.jpg)
ពលរដ្ឋតម្រង់ជួរចូលចាក់វ៉ាក់សាំងកូវីដនៅមន្ទីរពេទ្យ ១ កន្លែងពីថ្ងៃទី ៣១ សីហានៅភ្នំពេញ។ ហេង ជីវ័ន
ភ្នំពេញៈ មន្ត្រីក្រសួងសុខាភិបាលអះអាងថា កម្ពុជាគ្រប់គ្រងទាន់ពេលវេលាពីស្ថានការណ៍នៃការចម្លងវីរុសកូវីដ ១៩ ប៉ុន្តែការចម្លងនៃវីរុសមានការហក់ឡើងបន្តិច ដោយសារតំបន់ខ្លះ ខេត្តខ្លះ បុគ្គលមួយចំនួនមិនបានអនុវត្តវិធានការ ៣កុំ ឱ្យបានត្រឹមត្រូវនៅឡើយ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ក្នុងក្របខ័ណ្ឌទូទាំងប្រទេស ថ្លែងបែបនេះក្នុងពេលលោកស្រីចូលរួមបិទបញ្ចប់យុទ្ធនាការចាក់វ៉ាក់សាំងកូវីដ-១៩ក្នុងខេត្តស្ទឹងត្រែងនារសៀលថ្ងៃទី ១៩ កញ្ញា។
លោកស្រីថ្លែងថា៖ «នៅពេលនេះ ស្ថានភាពនៃការចម្លងនៃវីរុសកូវីដ ១៩ បើយើងនិយាយពីការគ្រប់គ្រង គឺយើងគ្រប់គ្រងបានទាន់ពេលវេលា ប៉ុន្តែប្រសិនបើយើងនិយាយពីការចម្លង គឺវាមានសភាពមួយហក់ឡើងបន្តិច។ ហេតុអីបានជាខ្ញុំនិយាយថាហក់ឡើងបន្តិច ពីព្រោះបច្ចុប្បន្ននេះ យើងឃើញហើយតំបន់ខ្លះ ខេត្តខ្លះ គឺមានការចម្លងពីបុគ្គលមួយទៅបុគ្គលមួយ ក្រោយពីយើងបានផ្តល់វ៉ាក់សាំងកូវីដ ១៩ រួច»។
អ្នកនាំពាក្យរូបនេះបានរំឭកជាថ្មីដល់ពលរដ្ឋគ្រប់រូប សុំកុំមាន ការធ្វេសប្រហែស ទោះបីខ្លួនបានចាក់វ៉ាក់សាំងរួចហើយក៏ដោយ។
លោកស្រី វណ្ណឌីន បញ្ជាក់ថា៖ «ទោះបីជាយើងបានចាក់វ៉ាក់សាំងរួចហើយក៏ដោយ ប៉ុន្តែបើយើងមិនបន្តអនុវត្តនូវវិធានការ ៣ ការពារ និង ៣ កុំទេ ការចម្លងវានឹងកើតមានឡើង ហើយនៅពេលដែលការចម្លងកើតមានឡើង វានឹងផ្តល់លទ្ធភាពឆ្លងពីបុគ្គលមួយ ទៅបុគ្គលមួយទៀតហើយ។ ពិសេសការអនុវត្តវិធានការ៣ កុំ គឺមិនទាន់បានអនុវត្តបានគ្រប់ជ្រុងជ្រោយនៅឡើយទេ»។
ជាមួយគ្នានេះ អ្វីដែលកាន់តែធ្វើឱ្យលោកស្រីបារម្ភថែមទៀតនោះគឺវីរុសបំប្លែងថ្មីប្រភេទមូ (Mu) ដែលប្រទេសចំនួន ៤៩ ហើយបានឆ្លងវីរុសនេះ ប៉ុន្តែកម្ពុជាមិនទាន់រកឃើញមាននៅឡើយទេ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល កាលពីចុងសប្តាហ៍មុនបានណែនាំដល់គ្រប់អភិបាលរាជធានី-ខេត្តបន្តធ្វើការអប់រំផ្សព្វផ្សាយពីការអនុវត្តវិធានការសុខាភិបាលឱ្យបានខ្ជាប់ខ្ជួន បន្ទាប់ពីការឆ្លងជំងឺកូវីដ ១៩ មានការហក់ឡើងវិញនាពេលថ្មីៗនេះ។
