ភ្នំពេញៈ លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានថ្លែងក្នុងពិធីប្រារព្ធខួប ២០ ឆ្នាំ នៃការបង្កើតដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) នៃសាកលវិទ្យាល័យភូមិន្ទភ្នំពេញកាលពីថ្ងៃទី ២០ ខែកញ្ញាថា ការកើនឡើងនៃអង្គភាពសារព័ត៌មានគឺជាការបញ្ជាក់នូវសេរីភាពនៃការអនុវត្តវិជ្ជាជីវៈសារព័ត៌មាននៅក្នុងប្រទេសមួយ ហើយការកើនឡើងអង្គភាពសារព័ត៌មាននេះក៏មិនមានការបែងចែកនូវអង្គភាពសារព័ត៌មានដែលមាននិន្នាការប្រឆាំង និងអង្គភាពសារព័ត៌មានដែលមាននិន្នាការគាំទ្ររដ្ឋាភិបាលនោះទេ។
លោកបន្តថា អង្គភាពសារព័ត៌មានមួយដែលទទួលបានសិទ្ធិធ្វើជាអ្នកសារព័ត៌មានលុះត្រាអង្គភាពសារព័ត៌មាននោះត្រូវបំពេញលក្ខខណ្ឌទៅតាមច្បាប់ និងតាមវិជ្ជាជីវៈ។
លោក មាស សុភ័ណ្ឌ ថ្លែងថា៖ «យើងមិនអាចកំណត់បានដែរថា អ្នកសារព័ត៌មានដែលផ្សាយតែព័ត៌មានអវិជ្ជមាន ឬចំណុចខ្វះខាតរបស់រដ្ឋាភិបាល ឬរបស់រដ្ឋាភិបាលប្រទេសមួយ វាយតម្លៃខ្លួនឯងថាជាអ្នកឯករាជ្យ គឺវាអត់ត្រឹមត្រូវទេ។ ជាអ្នកសារព័ត៌មានគឺត្រូវផ្សាយឱ្យគ្រប់ទិដ្ឋភាព ដែលទទួលបានពីប្រភពបែបណាត្រូវផ្សាយបែបនោះ។ អ៊ីចឹងអ្នកសារព័ត៌មានគឺត្រូវការទទួលព័ត៌មានពីគ្រប់ប្រភព ទើបបានយើងសរសេរព័ត៌មានហ្នឹង។ ទោះព័ត៌មានប្រភេទអីក៏ដោយ»។
លោក ណុប វី នាយកប្រតិបត្តិ សមាគមសម្ព័ន្ធអ្នកសារព័ត៌មានកម្ពុជាថ្លែងថា ឯករាជភាព ឬមិនឯករាជភាពគឺវាមិនអាស្រ័យទៅលើការផ្សាយព័ត៌មានពីភាពអវិជ្ជមាន ឬភាពវិជ្ជមានរបស់រដ្ឋាភិបាលនោះទេ តែជាអ្វីដែលអ្នកសារព័ត៌មានត្រូវមានឯករាជ្យនៃការគិត ការសរសេរព័ត៌មាន និងការមិនដាក់កម្រិតទៅលើសេរីភាពនៃការសរសេរ។
លោកថា៖ «យើងដឹងហើយថា សេរីភាពនៃការសរសេររបស់អ្នកសារព័ត៌មានគឺមិនអាចត្រូវបានចាប់បង្ខំ មិនអាចត្រូវបានដឹកដៃដោយបុគ្គល ឬក្រុមណាមួយទេ»៕