ត្បូងឃ្មុំៈ នគរបាលស្រុកក្រូចឆ្មារបញ្ជូនជនសង្ស័យម្នាក់ទៅសាលាដំបូងខេត្តត្បូងឃ្មុំនៅរសៀលថ្ងៃទី ២០ កញ្ញា បន្ទាប់ពីឃាត់ខ្លួនពាក់ព័ន្ធករណីចាក់គូទំនាស់បណ្ដាលឱ្យស្លាប់នៅភូមិផ្កាដូង ឃុំឈូក ស្រុកក្រូចឆ្មារ ខេត្តត្បូងឃ្មុំ។
លោក វ៉ា សម្បត្តិ អធិការរងស្រុកក្រូចឆ្មារឱ្យដឹងនៅថ្ងៃទី ២០ កញ្ញាថា ជនសង្ស័យឈ្មោះ ប៊ុនថា ធឿន ភេទប្រុសអាយុ ៤៣ ឆ្នាំ មានលំនៅក្នុងភូមិផ្កាដូង ឃុំឈូក ស្រុកក្រូចឆ្មារ ខេត្តត្បូងឃ្មុំ។ជនសង្ស័យត្រូវសមត្ថកិច្ចរបស់លោកបញ្ជូនទៅសាលាដំបូងខេត្តត្បូងឃ្មុំនៅរសៀលថ្ងៃទី ២០ កញ្ញា។
លោកបន្តថា ជានីតិវិធីគឺជនសង្ស័យត្រូវបញ្ជូនទៅស្នងការដ្ឋាននគរបាលខេត្តរួច ទើបបញ្ជូនបន្តទៅតុលាការ។
ប៉ុន្តែដោយសារស្ថានភាពជំងឺកូវីដផងនោះ គឺសមត្ថកិច្ចលោកគ្រាន់តែផ្ញើរបាយការណ៍ និងសុំគោលការណ៍ពីលោកស្នងការខេត្តត្បូងឃ្មុំជាការស្រេចហើយមិនបាច់បញ្ជូនជនសង្ស័យទៅទេ។
លោកថ្លែងថា៖ «ដោយសារតែបែបនេះហើយទើបយើងបញ្ជូនជនល្មើសពីស្រុកចូលតុលាការតែម្តង»។
លោកសម្បត្តិ ប្រាប់តាមសាក្សីថា នៅមុនកើតយប់ថ្ងៃទី ១៨ កញ្ញា ជនល្មើសបានផឹកស្រាស្រវឹងខ្លាំង ហើយបានទៅផ្ទះរករឿងប្រពន្ធបង្កជាការឈ្លោះគ្នាផ្អើលដល់អ្នកជិតខាង។
លោកបន្តថា ពេលនោះបុរសរងគ្រោះឈ្មោះ មឿន ប៊ុនថេង អាយុ ៣៨ ឆ្នាំ ជាក្មួយជីដូនមួយសាច់ថ្លៃនិងអ្នកភូមិបានឃាត់បំបែកគ្នាទៅផ្ទះរៀងៗខ្លួនអស់ទៅ។ប៉ុន្តែមួយសម្ទុះក្រោយមកស្រាប់តែគេឃើញជនសង្ស័យដើរពីផ្ទះរបស់ខ្លួនមកឈ្លោះជាមួយជនរងគ្រោះម្តងទៀតហើយក៏ទាញកន្ត្រៃពីចង្កេះចាក់ត្រូវគល់កជនរងគ្រោះ ១ កន្ត្រៃ ដួលអុកគូទប្រកាច់ស្លាប់នៅនឹងកន្លែងកើតហេតុតែម្តង។
លោកសម្បត្តិ បញ្ជាក់ថា ក្រោយសម្លាប់ជនរងគ្រោះមកគឺជនសង្ស័យក៏មិនបានរត់ទៅណាដែរ ព្រោះថា ខ្លួនគាត់ស្រវឹងស្រាជោកជាំទៅហើយ។ភ្លាមៗនោះពលរដ្ឋបានឃាត់ជនសង្ស័យទុកហើយរាយការណ៍ទៅនគរបាលប៉ុស្តិ៍ឃុំឈូកដើម្បីចុះអន្តរាគមន៍ឃាត់ខ្លួនជនសង្ស័យ។
ដោយឡែកលោក គង់ សុវណ្ណវុធ នាយនគរបាលប៉ុស្តិ៍ឃុំឈូកបានប្រាប់នៅថ្ងៃទី ២០ កញ្ញាថា ករណីនេះមុនដំបូងជនល្មើសបានប្រកែកថា មិនបានចាក់សម្លាប់ជនរងគ្រោះទេ។ប៉ុន្តែដោយសារពេលកើតហេតុម្តាយនិងសាច់ញាតិរបស់ជនរងគ្រោះនៅទីកើតហេតុទើបជនល្មើសទទួលស្គាល់ថាជាកន្ត្រៃរបស់គាត់មែន។
លោកបន្តថា៖ «រឿងនេះខាងប្រពន្ធរបស់ជនរងគ្រោះបានដាក់ពាក្យបណ្តឹងហើយ។ ករណីនេះប្រសិនបើខាងក្រុមគ្រួសាររបស់ជនរងគ្រោះមិនប្តឹងក៏បណ្តឹងកើតឡើងជាស្វ័យប្រវត្តិដែររបស់សមត្ថកិច្ច»៕