ភ្នំពេញៈ ក្រសួងព្រះបរមរាជវាំងនៃព្រះរាជាណាចក្រកម្ពុជា បានចេញលិខិតបដិសេធអត្ថបទកាសែតបរទេសមួយចំនួនដែលចុះផ្សាយអំពីព្រះអង្គម្ចាស់ Prince Héritier នៃព្រះរាជាណាចក្រកម្ពុជាដាក់ស្នើសុំទិញក្លិបបាល់ទាត់ AS Saint-Etienne របស់ប្រទេសបារាំង ក្នុងតម្លៃ ១០០ លានអឺរ៉ូថា តាមរដ្ឋធម្មនុញ្ញ និងច្បាប់កម្ពុជាមិនមានចែងអំពីការចាត់តាំងព្រះរជ្ជទាយាទ «Prince Héritier» ទេ។ នេះបើតាមសេចក្ដីប្រកាសព័ត៌មាន។
សេចក្ដីប្រកាសព័ត៌មានចេញផ្សាយនៅថ្ងៃទី ២០ ខែកញ្ញា ក្រសួងព្រះបរមរាជវាំងបានបញ្ជាក់ជូនសាធារណជនជាតិអន្តរជាតិថា ក្នុងរយៈពេលថ្មីៗនេះ មានអត្ថបទកាសែតបរទេសមួយចំនួនបានចុះផ្សាយពាក់ព័ន្ធដល់ព្រះអង្គម្ចាស់រជ្ជទាយាទ«Prince Héritier»នៃព្រះរាជាណាចក្រកម្ពុជាមួយព្រះអង្គបានដាក់ស្នើសុំទិញក្លិបបាល់ទាត់ AS Saint-Etienne របស់ប្រទេសបារាំងក្នុងតម្លៃ១០០ លានអឺរ៉ូ។
ក្រសួងបញ្ជាក់ថា «យោងតាមរដ្ឋធម្មនុញ្ញនៃព្រះរាជាណាចក្រកម្ពុជានិងច្បាប់ស្ដីពីការរៀបចំ និងការប្រព្រឹត្តទៅរបស់ក្រុមប្រឹក្សារាជសម្បត្តិនៃព្រះរាជាណាចក្រកម្ពុជា មិនមានចែងអំពីការចាត់តាំងព្រះរជ្ជទាយាទ «Prince Héritier» ទេ ហើយក៏ពុំមានចែងអំពីស្ថាប័ន ឬបុគ្គលណាមួយមានសិទ្ធិអំណាចចាត់តាំងព្រះរជ្ជទាយាទឡើយ៕