ភ្នំពេញៈ មន្ត្រីនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានរឹបអូសទំនិញខូចគុណភាព និងហួសកាលបរិច្ឆេទប្រើប្រាស់ចំនួនជាង ៧០០ គីឡូក្រាម នៅក្នុងផ្សារនានានៅតាមខេត្តចំនួន ៩ នឹងធ្វើការកម្ទេចចោលនូវទំនិញទាំងនោះ។
យោងតាមសេចក្ដីរាយការណ៍នៅលើហ្វេសប៊ុករបស់ ក.ប.ប កាលពីថ្ងៃទី ១៧ ខែកញ្ញា បានឱ្យដឹងថា ផ្សារទាំងនោះនៅក្នុងខេត្តកំពង់ចាម ព្រះសីហនុ កំពង់ឆ្នាំង បន្ទាយមានជ័យ និងត្បូងឃ្មុំ ដោយបានរកឃើញទំនិញចំនួន ៥៥៤ គីឡូក្រាម ដែលខូចគុណភាព និងហួសកាលបរិច្ឆេទប្រើប្រាស់។ ចំណែកនៅក្នុងខេត្តតាកែវ ខេត្តស្ទឹងត្រែង ខេត្តព្រះវិហារ និងខេត្តមណ្ឌលគិរី បានរកឃើញ និងដកហូតទំនិញចំនួន ២១០ គីឡូក្រាម។
ហ្វេសប៊ុកដដែលនេះបានឱ្យដឹងថា៖ «ពិធីបុណ្យភ្ជុំបិណ្ឌប្រពៃណីជាតិខិតជិតចូលមកដល់ មន្ត្រី ក.ប.ប បានចុះត្រួតពិនិត្យទំនិញនៅតាមបណ្ដាទីផ្សារនៅទូទាំងប្រទេសក្នុងគោលបំណងការពារផលប្រយោជន៍សុខភាព និងសុវត្ថិភាពរបស់អ្នកប្រើប្រាស់»។
អគ្គនាយកដ្ឋាន ក.ប.ប របស់ក្រសួងពាណិជ្ជកម្មបញ្ជាក់ថា៖ «ទំនិញខាងលើ គឺត្រូវបានមន្ត្រីជំនាញធ្វើការដកយកមករក្សាទុក និងទំនិញមួយចំនួនត្រូវបានម្ចាស់ទំនិញស្ម័គ្រចិត្តប្រគល់ជូនមន្ត្រីជំនាញ ដើម្បីធ្វើការកម្ទេចចោល»។
មន្ត្រីនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំបញ្ជាក់ថា ក្នុងចំណោមទំនិញដែលត្រូវបានដកហូតភាគច្រើនគឺគ្រឿងឧបភោគបរិភោគ ដែលមានហានិភ័យខ្ពស់ដល់អ្នកប្រើប្រាស់ក្នុងនោះក៏មានអាល់កុលក្លែងក្លាយ (មេតាណុល) ចំនួន ១០៩ លីត្រ៕