បេឡាជាតិរបបសន្តិសុខសង្គម (ប.ស.ស.) បានផ្តល់ទឹកប្រាក់វិភាជន៍បូជាសពចំនួន ១០ លានរៀល ជូនក្រុមគ្រួសារសពសមាជិក ប.ស.ស. ជាមន្ត្រីរាជការ ដែលបានបាត់បង់ជីវិតដោយសារគ្រោះថ្នាក់ការងារ ដែលនេះជាលើកទី ១ បន្ទាប់ពី ប.ស.ស. បានដាក់ឱ្យដំណើរការរបបសន្តិសុខសង្គមផ្នែកហានិភ័យការងារសម្រាប់មន្ត្រីរាជការសាធារណៈកាលពីដើមខែមករា ឆ្នាំ ២០២១ កន្លងទៅ។
យោងតាមបេឡាជាតិរបបសន្តិសុខសង្គម (ប.ស.ស.) បានឱ្យដឹងថា នៅព្រឹកថ្ងៃទី ១៦ ខែកញ្ញា ប.ស.ស. បានបើកផ្តល់ជូនប្រាក់វិភាជន៍បូជាសពចំនួន ១០ លានរៀលជូនដល់ក្រុមគ្រួសារសពសមាជិក ប.ស.ស. ជាមន្ត្រីរាជការសាធារណៈ។
ប្រភពដដែលបានលើកឡើងថា៖ «នេះជាលើកដំបូងហើយ ដែលបេឡាជាតិសន្តិសុខសង្គមបានបើកផ្តល់ជូនប្រាក់វិភាជន៍បូជាសពជូនដល់សមាជិករបស់ខ្លួនជាមន្ត្រីរាជការសាធារណៈ ដែលបានគ្រោះថ្នាក់ការងាររហូតបាត់បង់ជីវិត បន្ទាប់ពី ប.ស.ស. បានដាក់ឱ្យដំណើរការរបបសន្តិសុខសង្គមផ្នែកហានិភ័យការងារសម្រាប់មន្ត្រីរាជការសាធារណៈ កាលពីដើមខែមករាឆ្នាំនេះ»។
លោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. បានឱ្យដឹងថា នេះជាការយកចិត្តទុកដាក់ខ្ពស់បំផុត ពីសំណាក់រាជរដ្ឋាភិបាលកម្ពុជា តែងតែងគិតគូរដល់សុខុមាលភាព និងជីវភាពរស់នៅរបស់ប្រជាពលរដ្ឋ ពិសេសបងប្អូនកម្មករនិយោជិត និងមន្ត្រីរាជការសាធារណៈផងដែរ៕