.jpg)
គ្រូពេទ្យចាក់វ៉ាក់សាំងឱ្យ កុមារ នៅសង្កាត់ជ្រោយចង្វារនាពេលកន្លងមក។ ហុង មិនា
ភ្នំពេញៈ គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) នឹងចាប់ផ្តើមចាក់វ៉ាក់សាំងប្រភេទស៊ីណូវ៉ាក់ដូសទី ១ និងដូសទី ២ ដល់កុមារដែលមានអាយុចាប់ពី ៦ ឆ្នាំ ដល់អាយុក្រោម ១២ ឆ្នាំ នៅរាជធានី-ខេត្តចំនួន ៤ ដែលចាប់ផ្តើមបើកយុទ្ធនាការចាប់ពីថ្ងៃទី ១៧ ខែកញ្ញា និងខេត្តចំនួន ២១ ទៀតនឹងត្រូវចាប់ផ្តើមបើកយុទ្ធនាការចាប់ពីថ្ងៃទី ១៨ ខែ កញ្ញា ឆ្នាំ ២០២១។ រាជធានីភ្នំពេញ ខេត្តកណ្តាល ខេត្តព្រះសីហនុ និងខេត្តកោះកុង ផ្តើមបើកយុទ្ធនាការចាក់មុនគេ។
លោកស្រី ឱ វណ្ណឌីន អ្នកនាំពាក្យ និងជា (គ.វ.ក-១៩) បានប្រាប់ឱ្យដឹងនៅថ្ងៃទី ១៦ ខែកញ្ញា ថា ចំពោះកូនចៅរបស់មន្ត្រីរាជការ និងមន្ត្រីជាប់កិច្ចសន្យា ដែលកំពុងបម្រើការនៅថ្នាក់ជាតិត្រូវទៅទទួលការចាក់វ៉ាក់សាំងកូវីដ ១៩ ចាប់ពីថ្ងៃទី ១៧ ខែកញ្ញា នៅតាមមន្ទីរពេទ្យជាតិនានា។
ចំពោះកូនចៅថ្នាក់ដឹកនាំរាជរដ្ឋាភិបាល ថ្នាក់ដឹកនាំព្រឹទ្ធសភា និងសមាជិកព្រឹទ្ធសភា ថ្នាក់ដឹកនាំរដ្ឋសភា និងសមាជិករដ្ឋសភា និងកូនចៅឥស្សរជនដែលមានតួនាទី ជាឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី រដ្ឋលេខាធិការ ឬមានឋានៈស្មើត្រូវទៅចាក់វ៉ាក់សាំងកូវីដ ១៩ នៅមន្ទីរពេទ្យកាល់ម៉ែត។
កូនចៅឥស្សរជនដែលជាអនុរដ្ឋលេខាធិការ អគ្គនាយក អគ្គនាយករង ឬមានឋានៈស្មើចាក់វ៉ាក់សាំងនៅមន្ទីរពេទ្យព្រះអង្គឌួង។
សម្រាប់មន្ទីរពេទ្យកុមារជាតិ មជ្ឈមណ្ឌលជាតិគាំពារមាតា និងទារក មន្ទីរពេទ្យមិត្តភាពខ្មែរ-សូវៀត និងមន្ទីរពេទ្យគន្ធបុប្ផា ជាទីតាំងចាក់វ៉ាក់សាំងកូវីដ ១៩ សម្រាប់កូនចៅមន្ត្រីរាជការចាប់ពីថ្នាក់ប្រធាននាយកដ្ឋានចុះ និងមន្ត្រីជាប់កិច្ចសន្យាថ្នាក់ជាតិនៃក្រសួងស្ថាប័ន មួយចំនួនទៀត។
ការចាក់វ៉ាក់សាំងកូវីដ ១៩ ទាំងដូសទី១ និងដូសទី២ សម្រាប់កូនចៅមន្ត្រីអង្គការសហប្រជាជាតិ មន្ត្រី និងបុគ្គលិកស្ថានទូតនានា មន្ត្រី និងបុគ្គលិកអង្គការជាតិ អន្តរជាតិ អ្នកឧកញ៉ា និងលោកឧកញ៉ា នៅមន្ទីរពេទ្យកាល់ម៉ែត ចាប់ពីថ្ងៃទី ៥ ដល់ថ្ងៃទី ១៣ ខែតុលា។
ចំពោះកូនចៅមន្ត្រីរាជការ មន្ត្រីជាប់កិច្ចសន្យាព្រមទាំងកូនចៅប្រជាពលរដ្ឋទូទៅក្រោមឱវាទរដ្ឋបាលរាជធានីភ្នំពេញ ខេត្តកណ្តាល ព្រះសីហនុ និងខេត្តកោះកុងនឹងត្រូវរៀបចំចាក់ជូនដោយរដ្ឋបាលរាជធានីខេត្តទាំង ៤ នេះតាមពេលវេលា និងទីតាំងដែលបានកំណត់។
