.jpg)
គ្រូពេទ្យបូមវ៉ាក់សាំងប្រភេទស៊ីណូវ៉ាក់ចាក់ជូនប្រជាពលរដ្ឋនៅសង្កាត់កាកាប ខណ្ឌពោធិ៍សែនជ័យ កាលពីថ្ងៃទី ១៦ មិថុនា។ ហេង ជីវ័ន
លោកនាយករដ្ឋមន្ត្រី ហ៊ុន សែន បានថ្លែងថា លោកនៅតែបន្តឱ្យគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសពិនិត្យ និងត្រូវយកនូវស្តង់ដាមួយថា «បើចាក់វ៉ាក់សាំងដូសទី១ ទី២ ហើយត្រូវតែមានដូសទី៣»។
លោក ហ៊ុន សែន បានស្នើឡើងដូចនេះក្នុងពេលបើកយុទ្ធនាការចាក់វ៉ាក់សាំងកូវីដ ១៩ ដល់កុមារអាយុ ៦ ឆ្នាំដល់ក្រោម ១២ ឆ្នាំ នាព្រឹកថ្ងៃទី ១៧ ខែកញ្ញានេះ។
លោកមានប្រសាសន៍ថា៖ «យើងត្រូវយកស្តង់ដានេះ បើមិនដូច្នេះទេវានឹងមិនមានភាពស៊ាំនៅក្នុងសហគមន៍»។
ជាមួយគ្នានេះដែរ លោក ហ៊ុន សែន ក៏ស្នើសុំប្រជាពលរដ្ឋកុំទិញប្រដាប់ធ្វើតេស្តរកអង់ទីក័រការពារវីរុសកូវីដ ១៩ ហើយអង់ទីក័រនេះក៏អាស្រ័យលើមនុស្សផងដែរ ដែលអ្នកខ្លះមានអង់ទីក័រច្រើន អ្នកខ្លះមានតិច និងអ្នកខ្លះមិនមានទេ។
លោកថា៖ «ប៉ុន្តែយើងចាក់វ៉ាក់សាំងប្រសើរជាងមិនចាក់។ ពេទ្យបានជួសឈាមខ្ញុំយកទៅរកអង់ទីក័រ ប៉ុន្តែឃើញថាខ្ញុំមានតិច។ ខ្ញុំបានចាក់ដូសទី៣ រួចហើយ បានរយៈពេល ៧២ ម៉ោងហើយដែរ»៕
