បាត់ដំបងៈ ការប្រមូលទិន្នផលអាចម៍ប្រចៀវក្នុងរដូវវស្សានេះមានការធ្លាក់ចុះពី ៤០-៥០ ភាគរយ បើធៀបទៅនឹងរដូវប្រាំង ដោយសារស្ថានភាពនៃល្អាងសត្វប្រចៀវមានភាពរអិល និងក្លិនឆ្អេះខ្លាំងដែលងាយនឹងបង្កផលប៉ះពាល់ដល់សុខភាព និងអាយុជីវិត។ នេះបើតាមការអះអាងរបស់តំណាងសហគមន៍គ្រប់គ្រងល្អាងប្រចៀវភ្នំសំពៅ និងភ្នំរំសាយសក់ខេត្តបាត់ដំបង។
លោក ដាំ ឆាង ប្រធានសហគមន៍គ្រប់គ្រងល្អាងប្រចៀវភ្នំសំពៅបានប្រាប់ ភ្នំពេញ ប៉ុស្តិ៍ នៅថ្ងៃទី ១៥ ខែកញ្ញា ឆ្នាំនេះថា ដោយសារមានភ្លៀងធ្លាក់ខ្លាំងពេកក្រុមការងាររបស់សហគមន៍លោកមិនអាចចុះប្រមូលទិន្នផលអាចម៍ប្រចៀវពីក្នុងបាតល្អាងដូចមុនបានទេ ព្រោះការចូលទៅបាតល្អាងមានការប្រឈមគ្រោះថ្នាក់ដល់សុខភាព និងអាយុជីវិត។
លោកបានបញ្ជាក់ថា៖ «ក្រៅពីក្លិនឆ្អេះនៃអាចម៍ប្រចៀវដែលពិបាកនឹងទ្រាំនោះផ្លូវចុះទៅក្នុងល្អាងនៃសត្វប្រចៀវ គឺមានភាពងងឹតមានស្លែកាន់ជាប់នឹងថ្មភ្នំងាយរអិលដោយសារសំណើមទឹកភ្លៀង ដូច្នេះក្រុមការងារយើងមិនអាចចុះប្រមូលវា បានច្រើនដូចមុននោះទេ ព្រោះខ្លាចប៉ះពាល់សុខភាព និងគ្រោះថ្នាក់ដល់ជីវិត»។
យ៉ាងណាក្ដី ក្រុមការងាររបស់លោកនៅតែមិនបោះបង់ការចុះប្រមូលទិន្នផលអាចម៍ប្រចៀវតាមពេលកំណត់ ២ ដងក្នុង ១ ខែ។ លោក ឆាង បានថ្លែងថា៖ «បច្ចុប្បន្នក្រុមការងារយើងចុះប្រមូលទិន្នផលអាចម៍ប្រចៀវបានប្រមាណពី ១,៥ តោនទៅ ២ តោនប៉ុណ្ណោះក្នុង ១ លើក គឺថយចុះប្រមាណពី ៤០-៥០ ភាគរយបើធៀបទៅនឹងការប្រមូលផលក្នុងរដូវប្រាំង»។
បើតាមលោក ឆាង ទោះបីជាការប្រមូលទិន្នផលអាចម៍ប្រចៀវបានតិចជាងមុនក្ដី ក៏ការលក់អាចម៍ប្រចៀវដល់អ្នកយកទៅប្រើប្រាស់ក្នុងវិស័យដាំដុះមិនឡើងថ្លៃដែរ ពោលគឺនៅតែរក្សាតម្លៃ ២៥ ០០០ រៀល ក្នុង ១ ការុងទម្ងន់ ១៥ គីឡូក្រាមដដែល។
ចំណែក លោក រឿត សាវន ដែលជាសមាជិកសកម្មម្នាក់នៃសហគមន៍គ្រប់គ្រងល្អាងប្រចៀវភ្នំសំពៅបានឱ្យដឹងដែរថា កាលពីខែមិថុនាកន្លងទៅ សត្វប្រចៀវប្រមាណជាង ២ លានក្បាល បានងាប់ដោយសារមានសត្វសង្កើចខាំ និងការលួចដាក់មងចាប់សម្លាប់យកសាច់លក់ធ្វើជាម្ហូបដោយខុសច្បាប់។