លោកស្រី ឱ វណ្ណឌីន ថ្លែងថា៖ «ការចាក់វ៉ាក់សាំងសម្រាប់កុមារនេះ ដោយចាប់ផ្តើមចាក់ចាប់ពីថ្ងៃទី ១៧ ខែកញ្ញា នេះ ដែលគម្លាតរវាងដូសទី១ និងទី២ គឺរយៈពេល ២១ ថ្ងៃ»។
លោកស្រីថា សម្រាប់ឯកសារត្រូវភ្ជាប់ជាមួយនៅពេលទៅចាក់វ៉ាក់សាំងត្រូវមានសំបុត្រកំណើត ឬសំបុត្របញ្ជាក់កំណើត ឬសៀវភៅគ្រួសារ ឬសៀវភៅស្នាក់នៅ ឬលិខិតឆ្លងដែន និងបណ្ណសម្គាល់ខ្លួនមន្ត្រីរាជការ ឬបណ្ណសម្គាល់មន្ត្រីជាប់កិច្ចសន្យារបស់ឪពុកម្តាយ (ចំពោះកូនចៅមន្ត្រីរាជការថ្នាក់ជាតិ)។
លោក ឃួង ស្រេង អភិបាលរាជធានីភ្នំពេញបានប្រកាសចាប់ផ្តើមយុទ្ធនាការចាក់វ៉ាក់សាំងដល់កុមារដែលមានអាយុចាប់ពី ៦ ឆ្នាំ ដល់ក្រោម ១២ ឆ្នាំ ក្នុងភូមិសាស្ត្ររាជធានីភ្នំពេញ ដែលសម្រាប់ដូសទី១ នឹងចាប់ផ្តើមពីថ្ងៃទី ១៧ ខែកញ្ញា ដល់ ថ្ងៃទី ៣ ខែតុលា ឆ្នាំ ២០២១ និងសម្រាប់ដូសទី២ នឹងចាប់ផ្តើមពីថ្ងៃទី ៨ ដល់ថ្ងៃទី ២៤ ខែតុលា ឆ្នាំ ២០២១ តាមរយៈការអញ្ជើញ និងទំនាក់ទំនងជាមួយអាជ្ញាធរមូលដ្ឋាន ដែលមានទីតាំងចំនួន ៤២ ទីតាំងដែលបានកំណត់រួចជាស្រេច។
លោក ឃួង ស្រេង បានបញ្ជាក់ថា អ្នកមានអាយុត្រូវចាក់វ៉ាក់សាំងត្រូវមានសំបុត្រកំណើត ឬសំបុត្របញ្ជាក់កំណើត ឬលិខិតឆ្លងដែន ឬសៀវភៅស្នាក់នៅ ឬសៀវភៅគ្រួសារ ហើយចំពោះកុមារ ដែលរស់នៅជាមួយមាតាបិតាអាណាព្យាបាលត្រូវមានលិខិតព្រមព្រៀងអនុញ្ញាតឱ្យចាក់វ៉ាក់សាំងជាលាយលក្ខណ៍អក្សរពីសំណាក់មាតាបិតាអាណាព្យាបាលពួកគេ។
ចំពោះកុមារដែលស្នាក់នៅឆ្ងាយពីមាតាបិតា អាណាព្យាបាល តម្រូវឱ្យមាតាបិតាអាណាព្យាបាល បំពេញនូវលិខិតព្រមព្រៀងអនុញ្ញាតឱ្យចាក់វ៉ាក់សាំងជាលាយលក្ខណ៍អក្សរ ហើយផ្ញើតាមប្រព័ន្ធអនឡាញមកបុត្រធីតា ឬសាច់ញាតិ ដើម្បីផ្តល់ឱ្យគ្រូពេទ្យនៅទីតាំងចាក់វ៉ាក់សាំងផ្ទាល់។
ចំពោះកុមារកំព្រាដែលរស់នៅតាមមណ្ឌលនានា ត្រូវមានលិខិតព្រមព្រៀងអនុញ្ញាតឱ្យចាក់វ៉ាក់សាំងជាលាយលក្ខណ៍អក្សរពីសំណាក់អ្នកគ្រប់គ្រងមណ្ឌលថែទាំកុមារ រីឯកុមារដែលជាជនអនាថា មិនអាចកំណត់អត្តសញ្ញាណមាតាបិតា គ្មានអាណាព្យាបាល និងមិនមាន ទីតាំងស្នាក់នៅពិតប្រាកដ អាជ្ញាធរមូលដ្ឋាន ត្រូវសហការជាមួយមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ ដើម្បីចេញលិខិតបញ្ជាក់ និងនាំយកពួកគេមកទទួលវ៉ាក់សាំងបានឱ្យគ្រប់ៗគ្នា។
