កែបៈ រាជរដ្ឋាភិបាលកម្ពុជានឹងប្រកាសខេត្ដកែបជាខេត្ដដែលគ្មានគ្រាប់មីនមុនគេ ខណៈអាជ្ញាធរមីនតាមរយៈក្រុមប្រតិបត្ដិករដោះមីននៃមជ្ឈមណ្ឌលសកម្មភាពកំចាត់មីនកម្ពុជា (CMAC) បច្ចុប្បន្នកំពុងធ្វើសកម្មភាពបោសសម្អាតមីនក្នុងខេត្ដនេះ ដើម្បីឱ្យអស់នៅមុនដំណាច់ឆ្នាំ ២០២១។
លោក លី ធុជ អនុប្រធានទី១ អាជ្ញាធរមីនប្រាប់ ភ្នំពេញ ប៉ុស្ដិ៍ នៅថ្ងៃទី ១៥ ខែកញ្ញាថា ខេត្ដកែបជាខេត្ដមានផ្ទៃដីមានចម្ការមីនតិចជាងគេក្នុងចំណោមខេត្ដទាំងអស់ទូទាំងប្រទេស។ ដូច្នេះទើបរាជរដ្ឋាភិបាលសម្រេចយកខេត្ដនេះ ជាខេត្ដដែលគ្មានមីនមុនគេ។
លោកថ្លែងថា៖ «សម្ដេចនាយករដ្ឋមន្ដ្រី [ហ៊ុន សែន] កាលពី ២ សប្ដាហ៍កន្លងទៅបានអនុញ្ញាតឱ្យខ្ញុំប្រើប្រាស់ធនធាន ជំនួយឥតសំណងរបស់ប្រទេសហុងគ្រីទៅបោសសម្អាតវា [ចម្ការមីន] ឱ្យអស់។ យើងនឹងដាក់កម្លាំងស៊ីម៉ាក់របស់យើង ដែលជាប្រតិបត្ដិករក្នុងការបោសសម្អាតមីនទៅបោសសម្អាតនៅខេត្ដកែបនេះ ដើម្បីយើងអាចប្រកាសថា ខេត្ដកែបជាខេត្ដគ្មានមីនមុនគេ»។
លោកបានឱ្យដឹងថា បន្ទាប់ពីប្រកាសខេត្ដកែបជាខេត្ដគ្មានមីនមុនគេ ខេត្ដដែលមានចម្ការមីនតិចតួចផ្សេងទៀត ដូចជាខេត្ដព្រះសីហនុ អាជ្ញាធរមីនក៏កំពុងព្យាករធនធានពីសប្បុរសជន ដើម្បីចូលរួមបោសសម្អាតមីននៅខេត្ដនេះឱ្យអស់នៅពេលខាងមុខ បន្ទាប់ពីខេត្ដកែបផងដែរ។
លោក លី ធុជ ថ្លែងថា លោកនាយករដ្ឋមន្ដ្រី ហ៊ុន សែន បានអនុញ្ញាតឱ្យអាជ្ញាធរមីន ខិតខំកៀរគរធនធានពីវិស័យឯកជន សប្បុរសជន និងដៃគូអភិវឌ្ឍន៍នានា ចូលរួមបោសសម្អាតមីន។ គោលដៅរបស់រាជរដ្ឋាភិបាលនឹងប្រកាសចាប់ពីភូមិដែលគ្មានមីនផងដែរ (Mine Free Villages)។
លោកបន្តថា៖ «ដូច្នេះឥស្សរជនខ្លះ ប្រទេសខ្លះ ឬក៏ស្ថានទូតខ្លះ គាត់អាចគាំទ្រ ភូមិណាមួយ តាមរយៈការផ្ដល់ថវិកាបោសសម្អាតចម្ការមីននៅតាមភូមិទាំងនោះ។ ដូចជាភូមិ ១ មានចម្ការមីន ១ មានពលរដ្ឋ ៥០ គ្រួសារ ឬ ២០ គ្រួសារកំពុងរស់នៅ ពលរដ្ឋអាចទទួលផលពីសប្បុរសជន តាមរយៈការគាំទ្រថវិកាបោសសម្អាតមីនបែបនេះ។ នេះក៏ជាការពន្លឿនគោលដៅសម្រាប់កម្ពុជាគ្មានមីននៅឆ្នាំ ២០២៥ ដែរ»។
លោក លី ធុជ បញ្ជាក់ថា៖ «យើងនឹងបោសសម្អាតឱ្យអស់នៅមុនដំណាច់ឆ្នាំ ២០២១ នេះហើយមិនឱ្យឆ្លងឆ្នាំទេ»។
លោក វៅ សុខា អភិបាលរង និងជាអ្នកនាំពាក្យរដ្ឋបាលខេត្ដកែបថ្លែងនៅថ្ងៃទី ១៦ កញ្ញា ថា រដ្ឋបាលខេត្ដបានទទួលលិខិតពីអាជ្ញាធរមីនរួចហើយ កាលពីថ្ងៃទី ១៣ ខែកញ្ញា ក្នុងការចូលរួមសហការជាមួយកងកម្លាំងស៊ីម៉ាក់ ធ្វើការបោសសម្អាតមីនដែលនៅសេសសល់ក្នុងខេត្ដកែប។