លោក សាវន បានថ្លែងថា៖ «យើងពិតជាសោកស្ដាយនៅពេលប្រទះឃើញគេលក់សាច់សត្វប្រចៀវនៅក្នុងតំបន់ទេសចរណ៍នៃស្រុកឯកភ្នំ និងស្រុកសង្កែក្នុងតម្លៃ ៧ ០០០ រៀលក្នុងប្រចៀវ ១ ផ្លូន (៤០ ក្បាល) ហើយយើងរឹតតែស្លុតចិត្តទៀតនៅពេលឮអ្នកលក់អះអាងថា ១ យប់គេអាចដាក់មងចាប់សត្វប្រចៀវបានរហូតដល់ ៣-៤ ផ្លូន»។
យ៉ាងណាក៏ដោយ ក្រោយពីមានការជួយអន្តរាគមន៍ពីអាជ្ញាធរមូលដ្ឋាន និងមន្ត្រីអភិរក្សបរិស្ថាន ករណីដាក់មងចាប់សត្វប្រចៀវនេះបានស្ងប់ស្ងាត់ទៅវិញ។ នេះបើតាមសម្ដីលោក សាវន។
ទន្ទឹមនឹងនេះ លោកបានប្រាប់ឱ្យដឹងទៀតថា ដោយសារមានការផ្ដល់យោបល់ពីមន្ត្រីជំនាញ ក្រុមការងារក្នុងសហគមន៍របស់លោកបានទិញថ្នាំសម្លាប់សត្វសង្កើចបាញ់ចូលទៅក្នុងល្អាង ដើម្បីបណ្ដេញសង្កើចចេញ ហើយបច្ចុប្បន្នសត្វប្រចៀវក្នុងល្អាងភ្នំសំពៅទាំង ២ ទីតាំង គឺល្អាងខាងកើត និងខាងលិចមានចំនួនប្រមាណ ១០ លានក្បាល។
ស្រដៀងគ្នានេះ លោក លន់ គឹមលឿន ប្រធានសហគមន៍ភ្នំរំសាយសក់ដែលធ្វើការអភិរក្សល្អាងសត្វប្រចៀវ ១ កន្លែងនៅភ្នំចាក់អង្កាមបានប្រាប់ភ្នំពេញប៉ុស្តិ៍ថា ពេលនេះក្រុមការងារប្រមូលទិន្នផលអាចម៍ប្រចៀវក្នុងសហគមន៍លោកបានផ្អាកសកម្មភាពប្រមូលអាចម៍ប្រចៀវជាបណ្ដោះអាសន្ន ដោយសារមានភ្លៀងធ្លាក់ច្រើនធ្វើឱ្យផ្លូវចុះទៅក្នុងល្អាងប្រចៀវរអិលខ្លាំង និងមានក្លិនឆ្អេះខ្លាំងពេក។
លោកថ្លែងថា៖ «ជាទូទៅក្រុមការងារយើងចុះប្រមូលទិន្នផលអាចម៍ប្រចៀវរៀងរាល់ ១ ខែកន្លះម្ដង លើកលែងតែក្នុងរដូវភ្លៀងធ្លាក់អាចត្រូវពន្យារពេលទៅដល់ ២ ខែ ឬ ៣ ខែម្ដង ព្រោះដើម្បីការពារសុខភាព និងការពារគ្រោះថ្នាក់ដល់អាយុជីវិត»។
បើតាមលោក គឹម លឿន ការប្រមូលផលអាចម៍ប្រចៀវក្នុង ១ លើកៗក្រុមការងាររបស់លោកប្រមូលបានចន្លោះពី ១៧ ទៅ ២០ តោន ហើយអាចម៍ប្រចៀវក្នុង ១ ការុងទម្ងន់ ១៧ គីឡូក្រាម សហគមន៍លក់បានក្នុងតម្លៃពី ២៥ ០០០ រៀលទៅ ៣០ ០០០ រៀល។
លោកថា ថវិកាដែលលក់បានគឺត្រូវបែងចែកដល់មន្ត្រីមានសមត្ថកិច្ចនៃអង្គភាពពាក់ព័ន្ធចំនួន ៩ នាក់ ដែលបានយាមប្រចាំការ ២៤ ម៉ោងក្នុងតំបន់ជួរភ្នំរំសាយសក់ចំនួន ៤៥ ភាគរយ និង ៣០ ភាគរយបែងចែកដល់ក្រុមការងារសហគមន៍ចំនួន ១០ នាក់ ដែលជាអ្នកចុះប្រមូលអាចម៍ប្រចៀវផ្ទាល់ ហើយនៅសល់ ២៥ ភាគរយ គឺត្រូវដាក់បញ្ចូលទៅក្នុងបេឡារបស់សហគមន៍សម្រាប់ជួយដល់គ្រួសារក្រីក្រ៕
វីដេអូ៖