ភ្នំពេញៈ ក្រសួង​សុខាភិបាល​ប្រកាស​ឱ្យ​ម្ចាស់​ហ្វេសប៊ុក​ឈ្មោះ ផ្សារ​កម្រង Accessory បញ្ឈប់​ការ​នាំចូល ចែកចាយ ឬ​ផ្សព្វផ្សាយ​លក់​ផលិតផល​បំប៉ន​សុខភាព BioLife Spirulina គ្មាន​លេខ​បញ្ជិកា​ជា​បន្ទាន់ និង​ព្រមាន​ចាត់​វិធានការ​តាម​ច្បាប់​សម្រាប់​អ្នក​ល្មើស។

ក្រសួង​សុខាភិបាល​បាន​ពិនិត្យ​ឃើញ​ថា បណ្តាញ​សង្គម​ហ្វេសប៊ុក ដែល​មាន​គណនី​ឈ្មោះ ផ្សារ​កម្រង Accessory កំពុង​ផ្សព្វផ្សាយ​លក់​ផលិតផល​បំប៉ន​សុខភាព Biolife Sprirulina គ្មាន​លេខ​បញ្ជិកា​ពី​ក្រសួង​សុខាភិបាល គិត​ត្រឹម​ថ្ងៃទី ៧ ខែ កញ្ញា ឆ្នាំ ២០២១។ នេះ​បើ​តាម​ការ​លិខិត​ចុះ​ថ្ងៃទី ១៦ ខែ​កញ្ញា របស់​ក្រសួង​សុខាភិបាល ដែល ភ្នំពេញ ប៉ុស្តិ៍ ទទួល​បាន​នៅ​ថ្ងៃ​នេះ។

តាមរយៈ​លិខិត​នេះ ក្រសួង​បញ្ជាក់​ថា អនុលោម​តាម​ច្បាប់​ស្តីពី​ការ​គ្រប់គ្រង​ឱសថ និង​ច្បាប់​ស្តីពី​វិសោធនកម្ម​ច្បាប់​ស្តីពី​ការ​គ្រប់គ្រង​ឱសថ តម្រូវ​ឱ​រាល់​ការ​ចរាចរ​ឱសថ ឬ​ផលិតផល​ដែល​មាន​គុណភាព​ក្នុង​ការ​បង្ការ ឬ​ព្យាបាល​ជំងឺ​គ្រប់​ប្រភេទ​ក្នុង​ព្រះរាជាណាចក្រ​កម្ពុជា ត្រូវ​មាន​លេខ​ទិដ្ឋាការ ឬ​លេខ​បញ្ជិកា​ពី​ក្រសួង​សុខាភិបាល។

ក្រសួង​បាន​ក្រើន​រំឭក​ឱ្យ​ប្រជាពលរដ្ឋ មាន​ការ​ប្រុងប្រយ័ត្ន​មុន​នឹង​ទិញ​ផលិតផល​ឱសថ ឬ​ផលិតផល​បំប៉ន​សុខភាព​គ្រប់​ប្រភេទ ត្រូវ​ពិនិត្យ​មើល​លតាបត្រ​បញ្ជិកា​ដែល​មាន​បិទ​លើ​សម្បក​វេច​ខ្ចប់ ដែល​លតាបត្រ​ត្រឹម​ត្រូវ គឺ​មាន​ ២ ​ផ្នែក ក្នុង​នោះ​ទី១ គឺ​ផ្នែក​ខាង​លើ​មាន​ឈ្មោះ​គ្រឹះស្ថាន​អាហរ័ណ នីហរ័ណឱសថ និង​ទី២ គឺ​ផ្នែក​ខាង​ក្រោម​មាន​លេខទិដ្ឋាការ ឬបញ្ជិកា។

ក្រសួង​សុខាភិបាល​បាន​ប្រកាស​ប្រាប់​ប្រជាពលរដ្ឋ​ទាំង​អស់​ឱ្យ​ឈប់​ជឿ​ការ​ផ្សព្វផ្សាយ​ផលិតផល បំប៉ន​សុខភាព Biolife Spirulina តាម​គណនី​បណ្តាញ​សង្គម​ហ្វេសប៊ុក​ខាង​លើ និង​ឈប់​ប្រើប្រាស់​ផលិតផល​បំប៉ន​សុខភាព​គ្មាន​លេខ​បញ្ជិកា​ខាង​លើ​បន្ត​ទៀត។ ជាមួយ​គ្នា​នោះ ក្រសួង​ក៏​បាន​តម្រូវ​ឱ្យ​ម្ចាស់​គណនី​បណ្តាញ​សង្គម​ហ្វេសប៊ុក​ខាង​លើ និង​ជន​ពាក់ព័ន្ធ​ដទៃ​ទៀត​ត្រូវ​បញ្ឈប់​ការ​នាំចូល ចែកចាយ ឬ​ផ្សព្វផ្សាយ​លក់​ផលិតផល​បំប៉ន​សុខភាព BioLife Spirulina គ្មាន​លេខ​បញ្ជិកា​ខាង​លើ​ជា​បន្ទាន់។

ក្នុង​សេចក្តី​ប្រកាស​សរសេរ​ថា៖ «ក្រសួង​សុខាភិបាល និង​មាន​វិធានការ​តឹងរ៉ឹង​ទៅ​តាម​ផ្លូវ​ច្បាប់​ចំពោះ​ម្ចាស់​គណនី​ខាង​លើ និង​ជន​ពាក់ព័ន្ធ​ទាំងឡាយ​ណា​ដែល​នាំចូល ចែកចាយ ឬ​ផ្សព្វផ្សាយ​លក់​ផលិតផល​បំប៉ន​សុខភាព BioLife Spirulina គ្មាន​លេខ​បញ្ជិកា​ខាង​លើ​ទៅ​តាម​ច្បាប់​ស្តីពី​វិសោធនកម្ម​ច្បាប់ ស្តីពី​ការ​គ្រប់គ្រង​ឱសថ​ជា​ធរមាន» ។

ក្នុង​ករណី​បងប្អូន​ប្រជាពលរដ្ឋ​បាន​ជួប​ប្រទះ​ឃើញ​ជន​ណា​កំពុង​ចែកចាយ ឬ​លក់​ផលិតផល​បំប៉ន​សុខភាព BioLife Spirulina និង​ផលិតផល​គ្មាន​លេខ​បញ្ជិកា​ផ្សេង​ៗ​ទៀត សូម​ផ្តល់​ព័ត៌មាន​ទៅ​នាយកដ្ឋាន​ឱសថ ចំណី​អាហារ បរិក្ខារពេទ្យ និង​គ្រឿង​សំអាង តាមរយៈ​លេខ​ទូរស័ព្ទ ០១២ ៣៥៥ ១៦១, ០១១ ៥៧៤ ៧៨៧, ០១២ ៩៨៣ ៣៣៤។ នេះ​បើ​តាម​ការ​បញ្ជាក់​បន្ថែម​របស់​ក្រសួង​សុខាភិបាល៕