ភ្នំពេញៈ ប្រធានមន្ទីរអប់រំយុវជន និងកីឡារាជធានីភ្នំពេញអះអាងថា ស្ថានភាពនៃការចូលរៀនវិញរបស់សិស្សនៅតាមគ្រឹះស្ថានមធ្យមសិក្សាសាធារណៈ និងសាលាឯកជនមានភាពល្អប្រសើរដោយបានអនុវត្តគោលការណ៍ប្រតិបត្តិស្ដង់ដា (SOP) និងវិធានការសុខាភិបាល ហើយបើសិនរកឃើញមានសិស្សវិជ្ជមានកូវីដ ១៩ ថ្នាក់រៀននោះនឹងត្រូវផ្អាក និងឱ្យអ្នកពាក់ព័ន្ធធ្វើចត្ដាឡីស័ក ១៤ ថ្ងៃ។
លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា រាជធានីភ្នំពេញ ថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ១៩ ខែកញ្ញានេះថា ក្នុងចំណោមគ្រឹះស្ថានមធ្យមសិក្សាសរុបចំនួន ២២៧ គឺមានគ្រឹះស្ថានមធ្យមសិក្សាសាធារណៈ និងឯកជនដែលបានបើកឡើងវិញនៅរាជធានីភ្នំពេញកាលពីថ្ងៃទី ១៥ ខែ កញ្ញា ឆ្នាំ ២០២១ នេះ មានចំនួន ១៤២ ក្នុងនោះមានគ្រឹះស្ថានសិក្សាឯកជនចំនួន ៩៦ គ្រឹះស្ថានសិក្សាផងដែរ។
លោកថ្លែងថា៖ «រហូតមកដល់ថ្ងៃនេះ ស្ថានភាពសិស្សចូលរៀនវិញនៅតាមសាលារៀន គឺមានដំណើរការល្អប្រសើរ។ ក្នុងសាលារៀន មានសភាពស្ងប់ស្ងាត់ ទោះបីថា មានសិស្សធ្វើតេស្ដឃើញវិជ្ជមានកូវីដ ១៩ ប៉ុន្ដែរដ្ឋបាលរាជធានីភ្នំពេញរួមជាមួយមន្ទីរអប់រំ និងសាលារៀន និងក្រុមគ្រូពេទ្យបានចាត់ចែងឱ្យអ្នកពាក់ព័ន្ធឱ្យពួកគាត់ធ្វើចត្ដាឡីស័កហើយ។ ចំណែកអ្នកពាក់ព័ន្ធផ្សេងទៀតយើងឱ្យយកសំណាកដើម្បីឱ្យប្រាកដថាមានវិជ្ជមាន ឬគ្មានវិជ្ជមាន»។ «យើងយកសំណាកពួកគាត់អស់ហើយ នឹងឱ្យពួកគាត់ធ្វើចត្ដាឡីស័កនៅតាមផ្ទះរៀងៗខ្លួន។ ថ្នាក់រៀនដែលពាក់ព័ន្ធជាមួយអ្នកដែលមានវិជ្ជមានយើងឱ្យផ្អាករយៈពេល ១៤ ថ្ងៃ ដើម្បីបន្តធ្វើចត្ដាឡីស័ក»។
លោក ស៊ីណារ៉េត បានឱ្យដឹងថា បើសិនជាលោកគ្រូអ្នកគ្រូ ឬសិស្សមានការសង្ស័យមានជំងឺកូវីដ ១៩ គឺមិនតម្រូវឱ្យមកបង្រៀន ឬរៀននៅសាលារៀនទេ ដោយឱ្យអនុវត្ដការបង្រៀន និងរៀនតាមប្រព័ន្ធអនឡាញ។
លោកថា កាលពីមុនថ្ងៃចូលរៀនវិញនៅថ្ងៃទី ១៥ ខែកញ្ញា លោកគ្រូ អ្នកគ្រូ និងអ្នកពាក់ព័ន្ធជាង ១ ម៉ឺននាក់ បានធ្វើតេស្ដរកមេរោគកូវីដ ១៩ មុននឹងអនុញ្ញាតឱ្យចូលបង្រៀនវិញក្នុងនោះរកឃើញ ២៤ នាក់ វិជ្ជមានកូវីដ ១៩។ ដូច្នេះតាំងពីមុនថ្ងៃចូលរៀន អ្នកមានជំងឺកូវីដ ១៩ គឺត្រូវដាក់ឱ្យព្យាបាលនៅមន្ទីរពេទ្យ និងផ្ទះ តាមការណែនាំរបស់ក្រុមគ្រូពេទ្យ។
បើតាមលោក ស៊ីណារ៉េត សិស្សពេលចូលរៀន សាលារៀនមិនបានកំណត់កាតព្វកិច្ចឱ្យសិស្សត្រូវតែធ្វើតេស្ដរកមេរោគកូវីដ ១៩ មុនចូលរៀនទេ។ ចំណែកសិស្សដែលរកឃើញវិជ្ជមានកាលពីថ្ងៃទី ១៥ ខែកញ្ញានោះ គឺមានជាប់ពាក់ព័ន្ធនឹងអ្នកវិជ្ជមាននៅមូលដ្ឋានរបស់ពួកគាត់ ដែលអាជ្ញាធរបានធ្វើសំណាកសម្រាប់ប្រជាពលរដ្ឋ។ ក្នុងនោះមានសិស្សចំនួន ២៣ នាក់វិជ្ជមាន។
