ភ្នំពេញៈ ចាប់ពីថ្ងៃទី ០១ ខែវិច្ឆិកា តទៅ សាលារាជធានីភ្នំពេញ នឹងចាប់ផ្តើមធ្វើការកែប្រែនូវការកំណត់ថង់សម្រាប់ដាក់សំរាម និងពេលវេលានៃការបញ្ចេញនិងប្រមូលសំរាមតាមបណ្តាខណ្ឌនីមួយៗក្នុងភូមិសាស្ត្រក្រុងភ្នំពេញ ដោយសម្រេចកំណត់នូវពណ៌ថង់ដាក់សំរាមជា ២ ប្រភេទ គឺថង់ពណ៌ខ្មៅសម្រាប់ដាក់សំរាមសើម និងថង់ពណ៌សសម្រាប់ដាក់សំរាមស្ងួតហើយអ្នកមិនធ្វើតាមការណែនាំថ្មីនេះ នឹងត្រូវទទួលការផាកពិន័យការបិទការធ្វើអាជីវកម្មជាបណ្តោះអាសន្នឬអាចប្តឹងទៅតុលាការ។
យោងតាមសេចក្តីណែនាំ ដែលចុះហត្ថលេខាដោយលោក ឃួង ស្រេង អភិបាលរាជធានីភ្នំពេញ នៅថ្ងៃទី ១៦ ខែកញ្ញា បានឱ្យដឹងថា សព្វថ្ងៃនេះ មានក្រុមហ៊ុនផ្តល់សេវាសំអាត ប្រមូល និងដឹកជញ្ជូនសំរាម សំណល់រឹង នៅរាជធានីភ្នំពេញចំនួន ៣ ត្រូវបានជ្រើសរើស ហើយបានចាប់ផ្តើមប្រតិបត្តិការការងាររបស់ខ្លួនកាន់តែប្រសើរឡើងពីមួយថ្ងៃទៅមួយថ្ងៃ ចាប់ពីថ្ងៃទី ០១ ខែកក្កដាកន្លងមកដែរ។
រដ្ឋបាលរាជធានីភ្នំពេញ បានលើកឡើងថា ដើម្បីឱ្យការអនុវត្តប្រព័ន្ធថ្មីនៃការគ្រប់គ្រងសំរាម សំណល់រឹង នៅរាជធានីភ្នំពេញ ឱ្យកាន់តែមានប្រសិទ្ធភាពខ្ពស់ រដ្ឋបាលរាជធានីភ្នំពេញបានណែនាំទៅដល់ប្រជាពលរដ្ឋទាំងអស់ត្រូវធ្វើការញែក ការវេចខ្ចប់ ការទុកដាក់ និងការបញ្ចេញសំរាម សំណល់រឹងដោយបែងចែកជា ២ ប្រភេទ គឺសំរាម និងសំណល់រឹងមុននឹងបញ្ចេញមកក្រៅ។
សេចក្តីណែនាំនេះ បានបញ្ជាក់ថា៖ «សំរាម និងសំណល់រឹង មុននឹងបញ្ចេញ ត្រូវសម្រិតទឹកចេញដាក់ចូលទៅក្នុងប្រព័ន្ធលូឱ្យបានត្រឹមត្រូវ។ ត្រូវញែកសំរាម សំណល់រឹង ជា ០២ ប្រភេទ គឺសំរាមសើម និងសំរាមស្ងួត ដោយដាក់នៅក្នុងថង់ដាច់ដោយឡែកពីគ្នា»។
សំរាមសើមមានដូចជា សំណល់ម្ហូបអាហារ សំណល់សរីរាង្គ ផ្លែឈើ ផ្កា ដោយត្រូវដាក់នៅក្នុងថង់ពណ៌ខ្មៅ រីឯ សំរាមស្ងួតដែលមានដូចជា ក្រដាស ក្រដាសកាតុង ឡាំង គ្រឿងប្លាស្ទីក ហ្វូម ជ័រ ដែក កំប៉ុង ដប...ត្រូវដាក់ក្នុងថង់ពណ៌ស។
