ភ្នំពេញៈ សាលារាជធានីភ្នំពេញបានរៀបចំទីតាំង ២ កន្លែង គឺវិទ្យាល័យទួលស្វាយព្រៃ និងវិទ្យាល័យជាស៊ីមបឹងកេងកង សម្រាប់ការធ្វើតេស្តលោកគ្រូ អ្នកគ្រូ ដែលមានបំណងចង់ធ្វើតេស្តរកមេរោគកូវីដ ១៩ ចាប់ពីថ្ងៃទី ១៥ ដល់ថ្ងៃទី ២២ ខែកញ្ញា។ យោងតាមការឱ្យដឹងរបស់អនុគណៈកម្មការស្រាវជ្រាវជំងឺកូវីដ ១៩។
អនុគណៈកម្មការស្រាវជ្រាវជំងឺកូវីដ ១៩ បានធ្វើការប្រកាសនៅលើបណ្តាញសង្គមហ្វេសប៊ុកនៅថ្ងៃទី ១៥ ខែកញ្ញាថា លោកគ្រូ អ្នកគ្រូ ដែលមានបំណងធ្វើតេស្តសំណាកអាចអញ្ជើញទៅកាន់ទីតាំងសាធារណៈដែលសាលារាជធានីភ្នំពេញបានរៀបចំទីតាំង ២ កន្លែង ប៉ុន្តែលោកគ្រូអ្នកគ្រូក៏អាចទៅកាន់ទីតាំងធ្វើតេស្តសំណាកផ្សេងៗទៀតក៏បាន។
លោកគ្រូ អ្នកគ្រូ ក៏អាចទៅធ្វើតេស្តសំណាកនៅកោះពេជ្រ នៅពីក្រោយអគារ City Hall វិហារយេស៊ូ នៅច្រមុះជ្រូកស្ទឹងមានជ័យ មជ្ឈមណ្ឌល ម៉ូឌើន ៥ ផ្លូវជាតិលេខ ៥ សាលាបឋមសិក្សាកន្ទោក វិហារយេស៊ូ ជិតស្ពានអាកាសពេទ្យលោកសង្ឃ ខាងលិចសាកលវិទ្យាល័យភូមិន្ទភ្នំពេញ RUPP និងជិតផ្សារព្រៃទា សង្កាត់ចោមចៅ ៣ ខណ្ឌពោធិ៍សែនជ័យ។
ការធ្វើតេស្តរកមេរោគកូវីដ ១៩ ទៅដល់លោកគ្រូអ្នកគ្រូទាំងរដ្ឋ និងឯកជននេះធ្វើឡើង បន្ទាប់ពីគ្រឹះស្ថានសិក្សាសាធារណៈ និងឯកជន នៅតាមបណ្តារាជធានី-ខេត្តទូទាំងប្រទេសបានចាប់ផ្តើមដំណើរការឡើងវិញជាបណ្តើរៗ ដែលសាលានៃខេត្តខ្លះបានបើកសាកល្បងពីថ្ងៃទី ១៣ និងសាលាខ្លះបើកនៅថ្ងៃទី ១៥ ខែកញ្ញាកន្លងមក។
រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានចេញសេចក្តីណែនាំពីគោលការណ៍ប្រតិបត្តិស្តង់ដាសម្រាប់ការលើកកម្ពស់សុខភាព និងសុវត្ថិភាពសិក្សាក្នុងការបង្រៀន និងរៀនតាមបណ្តុំ សម្រាប់គ្រឹះស្ថានសិក្សាសាធារណៈ និងឯកជនដើម្បីពង្រឹងយន្តការលើកកម្ពស់សុខភាព និងសុវត្ថិភាពសិក្សាផងដែរ។
ជាមួយគ្នានោះ លោកបានណែនាំឱ្យគ្រឹះស្ថានសិក្សាត្រូវរៀបចំផែនការធ្វើតេស្តរហ័សតាមបែបជម្រើសដោយចៃដន្យ ដែលមានលក្ខណៈជាវដ្ត និងសមស្របនឹងហានិភ័យស្ថាប័ន ឬអង្គភាព និងប្រព្រឹត្តទៅជាប្រចាំលើអ្នកសិក្សា និងបុគ្គលិកអប់រំចំនួនយ៉ាងតិច ៥% ទៅ ១០% នៃបុគ្គលិកអប់រំក្នុងស្ថាប័ន ឬអង្គភាព។
លោក ហង់ជួន ណារ៉ុន បានលើកឡើងថា៖ «ផែនការនេះគួរធានាថាបុគ្គលិកអប់រំទាំងអស់ដែលមានវត្តមាននៅបរិវេណស្ថាប័ន ឬអង្គភាពទទួលបានការធ្វើតេស្តរហ័សជាប្រចាំយ៉ាងតិច ១ ដងក្នុងចន្លោះ ១ ទៅ ២ សប្តាហ៍ កំណត់បុគ្គលិកដែលមានហានិភ័យខ្ពស់»។
កាលពីថ្ងៃទី ១៤ ខែកញ្ញា មានលោកគ្រូ អ្នកគ្រូ និងបុគ្គលិកអប់រំចំនួន ១០ ៤៤៣ នាក់ បានធ្វើតេស្តក្នុងនោះមានវិជ្ជមានកូវីដ ១៩ ចំនួន ២៤ នាក់៕