ទន្ទឹមគ្នានេះដែរ អភិបាលខេត្តប៉ៃលិន លោកស្រី បាន ស្រីមុំ លោកស្រី មិថុនា ភូថង អភិបាលខេត្តកោះកុង អភិបាលខេត្តព្រះសីហនុ លោក គួច ចំរើន ផ្ដើមយុទ្ធនាការតាមកាលបរិច្ឆេទនៃការសម្រេចរបស់ (គ.វ.ក-១៩) គឺនៅថ្ងៃទី ១៧ ខែកញ្ញា។
លោកស្រី បាន ស្រីមុំ បានកំណត់ទីតាំងចាក់វ៉ាក់សាំងនៅមន្ទីរពេទ្យបង្អែកខេត្តប៉ៃលិន មណ្ឌលសុខភាពផ្សារព្រំ មណ្ឌលសុខភាពភ្នំស្តង់ និងមណ្ឌលសុខភាពភ្នំព្រាល។
លោក អ៊ុំ រាត្រី ក៏បានសម្រេចកំណត់ទីតាំងចាក់នៅក្រុងសិរីសោភ័ណ ក្រុងប៉ោយប៉ែត ស្រុកអូរជ្រៅ ស្រុកមង្គលបុរី ស្រុកម៉ាឡៃ ស្រុកស្វាយចេក ស្រុកថ្មពួក ស្រុកភ្នំស្រុក និងស្រុកព្រះនេត្រព្រះ។
លោកស្រី មិថុនា ភូថង កំណត់យក សាខាកាកបាទក្រហមខេត្ត មណ្ឌលសុខភាពនាងកុក មណ្ឌលសុខភាពត្រពាំងរូង មណ្ឌលសុខភាពឫស្សីជ្រំមណ្ឌលសុខភាពអណ្តូងទឹក មណ្ឌលសុខភាពភ្ញីមាស និងសាលាបឋមសិក្សាបឹងព្រាវ។
លោក គួច ចំរើន កំណត់យក ក្រុងព្រះសីហនុ ក្រុងកោះរ៉ុង ស្រុកព្រៃនប់ ស្រុកស្ទឹងហាវ និងស្រុកកំពង់សីលា។
ស្ត្រីម្នាក់បានប្រាប់ថា៖ «ខ្ញុំបារម្ភពីសុវត្ថិភាពសុខភាពរបស់កូនខ្ញុំ ទើបពួកខ្ញុំសម្រេចចិត្តយកកូនទៅទទួលវ៉ាក់សាំងនេះ ដើម្បីការពារពីវីរុសកូវីដ-១៩ ហើយក៏ដើម្បីកូនបានចូលរៀននៅឯសាលាវិញដែរ។ កូនប្រុសខ្ញុំអាយុជាង ១១ ឆ្នាំ និងកូនស្រី ៦ ឆ្នាំជាងហើយ»។
អ្នកនាង អោម វ៉ាស្រីលីន អាយុ ៣២ ឆ្នាំរស់នៅខណ្ឌច្បារអំពៅ រាជធានីភ្នំពេញ បានប្រាប់ភ្នំពេញប៉ុស្តិ៍ថា នឹងនាំកូនប្រុស និងស្រីទាំង ២ ទៅចាក់វ៉ាក់សាំងតាមការជូនដំណឹងរបស់អាជ្ញាធរសង្កាត់ មិនខ្លាច ឬបារម្ភពីការប៉ះពាល់សុខភាពកូនៗនោះទេ។
អ្នកនាង វ៉ាស្រីលីន បានថ្លែងថា៖ «យើងមិនខ្លាច ឬបារម្ភពីការប៉ះពាល់សុខភាពកូនៗដោយសារវ៉ាក់សាំងរបស់ចិននោះទេ ប៉ុន្តែផ្ទុយមកវិញវ៉ាក់សាំងចិននេះនឹងជួយការពារសុខភាពកូនរបស់នាងពីការឆ្លងមេរោគនេះ»។
លោកនាយករដ្ឋមន្ត្រី ហ៊ុន សែន បានប្រកាសកាលពីថ្ងៃទី ១៥ ខែកញ្ញាថា យុទ្ធនាការចាក់វ៉ាក់សាំងកូវីដ ១៩សម្រាប់កុមារ អាយុពី ៦ ឆ្នាំដល់ក្រោម ១២ ឆ្នាំនេះនឹងត្រូវធ្វើក្នុងក្របខ័ណ្ឌទូទាំងប្រទេស និងថ្នាក់ជាតិចាប់ពីថ្ងៃទី ១៧ ខែកញ្ញា ដែលមានកុមារសរុបជាង ១ លាន ៨ សែននាក់។ ការចាក់វ៉ាក់សាំងដល់ក្រុមកុមារអាយុនេះ គឺដើម្បីផ្តល់លទ្ធភាពក្នុងការបើកសាលារៀនថ្នាក់បឋមសិក្សាឡើងវិញ ដូចគ្រឹះសា្ថនសិក្សាសាធារណៈ និងឯកជនជាច្រើននៅទូទាំងប្រទេសដែលបានចាប់ផ្តើមបើកសាលារៀនឡើងវិញបណ្តើរៗកាលពីថ្ងៃទី ១៥ ខែកញ្ញាផងដែរ៕
