.jpg)
កម្មករចេញពីធ្វើការក្នុងរោងចក្រ ១ កន្លែង ក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ កាលពីថ្ងៃទី ១៨ មីនា។ ហេង ជីវ័ន
ភ្នំពេញៈ ក្រសួងការងារប្រកាសប្រាប់ម្ចាស់រោងចក្រ សហគ្រាល «ត្រូវ» អនុញ្ញាតឱ្យកម្មកររោងចក្រឈប់សម្រាកដោយទទួលបានប្រាក់ឈ្នួលសម្រាកក្នុងពិធីបុណ្យភ្ជុំបិណ្ឌរយៈពេល ៣ ថ្ងៃ ហើយកម្មករដែលធ្វើការក្នុងថ្ងៃឈប់សម្រាកនេះត្រូវទទួលបានប្រាក់បំណាច់បន្ថែម។
ក្រសួងការងារបញ្ជាក់ក្នុងសេចក្តីជូនដំណឹងនៅថ្ងៃទី ១៧ ខែកញ្ញាថា៖ «សូមជម្រាបជូនដល់ ម្ចាស់ ឬនាយករោងចក្រ សហគ្រាសទាំងអស់ ដែលស្ថិតក្នុងដែនអនុវត្តនៃច្បាប់ស្តីពីការងារត្រូវអនុញ្ញាតឱ្យកម្មករនិយោជិតទាំងអស់របស់ខ្លួនឈប់សម្រាកដោយមានប្រាក់ឈ្នួលក្នុងពិធីបុណ្យភ្ជុំបិណ្ឌខាងមុខនេះ»។
ពិធីបុណ្យភ្ជុំបិណ្ឌនឹងត្រូវប្រារព្ធធ្វើឡើងរយៈពេល ៣ ថ្ងៃ ចាប់ពីថ្ងៃទី ៥ ដល់ថ្ងៃទី ៧ ខែតុលា។
ក្រសួងការងារបញ្ជាក់ថា ម្ចាស់រោងចក្រ សហគ្រាស អាចពិភាក្សាជាមួយតំណាងកម្មករដើម្បីផ្លាស់ប្តូរការឈប់សម្រាកនេះនៅពេលណាមួយផ្សេងទៀត ក្នុងករណីមានការព្រមព្រៀងពីកម្មករ។
ក្រសួងបញ្ជាក់ថា រោងចក្រ សហគ្រាសដែលមានអាជីវកម្មជាលក្ខណៈសកលហើយត្រូវដំណើរការជាប្រចាំ ហើយការឈប់សម្រាកបុណ្យរបស់កម្មករព្រមគ្នាក្នុងពេលតែមួយដែលធ្វើឱ្យខូចដំណើរការរបស់រោងចក្រ ម្ចាស់រោងចក្រត្រូវបែងចែកឱ្យកម្មករបានឈប់សម្រាកទៅតាមថ្ងៃបុណ្យនីមួយៗដោយផ្លាស់ប្តូរគ្នា ហើយរក្សាទុកបញ្ជីបែងចែកនោះជាប្រចាំសម្រាប់ការត្រួតពិនិត្យរបស់អធិការការងាររបស់ក្រសួង។
ក្រសួងបញ្ជាក់ថា៖ «កម្មករនិយោជិតដែលធ្វើការថ្ងៃឈប់បុណ្យភ្ជុំបិណ្ឌនេះ មានសិទ្ធិទទួលនូវប្រាក់បំណាច់បន្ថែមដែលមានចំនួនស្មើនឹងប្រាក់ឈ្នួលថ្ងៃធ្វើការធម្មតា»។
ក្រសួងអំពាវនាវដល់កម្មករដែលឈប់សម្រាកអនុវត្តតាមសេចក្តីណែនាំរបស់ក្រសួងសុខាភិបាលស្តីពីការការពារការចម្លងវីរុសកូវីដ ១៩ និងការពុលចំណីអាហារក្នុងអំឡុងពិធីបុណ្យកាន់បិណ្ឌ និងភ្ជុំបិណ្ឌ និងវិធានសុខាភិបាល៕
វីដេអូ៖
