សៀមរាបៈ អាជ្ញាធរខេត្តសៀមរាបដាក់ភូមិចំនួន ៣ និងសង្កាត់ចំនួន ៤ ក្នុងក្រុងសៀមរាប ជាតំបន់ក្រហម និងបានបិទខ្ទប់តំបន់ទាំងនោះរយៈពេល ១ សប្តាហ៍ចាប់ពីថ្ងៃទី ១៧ ដល់ថ្ងៃទី ២៣ ខែកញ្ញា ដើម្បីទប់ស្កាត់ជំងឺកូវីដ ១៩ មិនឱ្យឆ្លងរាលដាលទៅតំបន់ផ្សេងទៀត។
តំបន់ទាំងនោះរួមមាន សង្កាត់ស្លក្រាម សង្កាត់ស្វាយដង្គំ សង្កាត់គោកចក សង្កាត់ជ្រាវ ភូមិតាវៀនស្ថិតក្នុងសង្កាត់សាលាកំរើក និងភូមិព្រៃធំ និងភូមិស្រង៉ែស្ថិតក្នុងសង្កាត់ស្រង៉ែ។
សេចក្តីសម្រេចរដ្ឋបាលខេត្តសៀមរាបបញ្ជាក់នៅថ្ងៃទី ១៧ ខែកញ្ញា ថា បុគ្គលគ្រប់រូបត្រូវបានហាមឃាត់មិនឱ្យធ្វើដំណើរចេញពីលំនៅឋាន និងធ្វើសកម្មភាពកីឡានៅក្រៅលំនៅឋាន ហើយក្នុងករណីបំពានបម្រាម អាជ្ញាធរត្រូវអនុវត្តវិធានការច្បាប់ «យ៉ាងម៉ឺងម៉ាត់» និងឃាត់ទុកជាបណ្តោះអាសន្ននូវមធ្យោបាយធ្វើដំណើរ។
ផ្សារ និងទីកន្លែងលក់ម្ហូបអាហារ និងគ្រឿងឧបភោគបរិភោគ សកម្មភាពការងារ មុខរបរ និងអាជីវកម្មទាំងអស់នៅក្នុងតំបន់ក្រហមត្រូវផ្អាកជាបណ្តោះអាសន្ន។
សេចក្តីសម្រេចបញ្ជាក់ថា៖ «រាល់ការជួបជុំ ឬការប្រមូលផ្តុំមនុស្សជាលក្ខណៈឯកជន និងការជួបជុំ ឬការប្រមូលផ្តុំមនុស្ស ដើម្បីសេពគ្រឿងស្រវឹងគ្រប់ប្រភេទ និងការចាក់ឧបករណ៍បំពងសំឡេង ការច្រៀង ឬរាំកម្សាន្ត ត្រូវបានហាមឃាត់»។
ការធ្វើដំណើរឆ្លងកាត់ពីភូមិមួយទៅភូមិមួយ និងពីសង្កាត់មួយទៅសង្កាត់មួយក្នុង ក្រុងសៀមរាប ក៏ត្រូវបានហាមឃាត់ផងដែរ៕