ភ្នំពេញៈ ក្រសួងការងារប្រកាសប្រាប់ម្ចាស់រោងចក្រសហគ្រាសឱ្យកម្មករសម្រាកដោយបានប្រាក់ឈ្នួលសម្រាប់ពិធីបុណ្យភ្ជុំបិណ្ឌ ៣ ថ្ងៃ ហើយកម្មករដែលធ្វើការក្នុងថ្ងៃសម្រាកនេះត្រូវទទួលបានប្រាក់បន្ថែម។
ក្រសួងនេះបញ្ជាក់ក្នុងសេចក្តីជូនដំណឹងនៅថ្ងៃទី ១៧ ខែកញ្ញាថា៖ «សូមជម្រាបជូនដល់ម្ចាស់ ឬនាយករោងចក្រ សហគ្រាសទាំងអស់ ដែលស្ថិតក្នុងដែនអនុវត្តនៃច្បាប់ស្តីពីការងារត្រូវអនុញ្ញាតឱ្យកម្មករនិយោជិតទាំងអស់របស់ខ្លួនឈប់សម្រាកដោយមានប្រាក់ឈ្នួលក្នុងពិធីបុណ្យភ្ជុំបិណ្ឌខាងមុខនេះ»។
ពិធីបុណ្យភ្ជុំនឹងត្រូវប្រារព្ធធ្វើឡើងរយៈពេល ៣ ថ្ងៃ ចាប់ពីថ្ងៃទី ៥ ដល់ថ្ងៃទី ៧ ខែតុលា។
ក្រសួងការងារបញ្ជាក់ថា ម្ចាស់រោងចក្រសហគ្រាស អាចពិភាក្សាជាមួយតំណាងកម្មករ ដើម្បីផ្លាស់ប្តូរការឈប់សម្រាកនេះនៅពេលណាមួយផ្សេងករណីមានការព្រមព្រៀងពីកម្មករ។
ក្រសួងបញ្ជាក់ថា រោងចក្រសហគ្រាសដែលមានអាជីវកម្មជាលក្ខណៈសកល ហើយត្រូវដំណើរការជាប្រចាំ ហើយការឈប់សម្រាកបុណ្យរបស់កម្មករព្រមគ្នាក្នុងពេលតែមួយដែលធ្វើឱ្យខូចដំណើរការ ម្ចាស់រោងចក្រត្រូវបែងចែកឱ្យកម្មករបានឈប់សម្រាកទៅតាមថ្ងៃបុណ្យនីមួយៗដោយផ្លាស់ប្តូរគ្នា ហើយរក្សាទុកបញ្ជីបែងចែកនោះសម្រាប់ការត្រួតពិនិត្យរបស់អធិការការងាររបស់ក្រសួង។
ក្រសួងថា៖ «កម្មករនិយោជិតដែលធ្វើការថ្ងៃឈប់បុណ្យភ្ជុំបិណ្ឌនេះមានសិទ្ធិទទួលនូវប្រាក់បំណាច់បន្ថែមដែលមានចំនួនស្មើនឹងប្រាក់ឈ្នួលថ្ងៃធ្វើការធម្មតា»។
ជាមួយគ្នានេះក្រសួងអំពាវនាវដល់កម្មករដែលឈប់សម្រាកឱ្យអនុវត្តតាមការណែនាំរបស់ក្រសួងសុខាភិបាលស្តីពីការការពារការចម្លងវីរុសកូវីដ ១៩ និងការពុលចំណីក្នុងពិធីបុណ្យកាន់បិណ្ឌ និងភ្ជុំវិធានសុខាភិបាល។
លោក ហ្វា សាលី ប្រធានសម្ព័ន្ធសហជីពជាតិ ប្រាប់ ភ្នំពេញ ប៉ុស្តិ៍ ពីថ្ងៃទី ១៩ ខែកញ្ញាថា លោកបារម្ភពីការឆ្លងជំងឺកូវីដ ១៩ ក្នុងអំឡុងពេលឈប់សម្រាកនេះ។ លោកចោទសួរថា តើវិធានការក្រសួងសុខាភិបាលក៏ដូចជាក្រសួងពាក់ព័ន្ធនឹងត្រូវធ្វើយុទ្ធនាការបន្តបែបណា?
លោកថា៖ «ខ្ញុំក៏សាទរចំពោះការបើកឱ្យបងប្អូនកម្មករនយោជិតយើងបានឈប់សម្រាកពីព្រោះពួកគាត់ធ្វើការជាច្រើន [មក] ហើយ ដោយសារតែការឈប់សម្រាកបុណ្យយើងមិនសូវដែលបានឈប់»។
លោក ហ្វា សាលី ស្នើដល់កម្មករដែលបានឈប់សម្រាករក្សាគម្លាតសុវត្ថិភាពសង្គម ដើម្បីចៀសវាងឆ្លងជំងឺកូវីដ ១៩ ដល់សមាជិកគ្រួសារ។ លោកអំពាវនាវកម្មករដែលត្រឡប់ទៅស្រុកត្រូវបញ្ចៀស «ឱ្យខាងតែបាន» ការជិះតាក់ស៊ីប្រជ្រៀតគ្នា ដើម្បីការពារសុវត្ថិភាព៕