លោកថា៖ «ក្នុងពេលថ្មីៗនេះ មានការហក់ឡើងវិញនូវការចម្លង វីរុសកូវីដ ១៩ នៅតាមខេត្តមួយចំនួន ដែលតម្រូវឱ្យមានការយកចិត្តទុកដាក់ជំរុញបន្ថែមទៀតនូវការបន្តធ្វើយុទ្ធនាការអប់រំសុខភាព ក្រោមប្រធានបទរួមគ្នាទទួលខុសត្រូវទប់ស្កាត់ការចម្លងវីរុសកូវីដ ១៩»។
វិធានការ ៣ ការពារ និង ៣ កុំ របស់រដ្ឋាភិបាល រួមមាន ៣ ការពារ គឺការពាក់ម៉ាស់ លាងដៃនឹងសាប៊ូ ឬអាល់កុល ឬជែលឱ្យបានញឹកញាប់ និងរក្សាគម្លាតសុវត្ថិភាពបុគ្គល។ ចំណែកវិធានការ ៣ កុំ គឺកុំទៅកន្លែងមានមនុស្សច្រើន កុំទៅកន្លែងបិទជិតគ្មានខ្យល់ចេញ-ចូល និងកុំប៉ះពាល់គ្នា។
ទាក់ទងនឹងដំណើរការនៃការចាក់វ៉ាក់សាំងកូវីដ ១៩ បើតាមការលើកឡើងរបស់លោកស្រី ឱ វណ្ណឌីន មកដល់ត្រឹមថ្ងៃទី ១៩ ខែកញ្ញា ពលរដ្ឋចំនួនជាង ៩,៨ លាននាក់ ឬស្មើនឹង ៩៨,២៧% សម្រាប់ក្រុមគោលដៅដែលមានអាយុពី ១៨ ឆ្នាំឡើងបានចាក់វ៉ាក់សាំងបង្ការជំងឺកូវីដ ១៩។
លោកស្រីថ្លែងថា៖ «វឌ្ឍនភាពនេះវានឹងរំកិលទៅមុខទៀតដោយសារយើងនៅបន្តចាក់ជារៀងរាល់ថ្ងៃ ហើយខ្ញុំរំពឹងថាក្នុងខែតុលានេះ យើងនឹងអាចឈានចូលទៅដល់ការសម្រេចគោលដៅប្រជាពលរដ្ឋចំនួន ១០ លាននាក់»។
កាលពីថ្ងៃទី ១៩ កញ្ញា មន្ត្រីប្រតិបត្តិសាខាកាកបាទក្រហមខេត្តស្វាយរៀង សហការជាមួយក្រុមកាកបាទក្រហមឃុំកំពង់ចម្លង និងអ្នកស្ម័គ្រចិត្តប្រចាំភូមិបានចុះអប់រំផ្សព្វផ្សាយស្តីពីវិធីកាត់បន្ថយហានិភ័យពីការឆ្លងជំងឺកូវីដ ១៩ ការគាំទ្រចិត្តសាស្ត្រសង្គម សុខភាព ផ្លូវចិត្តក្នុងបរិបទជំងឺកូវីដ ១៩ ទៅដល់ប្រជាពលរដ្ឋក្នុងភូមិតាជៃ និងភូមិចំបក់គុយ ឃុំកំពង់ចម្លង ស្រុកស្វាយជ្រំ ផងដែរ។
យោងតាមរបាយការណ៍របស់សាខាកាកបាទក្រហមខេត្តស្វាយរៀង បានឱ្យដឹងថា ការចុះផ្សព្វផ្សាយនេះ ក្រុមការងារបានចុះជួបប្រជាពលរដ្ឋតាមខ្នងផ្ទះនីមួយៗក្នុងសហគមន៍ដោយបានបែងចែកជាក្រុមតូចៗដែលមានមនុស្សតិចជាង ១០ នាក់ប៉ុណ្ណោះ ដើម្បីបង្ការការចម្លងវីរុសកូវីដ ១៩៕
វីដេអូ៖
