.jpg)
សិស្សចូលរៀនវិញនៅវិទ្យាល័យព្រះស៊ីសុវត្តិ កាលពីថ្ងៃទី ១៥ ខែកញ្ញា។ ហុង មិនា
គ្រឹះស្ថានសិក្សាចំនួនជាង ២ ០០០ សាលា ត្រូវបានបើកដំណើរការឡើងវិញ ក្នុងរយៈពេល ៣ ថ្ងៃ ចាប់ពីថ្ងៃទី ១៥ ដល់ថ្ងៃទី ១៧ ខែកញ្ញា ដោយក្នុងនោះ រាជរដ្ឋាភិបាលផ្តល់អាទិភាពសម្រាប់កម្រិតថ្នាក់ទី ៩ និងទី ១២ ដែលជាកម្រិតត្រូវប្រឡង។ នេះបើតាមការថ្លែងឱ្យដឹងរបស់លោកនាយករដ្ឋមន្រ្តី ហ៊ុន សែន នាព្រឹកថ្ងៃទី ១៧ ខែកញ្ញានេះ។
លោកបានឱ្យដឹងថា ការបើកសាលាឡើងវិញ មានសាលាចំនួន ២ ៦៤១ សាលា ក្នុងនោះមានកម្រិតមតេយ្យសិក្សាចំនួន ១៥៣ សាលាបឋមសិក្សាចំនួន ១ ៥០០ អនុវិទ្យាល័យចំនួន ៧១៦ និងវិទ្យាល័យចំនួន ២៧២។
លោក ហ៊ុន សែន មានប្រសាសន៍ថា ៖ «ដំណើរការនៃការបើកសាលាឡើងវិញរបស់យើង ខ្ញុំសុំផ្តាំពីការបើកសាលាទៅដល់អាជ្ញាធរ រាជធានី-ខេត្តថា គ្រឹះស្ថានអាចបើកដំណើរការដោយការរៀនបណ្តុំមិនលើសពី ១៥ នាក់ ដោយគោរពតាមស្តង់ដារបស់ក្រសួងអប់រំ យុវជន និងកីឡា និងក្រសួងសុខាភិបាល»។
លោកនាយករដ្ឋមន្រ្តីបានបន្ថែមថា ត្រូវផ្តល់អាទិភាពក្នុងការបើកដំណើរការសាលានេះសម្រាប់ ថ្នាក់ទី ៩ និង ១២ ដែលជាថ្នាក់សម្រាប់ប្រឡង ប៉ុន្តែមិនទាន់កំណត់កាលបរិច្ឆេទនៃការប្រឡងនៅឡើយទេ។
លោក ហ៊ុន សែន ថា៖ «សុំបន្តរៀនអនឡាញសម្រាប់ភូមិសាស្ត្រដែលមានការឆ្លងច្រើន ហើយសុំឱ្យអាជ្ញាធរខេត្ត-រាជធានី ត្រូវបន្តប្រុងប្រយ័ត្ន និងតាមដានការរីករាលនៃជំងឺកូវីដ ១៩ ដើម្បីឈានទៅដល់ការទប់ស្កាត់ទាន់ពេលវេលា»៕
