.jpg)
បុរសម្នាក់ទទួលបានការចាក់វ៉ាក់សាំងនៅមន្ទីរពេទ្យព្រះអង្គឌួង កាលពីថ្ងៃទី ១ មិនា។ ហុង មិនា
រាជធានីភ្នំពេញ និងខេត្តកណ្តាលនឹងត្រូវចាប់ផ្តើមចាក់វ៉ាក់សាំងកូវីដ ១៩ ដូសជំរុញទៅដល់ប្រជាពលរដ្ឋទូទៅដែលមានអាយុចាប់ពី ១៨ ឆ្នាំឡើង មុនគេចាប់ពីខែតុលាខាងមុខនេះទៅ។ នេះបើតាមការលើកឡើងរបស់លោកនាយករដ្ឋមន្ត្រី ហ៊ុន សែន នាព្រឹកថ្ងៃទី ១៧ ខែកញ្ញានេះ។
លោក ហ៊ុន សែន បានឱ្យដឹងថា សម្រាប់ខេត្តផ្សេងទៀតនឹងបន្តចាក់ជាបន្តបន្ទាប់ផងដែរ ដោយសារការចាក់នេះត្រូវគិតពីចន្លោះ ៤ ទៅ ៦ ខែ។ ដូចនេះ កម្ពុជាមិនត្រូវការវ៉ាក់សាំងគំហុកនោះទេ គឺត្រូវរុញទៅតាមដំណាក់កាលៗ។
លោកមានប្រសាសន៍ថា៖ «យើងត្រូវមានប្រតិទិនជាក់លាក់តាំងពីថ្នាក់ខេត្តរហូតមកដល់ថ្នាក់ជាតិ ដើម្បីយើងចាត់ចែងការបញ្ជូនវ៉ាក់សាំងទៅកាន់ខេត្ត ឬទីតាំងនោះ»។
ជាមួយគ្នានេះដែរ លោកនាយករដ្ឋមន្ត្រីក៏បានលើកឡើងផងដែរថា មិនមែនតែប្រទេសកម្ពុជានោះទេដែលបានចាក់វ៉ាក់សាំងសម្រាប់កុមារ ប៉ុន្តែក៏មានប្រទេសមួយចំនួនទៀតក៏បានធ្វើរួចហើយផងដែរដូចជា ប្រទេសចិន គុយបា អារ៉ាប់រួម ប៉េរ៉ូ អាសាល់វ៉ាឌ័រ អាល្លឺម៉ង់ បារ៉ែន ហើយប្រទេសអាមេរិក និងប្រទេសអ៊ីស្រាអែលកំពុងរៀបចំសិក្សាពីការចាក់វ៉ាក់សាំងកូវីដ ១៩ ទៅដល់កុមារនេះផងដែរ។
លោក ហ៊ុន សែន បានថ្លែងថា៖ «យើងត្រូវធ្វើការបោះជំហានទៅមុន ការពារកុមាររបស់យើង ការពារកូនចៅយើងឱ្យពួកគេរស់រានមានជីវិតឱ្យពួកគេទទួលបានការថែទាំសុខភាពពីសំណាក់យើងជាមនុស្សចាស់ និងឱ្យពួកគេបានចូលសាលាដោយមានសុវត្ថិភាពទាំងគ្រូទាំងសិស្ស»៕
