.jpg)
គេហដ្ឋានមួយនៅខេត្តព្រះវិហារ ត្រូវបានលម្អដោយឈើប្រណិតច្រើនផ្នែក។ ហេង ជីវ័ន
ភ្នំពេញៈ ភ្នាក់ងារជំនួយអាមេរិក USAID និងក្រសួងបរិស្ថាន រួមគ្នាធ្វើយុទ្ធនាការទំនាក់ទំនងផ្លាស់ប្តូរឥរិយាបថសង្គមស្តីពី ការកាត់បន្ថយតម្រូវការប្រើប្រាស់គ្រឿងសង្ហារឹមធ្វើពីឈើប្រណិត ខណៈតម្រូវការឈើប្រណិតមានការកើនឡើង ទាំងទីផ្សារក្នុងស្រុក និងអន្តរជាតិ ដែលនាំឱ្យការកាប់បំផ្លាញព្រៃឈើ និងការបាត់បង់ប្រភេទដើមឈើមានតម្លៃក្នុងព្រៃត្រូពិចរបស់កម្ពុជា។ នេះបើតាមសេចក្ដីប្រកាសព័ត៌មាន។
ការប្រកាសបើកជាផ្លូវការនូវយុទ្ធនាការនេះធ្វើឡើង ដោយលោក រីឆាត ឈិន ប្រធានការិយាល័យកំណើនសេដ្ឋកិច្ចប្រកបដោយចីរភាពនៃទីភ្នាក់ងារជំនួយអាមេរិក USAID និង លោកស្រី មាស ច័ន្ទធីតា អគ្គនាយិការងអគ្គនាយកដ្ឋានចំណេះដឹង និងព័ត៌មានបរិស្ថាន នៃក្រសួងបរិស្ថាន នៅថ្ងៃទី ១៥ ខែកញ្ញា តាមប្រព័ន្ធវីដេអូហ្សូម។ យុទ្ធនាការនេះ ឧបត្ថម្ភដោយទីភ្នាក់ងារជំនួយអាមេរិក USAID។
តាមសេចក្ដីប្រកាសព័ត៌មាន យុទ្ធនាការនេះ ជាយុទ្ធនាការមួយក្នុងចំណោមយុទ្ធនាការចំនួន ៣ ដែលផ្តល់ខ្លឹមសារ និងសារគន្លឹះតាមរយៈប្រព័ន្ធពហុផ្សព្វផ្សាយដើម្បីគាំទ្រយុវជនដែលជា «ជើងឯកបៃតង» ក្នុងការធ្វើជាគំរូផ្លាស់ប្តូរឥរិយាបថ និងការអនុវត្តឱ្យបានជោគជ័យជុំវិញកិច្ចការពារធនធានធម្មជាតិរបស់កម្ពុជា។
លោក រីឆាត ឈិន បានកត់សម្គាល់ឃើញតម្រូវការឈើប្រណិត មានការកើនឡើងគួរឱ្យកត់សម្គាល់ ទាំងទីផ្សារក្នុងស្រុកនិងអន្តរជាតិ។ នេះជាការរួមចំណែកដល់ការកាប់បំផ្លាញព្រៃឈើ និងការបាត់បង់ប្រភេទដើមឈើមានតម្លៃ ដូចជាឈើគ្រញូង ធ្នង់ នៅក្នុងព្រៃត្រូពិចរបស់កម្ពុជា។
លោកថ្លែងថា៖ «យើងសង្ឃឹមថា យុទ្ធនាការនេះ នឹងផ្តល់ព័ត៌មាន មានប្រយោជន៍ និងផ្តល់ជម្រើសដល់ប្រជាពលរដ្ឋកម្ពុជា ជាពិសេសយុវជនធ្វើការពិចារណា ដើម្បីពួកគេអាចចូលរួមការពារបរិស្ថានរបស់ពួកគេឱ្យកាន់តែប្រសើរឡើង»។
លោកបន្តថា៖ «ការធ្វើសកម្មភាពត្រឹមត្រូវនៅថ្ងៃនេះ អាចនាំឱ្យមានផលវិជ្ជមាន នាពេលអនាគតដល់ព្រៃឈើ និងសត្វព្រៃនៅកម្ពុជានាពេលអនាគត។ សូមរក្សាដើមឈើឱ្យនៅកន្លែងដែលពួកវាកំពុងស្ថិតនៅ»។
លោកស្រី មាស ច័ន្ទធីតា ថ្លែងថា ប្រជាជនកម្ពុជាទាំងចាស់ ទាំងក្មេង មានកាតព្វកិច្ចចូលរួមក្នុងការអភិរក្ស និងការពារធនធានធម្មជាតិដ៏មានតម្លៃរបស់ខ្លួន។
លោកស្រីថ្លែងថា៖ «គោលបំណងនៃយុទ្ធនាការនេះ គឺគាំទ្រដល់យុទ្ធសាស្រ្តគាំពារបរិស្ថានជាតិ និងផែនការសកម្មភាព របស់រាជរដ្ឋាភិបាលកម្ពុជា ដែលមានគោលដៅពង្រឹងប្រសិទ្ធភាពគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវចម្រុះ និងការអភិវឌ្ឍប្រកបដោយចីរភាព»។