លោកថ្លែងថា៖ «កម្លាំងបោសសម្អាតមីនរបស់ស៊ីម៉ាក់ ពួកគាត់ចុះមកដល់ខេត្ដកែបតាំងពីថ្ងៃទី ១៣ ខែកញ្ញាម្ល៉េះ។ ពេលនេះពួកគាត់កំពុងចុះទៅបោសសម្អាតមីននៅទីតាំង ភូមិដំណាក់ចង្អើរ ដែលទីតាំងនេះ ជាអតីតទីតាំងកងកម្លាំងឈរជើងកាលពីសម័យសង្គ្រាម»។
លោក សុខា ឱ្យដឹងថា អាជ្ញាធរខេត្ដ ក្រុង ស្រុក កំពុងសហការ ជាមួយកងកម្លាំងដោះមីនស៊ីម៉ាក់ ចុះទៅទីតាំងដែលមានមីន ដើម្បីបោសសម្អាតមីនជាបណ្ដើរៗហើយ។ ការបោសសម្អាតមីនឱ្យអស់ពីខេត្ដកែបនឹងអាចផ្ដល់ដីប្រកបដោយសុវត្ថិភាពដល់ប្រជាពលរដ្ឋរស់នៅជុំវិញ។ កំណើនភ្ញៀវទេសចរ ប្រកបដោយសុវត្ថិភាពនៅក្នុងខេត្ដកែបផងដែរ។
បើតាមអ្នកនាំពាក្យរូបនេះក្នុងបរិវេណផ្ទៃដីគោករបស់ខេត្ដកែបប្រមាណជាង ១០០ គីឡូម៉ែត្រក្រឡា គឺផ្ទៃដីដែលមានចម្ការមីនមានប្រមាណ ១០ ទីតាំង ដែលកងកម្លាំងស៊ីម៉ាក់ និងអាជ្ញាធរមូលដ្ឋាន កំពុងពិនិត្យ និងធ្វើការបោសសម្អាត។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) រវល់ប្រជុំនាព្រឹកថ្ងៃទី ១៦ កញ្ញា មិនអាចធ្វើអត្ថាធិប្បាយបានទេ។
លោក នូ សំណាត មន្ដ្រីសកម្មភាពមីនខេត្ដកែបឱ្យដឹងនៅថ្ងៃទី ១៦ ខែកញ្ញា ដែរថា ខេត្ដកែបកាលពីសម័យសង្គ្រាមជាតំបន់ក្ដៅមួយដែរ ក្នុងចំណោមខេត្ដដទៃទៀត។ ដូច្នេះមានសេសសល់សំណល់គ្រាប់មីនមិនទាន់ផ្ទុះមួយចំនួនដែលត្រូវបោសសម្អាតឡើងវិញដែរ។
លោកបានថ្លែងថា៖ «ចម្ការមីននៅក្នុងខេត្ដកែប គឺបានកំណត់ច្បាស់លាស់។ ចំពោះការត្រៀមដោះមីនជំហានដំបូងក្នុងពេលនេះ ស្ថិតនៅទីតាំងភូមិដំណាក់ចង្អើរលើផ្ទៃដីចម្ការមីនប្រមាណ ៥ ហិកតា»។
លោកឱ្យដឹងថា ក្នុងចំណោមផ្ទៃដីគោកខេត្ដកែបជាង ១០០ គីឡូម៉ែត្រក្រឡា តំបន់ដែលបានកំណត់ថា មានចម្ការមីនមានជាង ៧០ ហិកតា ស្ថិតនៅក្រុងកែប និងស្រុកដំណាក់ចង្កើរ។ ប៉ុន្ដែតំបន់ទាំងនេះ មិនមានសេសសល់សំណល់គ្រាប់មីនច្រើនទេ ដោយសារពលរដ្ឋបានប្រើប្រាស់ដីនៅតំបន់នោះជាច្រើនឆ្នាំកន្លងមកហើយ។
លោក នូ សំណាត ក៏បានបញ្ជាក់ដែរថា កាលពីមុនសកម្មភាពបោសសម្អាតមីននេះ អាជ្ញាធរសកម្មភាពមីនខេត្ដកែបក៏បានប្រមូលគ្រាប់យុទ្ធភណ្ឌមិនទាន់ផ្ទុះបានប្រមាណ ១០ គ្រាប់ស្ថិតនៅទីតាំងនៃស្រុកដំណាក់ចង្អើរ និងក្នុងក្រុងកែប ក្រោយពីទទួលព័ត៌មានពីប្រជាពលរដ្ឋ៕