លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានបញ្ជាឱ្យអភិបាលរាជធានីភ្នំពេញ លោក ឃួង ស្រេង ត្រូវយកចិត្តទុកដាក់ទៅលើកម្មករធ្វើការក្នុងវិស័យសេដ្ឋកិច្ចក្រៅប្រព័ន្ធ និងអ្នកដឹកអីវ៉ាន់អនឡាញ ដែលពួកគាត់ត្រូវមានអាទិភាពក្នុងការទទួលបានការចាក់ដូសជំរុញនេះ។
លោកបានថ្លែងនាព្រឹកថ្ងៃទី ១៧ ខែកញ្ញាថា៖ «ដូសទី៣ ត្រូវតែជាដូសផ្តល់អាទិភាពសម្រាប់អ្នកដែលមានហានិភ័យដែលអាចឆ្លង និងចម្លងឱ្យអ្នកដទៃ។ និយាយរួមយើងមិនខ្វះវ៉ាក់សាំងសម្រាប់ចាក់ទេហើយយើងក៏មិនរវល់ច្រើនដែរ ដោយសារយើងចាក់តែម្តងប៉ុណ្ណោះ»។
ជាមួយគ្នានេះ លោកក៏បានឱ្យគណៈកម្មការចំពោះកិច្ចទទួលបន្ទុកលទ្ធកម្មវ៉ាក់សាំងបង្ការកូវីដ ១៩ សម្របសម្រួលទទួលជាជំនួយ ឬទិញបន្ថែម ដើម្បីបង្គ្រប់នូវតម្រូវការយុទ្ធនាការទាំង ២ គឺយុទ្ធនាការចាក់វ៉ាក់សាំងលើកុមារអាយុ ៦ ឆ្នាំ ដល់ក្រោម ១២ ឆ្នាំ និងដូសជំរុញដល់ប្រជាជនទូទៅដែលមានអាយុ ១៨ ឆ្នាំឡើង។
លោក ហ៊ុន សែន មានប្រសាសន៍ថា៖ «ត្រូវធ្វើការពិនិត្យមើលនូវតម្រូវការវ៉ាក់សាំងរបស់យើង។ បើចាក់អស់ ១៣ លានដូស យើងត្រូវតែមានថែម ១៣ លាន ហើយយើងក៏ត្រៀមសម្រាប់ការខូចខាតផងដែរ»។
លោក ហ៊ុន សែន ថា វ៉ាក់សាំងជាមរតករួមរបស់ប្រទេសជាតិ ជាពិសេសគឺជាមរតកដ៏មានតម្លៃរបស់ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រមទាំងរាជរដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជា និងជាមរតករួមរបស់ប្រទេសជាតិ។
លោកមានប្រសាសន៍ថា៖ «ប្រសិនបើយើងសម្រេចបានការចាក់វ៉ាក់សាំងនេះរួច នៅក្នុងដំណាក់នេះ យើងអាចទៅផុតសិង្ហបុរី លើយុទ្ធនាការចាក់វ៉ាក់សាំងកូវីដ ១៩ ដល់កុមារ ខណៈប្រទេសសិង្ហបុរី នឹងចាក់នៅចុងឆ្នាំនេះ។ នៅក្នុងបណ្តាប្រទេសតំបន់អាស៊ាន យើងអាចចាក់វ៉ាក់សាំងដល់កុមារមានអាយុ៦ឆ្នាំ ដល់អាយុ ១២ ឆ្នាំ មុនគេ»។
នាពេលនោះ លោកនាយករដ្ឋមន្ត្រីក៏បានបញ្ជាក់ទាក់ទងសិស្សានុសិស្សដែលបាត់កាតចាក់វ៉ាក់សាំងដែរ ដោយលោកបានស្នើឱ្យលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ពិនិត្យមើលករណីដោយសម្រួលឱ្យសិស្សានុសិស្សដែលបាត់កាតចាក់វ៉ាក់សាំងបានចូលសិក្សាធម្មតា៕