លោក អ៊ុក ស៊ីសុវណ្ណ ប្រធានគម្រោងអនាគតបៃតងកម្ពុជា នៃអង្គការ USAID ថ្លែងថា គម្រោងអនាគតបៃតងរបស់ USAID គឺជាគម្រោងមួយមានរយៈពេល៥ឆ្នាំ មានគោលបំណងផ្ដល់ដល់ប្រជាពលរដ្ឋ និងសង្គមស៊ីវិលកម្ពុជានូវចំណេះដឹង ព័ត៌មាន និងជំនាញ។ ការប្រើប្រាស់ទំនាក់ទំនងផ្អែកលើភ័ស្តុតាង ដើម្បីជះឥទ្ធិពលដល់ការផ្លាស់ប្ដូរឥរិយាបថ និងសកម្មភាពជាវិជ្ជមានរបស់ពួកគាត់ គាំទ្រដល់ការអភិរក្សជីវចម្រុះ កិច្ចការងារព្រៃឈើ និងការគ្រប់គ្រងធនធានធម្មជាតិប្រកបដោយនិរន្តរភាព។
លោកថ្លែងថា៖ «គម្រោងនេះកំពុងគាំទ្រនិងបណ្ដុះបណ្ដាលយុវជនឱ្យក្លាយជាភ្នាក់ងារផ្លាស់ប្ដូរ និងជាគំរូសម្រាប់យុទ្ធនាការទំនាក់ទំនងផ្លាស់ប្តូរឥរិយាបថសង្គម និងជួយលើកកម្ពស់ភាពជាអ្នកគ្រប់គ្រងបរិស្ថាននៅកម្ពុជានាពេលអនាគត»។
លោកឱ្យដឹងថា ការអនុវត្ដយុទ្ធនាការទំនាក់ទំនងផ្លាស់ប្តូរឥរិយាបថសង្គម ធ្វើឡើងលើប្រធានបទចំនួន៣ គឺទី១ ផ្ដោតលើការកាត់បន្ថយតម្រូវការប្រើប្រាស់គ្រឿងសង្ហារឹមធ្វើពីឈើប្រណិតដែលនឹងជំរុញលើកទឹកចិត្ដយុវជន ឪពុកម្ដាយ និងសាច់ញាតិរបស់ពួកគេឱ្យចូលរួមកាត់បន្ថយការទិញគ្រឿងសង្ហារឹមធ្វើពីឈើប្រណិត។ ទី២ ការកាត់បន្ថយការបរិភោគសាច់សត្វព្រៃ និងប្រើប្រាស់ផលិតផលធ្វើពីសត្វព្រៃ និងទី៣ ការលើកទឹកចិត្ដប្រជាជនឱ្យឈប់បោះចោលសំរាមផ្ដេសផ្ដាស។
លោក ស៊ីសុវណ្ណ បានឱ្យដឹងថា យុទ្ធនាការនីមួយៗនឹងលើកកម្ពស់ការផ្សព្វផ្សាយសារសំខាន់ៗ និងព័ត៌មានផ្អែកលើភ័ស្តុតាងជាចម្បង តាមរយៈប្រព័ន្ធបណ្ដាញទំនាក់ទំនងសង្គម ដោយមានការចូលរួមពីយុវជនក្នុងនាមជាជើងឯកបៃតង ដើម្បីធ្វើជាគំរូនៃការផ្លាស់ប្ដូរឥរិយាបថ និងការអនុវត្ដសកម្មភាពជាវិជ្ជមានក្នុងសង្គមប្រកបដោយជោគជ័យ។
សម្រាប់យុទ្ធនាការលើប្រធានបទទី១ ស្ដីពីការកាត់បន្ថយតម្រូវការប្រើប្រាស់គ្រឿងសង្ហារឹមធ្វើពីឈើប្រណិត ធ្វើឡើងក្នុងគោលបំណង ដើម្បីជូនដំណឹងដល់ដៃគូសំខាន់ៗដូចជា ក្រសួង ស្ថាប័នរដ្ឋាភិបាល ទីភ្នាក់ងារ ម្ចាស់ជំនួយ អង្គការ សមាគម មកពីវិស័យឯកជន និងអ្នកពាក់ព័ន្ធទាំងអស់អំពីសកម្មភាព សំខាន់ៗពាក់ព័ន្ធនឹងយុទ្ធនាការនេះ។
យុទ្ធនាការលើប្រធានបទនេះ ក៏ធ្វើឡើង ដើម្បីលើកទឹកចិត្ដឱ្យមានការចូលរួមគាំទ្រពីប្រជាជនទាំងអស់។ ជាពិសេសពីយុវជន និងអ្នកពាក់ព័ន្ធ ក្នុងការផ្សព្វផ្សាយសារសំខាន់ៗ អំពីយុទ្ធនាការនេះឱ្យបានទូលំទូលាយ និងដើម្បីពង្រឹងកិច្ចសហការ និងភាពជាដៃគូ ដើម្បីពង្រឹង និងពង្រីកលទ្ធផលពីយុទ្ធនាការលើប្រធានបទទី១ នេះ៕