ប៉ុន្ដែក្នុងចំណោមសិស្ស ២៣ នាក់នេះមានសិស្សខ្លះក៏មិនទាន់បានមកសាលារៀនទេ។ ចំណែកសិស្សដែលមកសាលារៀនជាប់ពាក់ព័ន្ធដល់សិស្សនៅក្នុងថ្នាក់ គឺត្រូវយកសំណាក និងធ្វើចត្ដាឡីស័ក ១៤ ថ្ងៃ។ សិស្សដែលជាប់ពាក់ព័ន្ធត្រូវយកសំណាកគឺអវិជ្ជមានទាំងអស់។
លោក ស៊ីណារ៉េត អះអាងថា ការការពារ ការប្រុងប្រយ័ត្ន នៅតាមសាលារៀន គឺមានលក្ខណៈល្អ។ ពេលលោកចុះពិនិត្យតាមសាលាឃើញសាលារៀនមានសភាពស្ងប់ស្ងាត់ សិស្សនៅរៀនក្នុងថ្នាក់ មិនមានការចេញលេង មិនមានទីផ្សារលក់ដូរនៅក្នុងសាលា និងពេលចេញទៅផ្ទះ គឺសិស្សផ្លាស់វេនគ្នាចេញ។
លោកថ្លែងថា៖ «យើងគិតថាហានិភ័យនៃការឆ្លងកូវីដ ១៩ នៅក្នុងសាលារៀន គឺមានកម្រិតទាបណាស់។ បើធៀបទៅនឹងតំបន់ផ្សេង។ ខ្ញុំចុះទៅពិនិត្យមើលតាមសាលារៀនឃើញការអនុវត្ដវិធានការសុខាភិបាល អនាម័យរបស់សាលារៀន និងសិស្ស គឺបានល្អលើសពីការរំពឹងទុក។ បើយើងមើលពីខាងក្រៅស្ទើរតែមិនដឹងថាសាលារៀនមានសិស្សកំពុងរៀនទេ»។
រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានសម្រេចធ្វើការផ្អាកដំណើរការថ្នាក់រៀនមួយចំនួនជាបណ្តោះអាសន្ន ១៤ ថ្ងៃ នៅក្នុងសាលាចំនួន ៥ និងតម្រូវឱ្យអ្នកពាក់ព័ន្ធផ្ទាល់ធ្វើចត្តាឡីស័កឱ្យបានត្រឹមត្រូវ។ នេះបើយោងតាមលិខិតផ្ញើជូនប្រធានមន្ទីរអប់រំ យុវជន និងកីឡារាជធានីភ្នំពេញ ដែលចុះហត្ថលេខាដោយលោក ហង់ជួន ណារ៉ុន នៅថ្ងៃទី ១៧ ខែកញ្ញានេះ។
លោករដ្ឋមន្ត្រីបានបញ្ជាក់ទៀតថា ចំពោះថ្នាក់ដទៃទៀតត្រូវបន្តដំណើរការជាធម្មតា ប៉ុន្តែត្រូវធ្វើការរឹតត្បិតការចេញលេង និងបន្តពាក់ម៉ាស់ និងលាងដៃជាប្រចាំ។
លោកថ្លែងថា៖ «មិនអនុញ្ញាតឱ្យមានការទាក់ទងពីសិស្សថ្នាក់ ១ ទៅថ្នាក់ ១ ទៀតទេ ហើយមិនអនុញ្ញាតឱ្យមានការជួបជុំ ឬប្រជុំក្រៅពីការសិក្សាក្នុងសាលារៀនឡើយ»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនឯករាជ្យកម្ពុជា (CITA) ថ្លែងថា ស្ថានភាពនៃការចូលរៀនវិញរបស់សិស្សមានសភាពល្អប្រសើរ ដោយសារសាលារៀនមួយចំនួនបានកាត់បន្ថយចំនួនសិស្សឱ្យមកសាលារៀនតិចត្រឹម ១៥ នាក់ក្នុង ១ ថ្នាក់ ហើយទីធ្លាសាលារៀនមានសភាពធំទូលាយ។
លោកស្រីថ្លែងថា៖ «ការចូលរៀនវិញនេះសាលារៀនបានផ្ដោតសំខាន់ទៅលើសិស្សថ្នាក់ទី ៩ និងថ្នាក់ទី ១២ ឱ្យចូលរៀនវិញ ព្រោះជាសិស្សដែលស្ថិតនៅក្នុងឆ្នាំត្រូវប្រឡងសញ្ញាបត្រ។ ខ្ញុំឃើញសិស្សមានការបាញ់អាល់កុលពេលចូលរៀន ហើយសិស្សក្នុង ១ ថ្នាក់មាន ១៥ នាក់ទៅ ២០ នាក់»។
លោក រស់ សុវាចា អ្នកនាំពាក្យក្រសួងអប់រំថ្លែងថា៖ «ក្រសួងអប់រំបន្តកិច្ចសហការជាមួយរដ្ឋបាលរាជធានី-ខេត្តដើម្បីសម្រួល និងតម្រង់ទិសរៀបចំការរៀន និងបង្រៀនតាមបណ្តុំឱ្យបានកាន់តែប្រសើរ និងបន្តផ្តល់អាទិភាពលើការលើកកម្ពស់សុវត្ថិភាពសុខភាពរបស់សិស្សានុសិស្ស និងបុគ្គលិកអប់រំស្របនឹងការបន្តពង្រឹងការអនុវត្តវិធានការរបស់ក្រសួងអប់រំ និងក្រសួងសុខាភិបាល»៕
វីដេអូ៖