លោក ឃួង ស្រេង បានធ្វើការបញ្ជាក់ក្នុងសេចក្តីណែនាំនេះថា ក្រុមហ៊ុននឹងធ្វើការប្រមូល និងដឹកជញ្ជូនសំរាម សំណល់រឹង ដែលបានដាក់ក្នុងថង់ដែលបានកំណត់ទាំង ០២ ប្រភេទនេះតែប៉ុណ្ណោះ ទៅតាមកម្មវិធីដាច់ដោយឡែកពីគ្នា។ ការដាក់សំរាម សំណល់រឹង ក្នុងថង់ពណ៌ផ្សេងក្រៅពីពណ៏ខ្មៅ និងពណ៌ស ក្រុមហ៊ុននឹងមិនប្រមូលឡើយ។
លោកបានបន្ថែមទៀតថា៖ «បងប្អូនប្រជាពលរដ្ឋ មិនត្រូវវេចខ្ចប់សំណល់ដែលបង្កគ្រោះថ្នាក់ ដូចជា អំបែងកញ្ចក់ និងសំណល់មុតស្រួចនានា លាយឡំជាមួយនឹងសំរាមសើម និងសំរាមស្ងួតជាដាច់ខាត គឺត្រូវទុកដាក់សំណល់ដែលបង្កគ្រោះថ្នាក់ទាំងនេះចូលក្នុងធុងសំរាម ឬប្រអប់ដោយឡែកឱ្យបានត្រឹមត្រូវ ហើយក្រុមហ៊ុននឹងប្រមូលនៅរៀងរាល់ថ្ងៃអាទិត្យ»។
លោក ឃួង ស្រេង បញ្ជាក់ថា ក្នុងករណីទុកដាក់ខុសពីការណែនាំនេះ ក្រុមការងារផាកពិន័យ នឹងធ្វើកំណត់ហេតុអំពីកំហុសឆ្គងលើកទី១។ បើនៅតែទុកដាក់ខុសទៀត នឹងទទួលការផាកពិន័យទៅតាមច្បាប់ និងលិខិតបទដ្ឋានគតិយុត្តិជាធរមាន ព្រមទាំងប្តឹងទៅតុលាការតាមកំហុសជាក់ស្តែង។
រដ្ឋបាលរាជធានីភ្នំពេញបានបន្ថែមទៀតថា ថង់សំរាមសំណល់រឹង ត្រូវចងមាត់ឱ្យបានជិតត្រឹមត្រូវ និងមិនត្រូវហែកឡើយ។ ជាមួយគ្នានេះដែរសម្រាប់ផ្សារទំនើប ផ្សាររដ្ឋ ផ្សារឯកជន អគារពាណិជ្ជកម្ម សណ្ឋាគារ ផ្ទះសំណាក់អាគារស្នាក់នៅ ភោជនីយដ្ឋាន កន្លែងកម្សាន្ត សាលារៀន មន្ទីរពេទ្យ លំនៅឋានក្នុង បុរី សហគ្រាស រោងចក្រ សិប្បកម្ម អគារក្រសួង ស្ថាប័នរដ្ឋ ត្រូវមានកាតព្វកិច្ចដាក់ធុងសំរាមដោយខ្លួនឯងជាចាំបាច់។
ចំណែកនៅតាមវត្តអារាម ព្រះវិហារ អាជីវកម្មលក់ដូរចល័ត ផ្ទះស្នាក់នៅទូទៅ និងផ្សារក្រមួន...អាចមាន ០២ ប្រភេទ គឺមានធុងសំរាមខ្លួនឯងស្រាប់ និងមានធុងសំរាមដែលផ្តល់ឱ្យដោយប្រតិបត្តិករថ្មី ដែលអាចត្រូវបានរៀបចំដាក់ពង្រាយជាពិសេសនៅតាមតំបន់ផ្ទះល្វែងខ្ពស់ៗ។
