.jpg)
មន្ត្រីអាជ្ញាធរមីនចុះពិនិត្យដីចម្ការមីននៅតាមបណ្តាខេត្ត ដែលរងផលប៉ះពាល់ កាលពីថ្ងៃទី ១៥ កញ្ញា។ រូប CMAA
ភ្នំពេញៈ ក្រុមត្រួតពិនិត្យនៃអាជ្ញាធរមីនកំពុងចុះពិនិត្យ កិច្ចប្រតិបត្តិការស្រាវជ្រាវចម្ការមីនមូលដ្ឋាន ការបោសសម្អាតមីន និងផ្ទៃដី ក្រោយពេលបោសសម្អាតនៅតាមបណ្តាខេត្ត ដែលរងផលប៉ះពាល់ដោយសារមីន ក្រោយអនុវត្ដអស់ពេលជាង ១ ទសវត្សរ៍ ដើម្បីកំណត់ផ្ទៃដី ដែលមានមីនឡើងវិញឱ្យបានច្បាស់លាស់ និងពន្លឿនគោលដៅបោសម្អាតមីនឱ្យអស់ពីកម្ពុជាក្នុងឆ្នាំ ២០២៥។
ការត្រួតពិនិត្យនេះ គឺដើម្បីពង្រឹងគុណភាពការងារស្រាវជ្រាវ ចម្ការមីន និងការបោសសម្អាតមីន ដែលអនុវត្តដោយប្រតិបត្តិករជាតិ-អន្តរជាតិនៅតាមបណ្តាខេត្តដែលទទួលរងផលប៉ះពាល់ដោយសារមីន។ ខេត្ដដែលក្រុមត្រួតពិនិត្យអាជ្ញាធរមីនបានបន្តចុះពិនិត្យទាំងនោះ រួមមាន ខេត្តពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ សៀមរាប កំពង់ធំ ព្រះវិហារ កំពង់ចាម ក្រចេះ ស្ទឹងត្រែង មណ្ឌលគិរី រតនគិរី ជាដើម។
លោក លី ធុជ អនុប្រធានទី ១ អាជ្ញាធរមីន ប្រាប់ ភ្នំពេញ ប៉ុស្ដិ៍ នៅថ្ងៃទី ១៥ កញ្ញាថា បច្ចុប្បន្នប្រតិបត្តិករបោសសម្អាតមីនបានប្រើប្រាស់ផែនទីចម្ការមីន ដែលបានធ្វើតាំងពីជាង ១០ ឆ្នាំមុន។ ដូច្នេះមានចម្ការមីនមួយចំនួនត្រូវ ពិនិត្យឡើងវិញថា តើចម្ការមីនទាំងនោះនៅមានមីនដដែល ឬគ្មានមីន ដើម្បីកំណត់ឱ្យបានច្បាស់លាស់។
លោកថ្លែងថា៖ «យើងត្រូវការពិនិត្យឡើងវិញ នូវទិន្នន័យដែលយើងបានធ្វើកន្លងមក ជាង ១ ទសវត្សរ៍នេះ ជាមួយកិច្ចសហប្រតិបត្ដិការពីប្រតិបត្ដិករ និងអ្នកជំនាញពាក់ព័ន្ធ»។
លោកបន្តថា៖ «ការងារនេះចាំបាច់ណាស់ដើម្បីយើងដឹងឱ្យច្បាស់ថា តើទំហំការងាររបស់យើងវានៅសល់ប៉ុនណា ដើម្បីយើងដាក់ធនធានមនុស្ស និងធនធានហិរញ្ញវត្ថុ ដែលទទួលបានពីរាជរដ្ឋាភិបាល និងប្រទេស ជាមិត្ដឱ្យបានចំគោលដៅ។ នៅខេត្ដណាមានប៉ុន្មានចម្ការមីន ស្ថិតនៅស្រុកណា ឃុំណា ភូមិណា តែម្ដង»។
បើតាមលោក លី ធុជ ការប្រើប្រាស់ធនធានឱ្យចំគោលដៅពិតប្រាកដ គឺចំណេញពេលវេលា និងចំណេញថវិកា ព្រោះថា បើបោសសម្អាតមីននៅតំបន់ណាដែលគ្មានមីន ធ្វើឱ្យខាតពេលវេលា ខាតថវិការបស់រដ្ឋ និងថវិកាប្រទេសម្ចាស់ជំនួយ។
លោកបញ្ជាក់ថា៖ «យើងកំពុងបញ្ជូនក្រុមអ្នកជំនាញរបស់យើង ចុះសិក្សាស្រាវជ្រាវពិនិត្យឡើងវិញ នៅតាមខេត្ដ ដែលមានការគំរាមកំហែងដោយសារមីន។ នេះជាការងារស្នូលក្នុងគោលដៅដើម្បីចំណេញពេលវេលា និងថវិកា។ យើងខិតខំពន្លឿនកិច្ចការនេះ ដើម្បីកំណត់ឱ្យបានជាក់លាក់ជាថ្មីម្ដងទៀតនៅទីតាំងដែលជាខេត្ដគោលដៅនេះ»។
