សព្វផ្សាយផលិតផលនេះ ត្រូវមានការអនុញ្ញាតពីក្រសួងសុខាភិបាលផងដែរ។
ក្រសួងបញ្ជាក់ថា៖ «ដើម្បីចៀសវាងការខាតបង់ប្រាក់កាស និងប៉ះពាល់ដល់សុខភាពអ្នកប្រើប្រាស់ទៀតនោះ ក្រសួងសុខាភិបាលសូមជូនព័ត៌មានដល់បងប្អូនប្រជាពលរដ្ឋទាំងអស់ត្រូវបញ្ឈប់ការប្រើប្រាស់គ្រឿងសម្អាងគ្មានលេខប្រវេទន៍ពីក្រសួងសុខាភិបាលខាងលើជាបន្តទៀត ព្រោះផលិតផលនេះគ្មានប្រភពច្បាស់លាស់ ដែលមិនអាចធានាបាននូវគុណភាព និងសុវត្ថិ
ភាពបានឡើយ»។
ក្រសួងបញ្ជាក់ថា៖ «ក្រសួងសុខាភិបាលនឹងមានវិធានការតឹងរ៉ឹងទៅតាមផ្លូវច្បាប់ចំពោះម្ចាស់គណនីហ្វេសប៊ុក ដែលផ្សព្វផ្សាយលក់ ឱសថ និងគ្រឿងសម្អាងទៅតាមច្បាប់វិសោធនកម្មច្បាប់ស្តីពីការគ្រប់គ្រងឱសថជាធរមាន»។
បើតាមសេចក្ដីប្រកាសព័ត៌មាន ក្រសួងសុខាភិបាលបានពិនិត្យឃើញហ្វេសប៊ុកឈ្មោះ N&M Local Brands ស្រីតូចកំពុងផ្សព្វផ្សាយលក់គ្រឿងសម្អាងប្រភេទ ANTI ACNE CREAM។ ហ្វេសប៊ុកឈ្មោះឱសថបុរាណសញ្ញាប្រាសាទព្រះវិហារកំពុងផ្សព្វផ្សាយលក់ឱសថបុរាណសញ្ញាប្រាសាទព្រះវិហារថ្នាំស្មៅប្រមាត់មនុស្ស និងហ្វេសប៊ុកឈ្មោះ DR.A សុខភាពធម្មជាតិកំពុងផ្សព្វផ្សាយលក់ផលិតផលបំប៉នសុខភាព MORINGAX PLUS ដែលគ្មានលេខបញ្ញិកា និងគ្មានច្បាប់អនុញ្ញាតឱ្យផ្សព្វផ្សាយពីក្រសួងសុខាភិបាលឡើយ។
ក្រសួងប្រាប់ថា ក្នុងករណីប្រជាពលរដ្ឋ ត្រូវការព័ត៌មានបន្ថែម សូមទំនាក់ទំនងតាមរយៈទូរស័ព្ទលេខ ០១២ ៣៥៥ ១៦១-០១១ ៥៧៤ ៧៨៧ ០១២ ៩៨៣ ៣៣៤ ០១២ ៨៩២ ០២២៕