សេចក្តីណែនាំដដែលនេះបានបញ្ជាក់ថា៖ «ត្រូវទុកដាក់សំរាម សំណល់រឹងរបស់ខ្លួនឱ្យបានត្រឹមត្រូវទៅតាមទីកន្លែងដែលបានកំណត់ដោយអាជ្ញាធរមូលដ្ឋាន និងប្រតិបត្តិករប្រមូលសំរាម តាមការជាក់ស្តែង ហើយហាមដាច់ខាតចោលសំរាម សំណល់រឹង នៅមាត់អណ្តូងលូ ប្រឡាយ តាមទីសាធារណៈ និងតាមអាងស្តុកទឹកនិងហាមដុតសំរាម សំណល់រឹង នៅរាជធានីភ្នំពេញ ជាកំហិត»។
ទន្ទឹមនឹងនេះដែរ សាលារាជធានីភ្នំពេញក៏បានធ្វើការកំណត់នូវកម្មវិធីបញ្ចេញសំរាមសំណល់រឹង ដោយក្នុងនោះសម្រាប់សំរាមសើម ខណ្ឌចំនួន០៥ រួមមាន ខណ្ឌដូនពេញ ខណ្ឌចំការមន ខណ្ឌ៧មករា ខណ្ឌទួលគោក និងខណ្ឌបឹងកេងកង ក្រុមហ៊ុននឹងប្រមូល និងដឹកជញ្ជូនរៀងរាល់ថ្ងៃ នៅពេលយប់ ចាប់ពីម៉ោង ៩ ដល់ម៉ោង ៥ ទៀបភ្លឺ។ ដូច្នេះ ម៉ោងបញ្ចេញសំរាមមានតែ៣ម៉ោងទេគឺពីម៉ោង ៦ យប់ ដល់ម៉ោង ៩ យប់ប៉ុណ្ណោះ។ ការបញ្ចេញសំរាមខុសពីម៉ោងនេះ នឹងទទួលការផាកពិន័យ។
រដ្ឋបាលរាជធានីភ្នំពេញថា ចំណែក ខណ្ឌ ០៩ ទៀត ដែលមាន ខណ្ឌឫស្សីកែវ ខណ្ឌសែនសុខ ខណ្ឌជ្រោយចង្វារ ខណ្ឌដង្កោ ខណ្ឌព្រែកព្នៅ ខណ្ឌពោធិ៍សែនជ័យ ខណ្ឌកំបូល ខណ្ឌមានជ័យ និងខណ្ឌច្បារអំពៅ ក្រុមហ៊ុននឹង ប្រមូល និងដឹកជញ្ជូនតាមប្រភេទផ្លូវ គឺផ្លូវជាតិ ត្រូវប្រមូល និងដឹកជញ្ជូនរៀងរាល់ថ្ងៃ នៅពេលយប់ វេលាម៉ោង ៩ យប់។ ដូច្នេះ ការបញ្ចេញសំរាមត្រូវចាប់ផ្តើមចន្លោះពីម៉ោង ៦ យប់ រហូតដល់ម៉ោង ៩ យប់។
ឯផ្លូវធំត្រូវប្រមូល និងដឹកជញ្ជូនរៀងរាល់ថ្ងៃ គឺពេលថ្ងៃ វេលាម៉ោង ៨ ព្រឹក ឬ ពេលយប់ វេលាម៉ោង ៩ ហើយផ្លូវរណប ត្រូវប្រមូល និងដឹកជញ្ជូនរៀងរាល់ ២ ថ្ងៃម្តង គឺពេលថ្ងៃ វេលាម៉ោង ៨ព្រឹក ឬពេលយប់ វេលាម៉ោង ៩។
ចំណែកឯសំរាម សំណល់រឹងស្ងួត ក្រុមហ៊ុននឹងប្រមូល និងដឹកជញ្ជូន ២ ដងក្នុង ១ សប្តាហ៍ គឺនៅរៀងរាល់ថ្ងៃចន្ទ និងថ្ងៃសុក្រ។
សាលារាជធានីភ្នំពេញបានបញ្ជាក់ថា៖ «ក្នុងករណីខកខានមិនបានបញ្ចេញសំរាម សំណល់រឹងតាមម៉ោងពេលកំណត់ (ពេលថ្ងៃត្រឹមម៉ោង ៨ ព្រឹក និងពេលយប់ ត្រឹមម៉ោង ៩ យប់) ត្រូវរង់ចាំបញ្ចេញនៅវេនក្រោយ ហើយមិនត្រូវយកសំរាមនេះមកទុក គ្មានសណ្តាប់ធ្នាប់ឡើយ»។
