រដ្ឋមន្រ្តីក្រសួងអប់រំ យុវជន និងកីឡា លោក ហង់ជួន ណារ៉ុន បានសម្រេចធ្វើការផ្អាកដំណើរការថ្នាក់រៀនមួយចំនួនជាបណ្តោះអាសន្ន ១៤ ថ្ងៃ នៅក្នុងសាលាចំនួន ៥ និងតម្រូវឱ្យអ្នកពាក់ព័ន្ធផ្ទាល់ធ្វើចត្តាឡីស័កឱ្យបានត្រឹមត្រូវ។
យោងតាមលិខិតផ្ញើជូនប្រធានមន្ទីរអប់រំ យុវជន និងកីឡារាជធានីភ្នំពេញ ដែលចុះហត្ថលេខាដោយលោក ហង់ជួន ណារ៉ុន នៅថ្ងៃទី ១៧ ខែកញ្ញានេះ បានឱ្យដឹងថា ៖ «ខ្ញុំសូមជម្រាប លោកប្រធានថា ដោយចូលរួមទប់ស្កាត់ ការរីករាលដាលនៃជំងឺកូវីដ ១៩ ក្រសួងសម្រេចផ្អាកដំណើរការថ្នាក់រៀន នៅតាមគ្រឹះស្ថានសិក្សាចំនួន ៥ រយៈពេល ១៤ ថ្ងៃ និងធ្វើចត្តាឡីស័កអ្នកពាក់ព័ន្ធផ្ទាល់»។
គ្រឹះស្ថានសិក្សាទាំងនោះរួមមាន វិទ្យាល័យ ហ៊ុនសែន ពញាពន់ (ថ្នាក់ 9B), វិទ្យាល័យបឹងប្រិយ៍ (ថ្នាក់ 12A I, 9CI, 9DI), វិទ្យាល័យបឹងធំ (ថ្នាក់ 7A2), វិទ្យាល័យវត្តភ្នំ (ថ្នាក់ 9H2, 9D2, 9B2, 9BI, 9H2, 12C2, I2B2, 12H2) និងវិទ្យាល័យវត្តកោះ (ថ្នាក់ 7F)។
លោករដ្ឋមន្រ្តីបានបញ្ជាក់ទៀតថា ចំពោះថ្នាក់ដទៃទៀតត្រូវបន្តដំណើរការជាធម្មតា ប៉ុន្តែត្រូវធ្វើការរឹតត្បិតការចេញលេង និងបន្តពាក់ម៉ាស់ និងលាងដៃជាប្រចាំ។
លោក ហង់ជួន ណារ៉ុន បានលើកឡើងថា៖ «មិនអនុញ្ញាតឱ្យមានការទាក់ទង ពីសិស្សថ្នាក់មួយទៅថ្នាក់មួយទៀតទេ ហើយមិនអនុញ្ញាតឱ្យមានការជួបជុំ ឬប្រជុំក្រៅពីការសិក្សាក្នុងសាលារៀនឡើយ»។
លោក ឃួង ស្រេង អភិបាលរាជធានីភ្នំពេញ ធ្លាប់បានលើកឡើងកាលពីថ្ងៃទី ១៥ ខែកញ្ញាថា សាលារាជធានីភ្នំពេញ នឹងធ្វើការសម្រេចបិទផ្អាកជាបណ្តោះអាសន្ននូវសាលា ឬថ្នាក់ណាដែលមានអ្នកឆ្លងវីរុសកូវីដ ១៩ ចាប់ពីក្រោម ១០ ភាគរយ នៃចំនួនសិស្សក្នុងថ្នាក់ដើម្បីបង្ការការរីករាលដាលនៃមេរោគកូវីដ ១៩៕
វីដេអូ៖