ភ្នំពេញ៖ អាជ្ញាធររឹបអូសទំនិញខូចគុណភាព និងហួសកាលបរិច្ឆេទប្រើប្រាស់ជាង ៥០០ គីឡូក្រាមបន្ថែមទៀត ដែលមានហានិភ័យខ្ពស់ដល់អ្នកប្រើប្រាស់ពីទីផ្សារក្នុងខេត្តចំនួន ៥ ហើយនឹងធ្វើការកម្ទេចចោលទំនិញទាំងនេះ។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បញ្ជាក់ក្នុងហ្វេសប៊ុក កាលពីថ្ងៃទី ១៧ ខែកញ្ញាថា កាលពីព្រឹកថ្ងៃទី ១៧ ខែ កញ្ញា ឆ្នាំ ២០២១ នេះ មន្ត្រី ក.ប.ប បានចុះត្រួតពិនិត្យទំនិញនៅក្នុងផ្សារមួយចំនួនស្ថិតក្នុងខេត្ត្តចំនួន ៥ ផ្សេងទៀតគឺ ខេត្តកំពង់ចាម ព្រះសីហនុ កំពង់ឆ្នាំង បន្ទាយមានជ័យ និងត្បូងឃ្មុំ ដោយបានរកឃើញទំនិញចំនួន ៥៥៤ គីឡូក្រាម ដែលខូចគុណភាព និងហួសកាលបរិច្ឆេទប្រើប្រាស់។
អគ្គនាយកដ្ឋាន ក.ប.ប របស់ក្រសួងពាណិជ្ជកម្មបញ្ជាក់ថា៖ «ទំនិញខាងលើ គឺត្រូវបានមន្ត្រីជំនាញធ្វើការដកយកមករក្សាទុក និងទំនិញមួយចំនួនត្រូវបានម្ចាស់ទំនិញស្ម័គ្រចិត្តប្រគល់ជូនមន្ត្រីជំនាញ ដើម្បីធ្វើការកម្ទេចចោល»។
អគ្គនាយកដ្ឋាន ក.ប.ប បញ្ជាក់ថា ក្នុងចំណោមទំនិញដែលត្រូវបានដកហូតភាគច្រើនគឺគ្រឿងឧបភោគបរិភោគ ដែលមានហានិភ័យខ្ពស់ដល់អ្នកប្រើប្រាស់ ក្នុងនោះក៏មានអាល់កុលក្លែងក្លាយ (មេតាណុល) ចំនួន ១០៩ លីត្រផងដែរ។
កាលពីថ្ងៃទី ១៧ ខែកញ្ញា នេះផងដែរ មន្ត្រី ក.ប.ប បានដកហូតទំនិញខូចគុណភាព និងហួសកាលបរិច្ឆេទប្រើប្រាស់ចំនួនជាង ២១០ គីឡូក្រាម ដែលមានហានិភ័យខ្ពស់ដល់អ្នកប្រើប្រាស់ពីទីផ្សារក្នុងខេត្តចំនួន ៤ គឺខេត្តតាកែវ ស្ទឹងត្រែង ព្រះវិហារ និងមណ្ឌលគិរី៕