ចំពោះសំណល់ដើមឈើ, មែកឈើ, សំណល់សំណង់, អាចម៍ដី, កម្ទេចថ្ម, ខ្សាច់, គ្រឿងសង្ហារិម, គ្រឿងអេឡិចត្រូនិក, គ្រឿងអគ្គិសនី, សម្បកកង់, និងវត្ថុកែច្នៃឡើងវិញបាន ត្រូវទុកដាក់ដោយឡែកឱ្យបានត្រឹមត្រូវ រួចធ្វើការទំនាក់ទំនងមករដ្ឋាករស្វយ័តគ្រប់គ្រងសំរាម និងសំណល់រឹង រាជធានីភ្នំពេញដើម្បីធ្វើការស្នើសុំប្រមូល និងដឹកជញ្ជូនចេញ។
លោក នេត្រ ភក្ត្រា អ្នកនាំពាក្យក្រសួងបរិស្ថាន ប្រាប់ ភ្នំពេញ ប៉ុស្តិ៍ នៅថ្ងៃទី ១៦ ខែកញ្ញា ថា លោកគាំទ្រចំពោះចំណាត់ការរបស់រដ្ឋបាលរាជធានីភ្នំពេញក្នុងការញែកសំរាមទៅតាមប្រភេទផ្សេងៗគ្នា ដែលនេះជាយន្តការមួយក្នុងការឈានទៅគ្រប់គ្រងបានល្អនូវសំរាម។
លោកថា សម្រាប់ប្រទេសកម្ពុជា មួយថ្ងៃសំរាមដែលបង្កើតឡើងមានប្រមាណជាជាង ១ ម៉ឺនតោន ដែលក្នុងនោះរាជធានីភ្នំពេញមានចន្លោះពី ២ ៧០០ ទៅ ៣ ០០០ តោន ក្នុង ១ ថ្ងៃ។ ចំណែក ១ ឆ្នាំ កម្ពុជាបង្កើតសំរាមបានប្រមាណជាង ៤ លានតោន។
លោក នេត្រ ភក្ត្រា បានថ្លែងថា៖ «ការកែទម្រង់របស់រាជរដ្ឋាភិបាលលើការគ្រប់គ្រងសំណល់សំរាម តាមរយៈការដាក់ចុះនូវគោលនយោបាយគ្រប់គ្រងសំណល់រឹងសំរាមតាមទីប្រជុំជន ហើយនិងការតម្រង់ទិសឱ្យមានការគ្រប់គ្រងដោយក្រុមហ៊ុនច្រើន និងការចូលរួមពីសាធារណជនក្នុងការគ្រប់គ្រងសំរាមនេះ»។
លោក លី សុវ៉ាន់ ពលរដ្ឋមួយរូបនៅក្នុងខណ្ឌដង្កោ បានគាំទ្រចំពោះចំណាត់ការថ្មីរបស់សាលាក្រុង ប៉ុន្តែលោកបារម្ភថា ប្រសិទ្ធភាពនៃការទទួលបានលទ្ធផលអាចនឹងមិនដូចទៅនឹងការចង់បានរបស់អាជ្ញាធរ តែលោកនឹងចូលរួមអនុវត្តតាមការណែនាំថ្មីនេះ។
លោកថា៖ «ខ្ញុំគិតថាល្អ ប្រសិនបើប្រទេសយើងអាចអនុវត្តនូវការណែនាំថ្មីនេះបាន ពីការទុកដាក់សំរាម ដោយសារប្រទេសយើង ពិសេសរាជធានីទទួលរងនូវផលប៉ះពាល់ច្រើនណាស់ពីសំរាមនេះ ពិសេសគឺការស្ទះលូ ដែលនាំឱ្យមានទឹកលិចផ្លូវនិងផ្ទះប្រជាពលរដ្ឋ»។
បើតាមលោក នេត្រ ភក្ត្រា នៅក្នុងសំណល់ ១០០% គឺ ៦៨% ជាសំណល់សរីរាង្គ ២០% ជាសំណល់ប្លាស្ទិក ហើយប្រមាណជា ១០% សំណល់រឹងជាសំណល់គ្រោះថ្នាក់៕
វីដេអូ៖