បើតាមលោក លី ធុជ ផ្ទៃដីចម្ការមីន ដែលនៅសល់ក្នុងប្រទេសកម្ពុជាមានប្រមាណ ៨០០ គីឡូម៉ែត្រក្រឡា។ ចំណែកការត្រួតពិនិត្យគុណភាពការស្រាវជ្រាវចម្ការមីន និងការបោសសម្អាតមីននេះ គឺធ្វើទៅតាមខេត្ដគោលដៅអាទិភាពដែលជាខេត្ដមានមីនច្រើនជាងគេ ដូចជាខេត្ដបាត់ដំបង បន្ទាយមានជ័យ និងខេត្ដសៀមរាបជាមុន។
បើតាមអាជ្ញាធរមីន ការត្រួតពិនិត្យគុណភាពការស្រាវជ្រាវចម្ការមីន និងការបោសសម្អាតមីននេះធ្វើឡើងក្នុងគោលបំណងពង្រឹងគុណភាពការងាររបស់ប្រតិបត្តិករក្នុងពេលកំពុងអនុវត្ត និងដើម្បីធានាថា ទិន្នន័យនៃការស្រាវជ្រាវចម្ការមីនមូលដ្ឋានមានសុក្រឹតភាព។ សកម្មភាពពេលកំពុងបោសសម្អាតមីនមានលក្ខណៈត្រឹមត្រូវស្របតាមស្តង់ដាជាតិ និងមានសុវត្ថិភាព។ ផ្ទៃដីដែលបានបោសសម្អាតរួចមានសុវត្ថិភាព មុនប្រគល់ជូនប្រជាពលរដ្ឋប្រើប្រាស់។
លោក លី ធុជ ឱ្យដឹងថា ការត្រួតពិនិត្យគុណភាពការស្រាវជ្រាវចម្ការមីន និងការបោសសម្អាតមីននេះ ដឹកនាំដោយអាជ្ញាធរមីន និងមានក្រុមអ្នកជំនាញប្រតិបត្ដិការ ការត្រួតពិនិត្យគុណភាពការស្រាវជ្រាវចម្ការមីន និងការបោសសម្អាតមីនចូលរួមផងដែរ។
លោកថា ការត្រួតពិនិត្យគុណភាព គឺធ្វើឡើងតាមរយៈការធ្វើបទសម្ភាសជាមួយប្រជាពលរដ្ឋនៅមូលដ្ឋាន អាជ្ញាធរដែនដី បន្ទាប់មកក្រុមអ្នកជំនាញសកម្មភាពមីននៅតាមខេត្ដ។ ក្រៅពីនេះក៏មានការប្រើប្រាស់សម្ភារអេឡិចត្រូនិក ដូចជា ថេប្ល៊ិត (Tablet) ដើម្បីប្រមូលទិន្នន័យឱ្យបានច្បាស់លាស់ និងលឿនផងដែរ។
លោកអះអាងថា ប្រតិបត្ដិករបោសសម្អាតមីននៅកម្ពុជាទាំងប្រតិបត្ដិករជាតិ និងអន្តជាតិគឺមានជំនាញច្បាស់លាស់។ ក្រោយពេលបោសសម្អាត គឺកម្រមានសេសសល់មីនណាស់ ហើយមុននឹងប្រគល់ផ្ទៃដីចម្ការមីនដែលបោសសម្អាតរួចទៅឱ្យប្រជាពលរដ្ឋវិញ គឺអាជ្ញាធរមីនមានក្រុមត្រួតពិនិត្យទៅលើគុណភាពនៃការបោសសម្អាតនេះ ដើម្បីឱ្យប្រាកដថា ផ្ទៃដីដែលបោសសម្អាតនោះមានសុវត្ថិភាព។
បើតាមអាជ្ញាធរមីន សមិទ្ធផលការងារសម្រេចបានក្នុងការអនុវត្ត ផែនការសកម្មភាព ឆ្នាំ ២០១៨-២០២០ កន្លងមក កម្ពុជាបានរំដោះ ផ្ទៃដីចំនួន ៤២១ គីឡូម៉ែត្រក្រឡា ស្មើនឹង ៦៦% នៃផែនការ ៣ ឆ្នាំ។ ក្នុងនោះរកឃើញ និងកម្ទេចគ្រាប់មីនប្រឆាំងមនុស្សចំនួន ៤៩ ២៥៦ គ្រាប់មីន ប្រឆាំងរថក្រោះចំនួន ៩៥៦ គ្រាប់ និងសំណល់ជាតិផ្ទុះពីសង្គ្រាមចំនួន ២២១ ៣៧២ គ្រាប់ ព្រមទាំងមានអ្នកទទួលផលចំនួនប្រមាណ ២ លាននាក់។ ក្នុងនោះក៏មានប្រជាពលរដ្ឋ ចំនួន ២៨៤០ ៦១២ នាក់ បានទទួលសារអប់រំអំពីគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមផងដែរ៕
វីដេអូ៖
