លោកនាយករដ្ឋមន្ត្រី ហ៊ុន សែន បានលើកឡើងថា លោកនៅបន្តធ្វើការតាមដានលើប្រសិទ្ធភាពនៃវ៉ាក់សាំង និងការអនុវត្តជាក់ស្តែងរបស់ពិភពលោក ថាតើការចាក់វ៉ាក់សាំងកូវីដ ១៩ ដូសទី៤ អាចនឹងតម្រូវឱ្យចាក់ឬអត់។
លោក ហ៊ុន សែន បានថ្លែងនៅក្នុងពេលបើកយុទ្ធនាការចាក់វ៉ាក់សាំងកូវីដ ១៩ សម្រាប់កុមារអាយុពី ០៦ ឆ្នាំដល់ក្រោម ១២ ឆ្នាំនាព្រឹកថ្ងៃទី ១៧ ខែកញ្ញាថា ការចាក់វ៉ាក់សាំងកូវីដ ១៩ ដូសទី៤ អាចនឹងត្រូវចាក់ ឬមិនចាក់ អាស្រ័យលើការវិវត្តរបស់វីរុសកូវីដ ១៩ និងប្រសិទ្ធភាពរបស់វ៉ាក់សាំង។
លោកមានប្រសាសន៍ថា៖ «យើងត្រូវតាមដានលើការងារនេះ ដោយការអនុវត្តជាក់ស្តែងរបស់ពិភពលោកជាមួយនឹងប្រសិទ្ធភាពវ៉ាក់សាំងដែលត្រូវបន្ត ផ្គួបផ្សំជាមួយនឹងការណែនាំពីអង្គការសុខភាពពិភពលោកផងដែរ។ ខ្ញុំបានដឹងថាមិត្តភក្តិបរទេសរបស់យើងមួយចំនួនបានដើរទៅដល់ដូសទី៤ រួចស្រេចទៅហើយ ប៉ុន្តែខ្ញុំសុំមិនបញ្ចេញថា តើជាប្រទេសណានោះទេ»។
លោក ហ៊ុន សែន បានបន្ថែមថា ប្រសិនបើមានតម្រូវការចាក់ដូសទី៤ មែន គឺតម្រូវឱ្យរដ្ឋាភិបាលត្រូវចំណាយលុយបន្តទៀតក្នុងការទិញវ៉ាក់សាំងសម្រាប់ចាក់ទៅដល់ប្រជាពលរដ្ឋ ដែលនេះជាករណីមួយដែលលោកចៀសមិនបាន ប៉ុន្តែបញ្ហានេះទាមទារឱ្យមានការសិក្សាការវិវត្តនាពេលខាងមុខទៀត។
ទន្ទឹមនឹងនេះដែរ លោកនាយករដ្ឋមន្ត្រីបានឱ្យដឹងដែរថា ប្រសិនបើសភាពការណ៍នៃស្ថានភាពរបស់វីរុសកូវីដ វិលមកជាល្អវិញ លោកនឹងសម្រេចឱ្យបើកដំណើរការអាជីវកម្ម ឬការងារផ្សេងៗទៀតទាំងអស់ឡើងវិញ។
លោកថា៖ «គ្មានអ្នកណាចង់ឱ្យមានការបិទដូចនេះទេ សព្វថ្ងៃពលរដ្ឋរបស់យើងចង់ដើរលេង។ ជាដំបូងខ្ញុំចង់ឱ្យចាប់ផ្តើមបើកមុនគេគឺវិស័យអប់រំ បន្ទាប់មកនឹងបើកវិស័យសេវា ដោយយើងចង់ធ្វើ ២ ជំហាន គឺជំហានទី១ ការបើកឡើងវិញនូវទេសចរណ៍ក្នុងស្រុក ដោយសារប្រជាពលរដ្ឋក៏មានតម្រូវការដើរកម្សាន្តថ្ងៃសៅរ៍ អាទិត្យ និងថ្ងៃបុណ្យ»៕
វីដេអូ៖