សៀមរាបៈ បុរសម្នាក់អាយុ ៧៨ ឆ្នាំ ស្លាប់ កាលពីថ្ងៃទី ១៩ ខែកញ្ញា ដោយសារគ្រាប់បែកផ្ទុះ ក្រោយពេលលើកទ្រូ នៅក្នុងស្រែ ស្ថិតនៅភូមិរំដេង ឃុំស្រណាល ស្រុកក្រឡាញ់ ខេត្តសៀមរាប។
លោក ជី បេងជន អធិការនគរបាលស្រុកក្រឡាញ់ បានឱ្យដឹងនៅថ្ងៃទី ២០ កញ្ញាថា ករណីផ្ទុះគ្រាប់បែកស្លាប់បុរសចំណាស់ឈ្មោះ ឆាវ រ៉ាយ អាយុ ៧៨ ឆ្នាំ រស់នៅភូមិត្រាំកង់ ឃុំចន្លាសដៃ ស្រុកក្រឡាញ់ មិនទាន់ដឹងថាបណ្តាលមកពីអ្វីនៅឡើយទេ ខណៈអ្នកជំនាញកំពុងស៊ើបអង្កេត។
លោក បេងជន ថ្លែងថា៖«ជុំវិញហេតុការណ៍នេះយើងមិនទាន់កំណត់ថាគេបង្កៃគ្រាប់ឬវាផ្ទុះដោយខ្លួនឯងទេ។ មន្ត្រីស៊ីម៉ាក់កំពុងធ្វើកោលស្យវិច័យ»។
លោក ភួង ហាន នាយនគរបាលប៉ុស្តិ៍ឃុំស្រណាលឱ្យដឹងតាមសាច់ញាតិរបស់ជនរងគ្រោះនៅថ្ងៃទី ២០ កញ្ញាថា កាលពីវេលាម៉ោងជាង៩ព្រឹកថ្ងៃទី ១៩ កញ្ញា ជនរងគ្រោះបានទៅមើលសន្ទូងនៅវាលស្រែក្នុងកន្លែងកើតហេតុតែម្នាក់ឯង។ ក្រោយពីជនរងគ្រោះចេញពីផ្ទះបានមួយសន្ទុះធំគេបានឮសំឡេងផ្ទុះគ្រាប់បែក។
លោកថា៖ «ខណៈអ្នកភូមិបាននាំគ្នាទៅមើលឃើញជនរងគ្រោះស្លាប់បាត់ទៅហើយ។ ភ្លាមអ្នកភូមិបានរាយការណ៍ប្រាប់នគរបាលប៉ុស្តិ៍របស់លោកហើយលោកបានជូនដំណឹងលោកអធិការជី បេងជនដើម្បីចុះពិនិត្យ»។
លោកបន្ថែមថា ក្រោយកើតហេតុកម្លាំងសមត្ថកិច្ចរបស់លោករួមកម្លាំងរបស់អធិការដ្ឋានស្រុកក្រឡាញ់បានចុះដល់ទីតាំងផ្ទុះគ្រាប់នោះ តែយ៉ាងណាសមត្ថកិច្ចលោកគ្រាន់តែការពារជុំវិញទីតាំងកើតហេតុ ដើម្បីរង់ចាំមន្ត្រីជំនាញចុះមកធ្វើកោសល្យវិច័យសិនតែប៉ុណ្ណោះ។ ចំពោះនៅលើខ្លួនសាកសពវិញឃើញមានរបួសត្រង់ក ភ្លៅខាងស្ដាំ រយៈដាច់សាច់។
លោក ភួង ហាន ថ្លែងថា៖ «យើងគ្រាន់តែបានឃើញក្រវិលដែលសន្និដ្ឋានថា ជាក្រវិលគ្រាប់បែក វាជាគ្រាប់ចាស់ហើយក៏មិនដឹងថាផលិតនៅប្រទេសណាដែរ»។
លោកបន្ថែមទៀតថា ចំពោះថាតើករណីនេះមានជាប់ពាក់ព័ន្ធនឹងរឿងគំនុំ ឬក៏សង្ស័យថាអាចមាននរណាម្នាក់លួចដាក់ដើម្បីសម្លាប់ជនរងគ្រោះយ៉ាងណានោះ ក៏សមត្ថកិច្ចមិនទាន់ដឹងដែរ។ លុះត្រាតែមានការធ្វើកោសល្យវិច័យរបស់មន្ត្រីជំនាញស៊ីម៉ាក់សិនទើបដឹង៕