លោកនាយករដ្ឋមន្រ្តី ហ៊ុន សែន បានស្នើឱ្យគណៈកម្មការចំពោះកិច្ចចាក់វ៉ា់ក់សាំងកូវីដ ១៩ ក្នុងក្របខ័ណ្ឌទូទាំងប្រទេស និងក្រុមជំនាញវេជ្ជសាស្រ្តជាន់ខ្ពស់ធ្វើការសិក្សាបន្ថែមលើលទ្ធភាពចាក់វ៉ាក់សាំងចំពោះកុមារដែលមានអាយុពី ៣ ឆ្នាំទៅ ៦ ឆ្នាំ ដែលមានចំនួន ៩១៥ ០៤៦ នាក់។
លោកបានលើកឡើងដូចនេះនាព្រឹកថ្ងៃទី ១៧ ខែកញ្ញា ឆ្នាំ ២០២១ ថា គណៈកម្មការចំពោះកិច្ចចាក់វ៉ា់ក់សាំងកូវីដ ១៩ ក្នុងក្របខ័ណ្ឌទូទាំងប្រទេស និងក្រុមជំនាញវេជ្ជសាស្រ្តជាន់ខ្ពស់ ត្រូវរាយការណ៍ឱ្យលោក ពេលធ្វើការសិក្សារួចរាល់។
លោកមានប្រសាសន៍ថា ៖ «នេះជាកិច្ចទី១ ដែលនឹងត្រូវធ្វើនាពេលខាងមុខនេះ ហើយការងារនេះក៏ចាត់ទុកបានប្រគល់ទៅឱ្យគណៈកម្មការចំពោះកិច្ចចាក់វ៉ា់ក់សាំងកូវីដ ១៩ និងអ្នកជំនាញជាន់ខ្ពស់ធ្វើកិច្ចការនេះផងដែរ ដែលអាចនឹងត្រូវប្រើប្រាស់វ៉ាក់សាំងប្រមាណជា ២ លានដូស»។
លោក ហ៊ុន សែន ថា ការចាក់វ៉ាក់សាំងទៅដល់កុមារអាយុនេះគឺដើម្បីបានពួកគេទៅសិក្សានៅថ្នាក់កម្រិតមតេ្តយ្យបានដូចក្មេងធំៗដែរ។
ជាមួយគ្នានេះដែរ លោកក៏បានលើកឡើងស្ថានភាពនៃអ្នកជំងឺដែលមានស្ថានភាពធ្ងន់ធ្ងរដែលតម្រូវឱ្យសម្រាកព្យាបាលនៅមន្ទីរពេទ្យមានការថយចុះបន្ទាប់ពីមានការចាក់វ៉ាក់សំាងបានច្រើន។
លោកបានថ្លែងថា ការព្យាបាលមាន ៣ បែប គឺការព្យាបាលនៅមន្ទីរពេទ្យ ការព្យាបាលនៅតាមតំបន់ដែលបានរៀបចំ និងការសម្រាកព្យាបាលនៅតាមផ្ទះ។
លោកថា ៖ «យើងនៅតែលើកទឹកចិត្តឱ្យមានការសម្រាកព្យាបាលតាមផ្ទះ ប៉ុន្តែយើងក៏នៅតែបន្តឱ្យធ្វើការព្យាបាលនៅតាមតំបន់ទាំងនោះ ដោយសារតែអ្នកខ្លះមិនមានលទ្ធភាពព្យាបាលនៅផ្ទះ ដែលមានទំហំតូច»។
ដោយឡែក ក្នុងឱកាសនេះផងដែរ លោក ហ៊ុន សែន ក៏បានលើកឡើងពីគម្រោងនៃការពិភាក្សាជាមួយមិត្តចិនឱ្យនិស្សិតកម្ពុជា បានត្រឡប់ទៅរៀននៅប្រទេសចិនវិញ។
លោក ហ៊ុន សែន បានមានប្រសាសន៍ថា ៖ «សុំឱ្យលោក ហង់ជួន ណារ៉ុន ធ្វើការពិភាក្សាជាមួយមិត្តចិនដើម្បីឱ្យពួកនិស្សិតរបស់យើងបានវិលត្រលប់ទៅរៀនផ្ទាល់នៅប្រទេសចិនវិញ»៕