.jpg)
លោក ឃឹម ហ្វីណង់ ក្នុងកិច្ចប្រជុំកន្លងមក។ រូបថត រដ្ឋបាលស្រុកបន្ទាយស្រី
សៀមរាបៈ អាជ្ញាធរខេត្តសៀមរាបកំពុងសិក្សាស្រាវជ្រាវបញ្ហាដីធ្លីស្ថិតនៅភូមិរំចេក ឃុំរំចេក និងភូមិខ្នារ ឃុំខ្នារសណ្ដាយ ស្រុកបន្ទាយស្រី ដើម្បីរៀបចំប្លង់ចុះបញ្ជីដីធ្លីជូនប្រជាពលរដ្ឋ បន្ទាប់ពីពិនិត្យឃើញថា និយាមការដែលពលរដ្ឋស្នើសុំមិនត្រូវជាគ្នាជាមួយដីគម្របព្រៃឈើ។
លោក ទៀ សីហា អភិបាលខេត្តសៀមរាបថ្លែងនៅថ្ងៃទី ១៩ ខែកញ្ញា ថា អាជ្ញាធរខេត្តបានពិនិត្យឃើញថា និយាមការដែលពលរដ្ឋដាក់ស្នើសុំគឺមិនត្រូវគ្នាជាមួយនិយាមការដីគម្របព្រៃឈើ ២០០២ ដែលរាជរដ្ឋាភិបាលបានសម្រេចកាត់ឆ្វៀលចេញនោះទេ។
ហេតុនេះអាជ្ញាធរខេត្តកំពុងសិក្សាស្រាវជ្រាវឱ្យបានច្បាស់លាស់ ដើម្បីរៀបចំប្លង់ចុះបញ្ជីដីធ្លីជូនប្រជាពលរដ្ឋ។ យ៉ាងណាក្ដី លោកមិនបានបញ្ជាក់ច្បាស់ថា មានពលរដ្ឋប៉ុន្មានរយគ្រួសារទេនៅតំបន់នោះ។
លោកថ្លែងថា៖ «ឥឡូវនេះ អ្វីដែលយើងពិបាកគឺនិយាមការដែលបានពិនិត្យមើលវាមិនត្រូវគ្នាជាមួយនឹងគម្របព្រៃឈើបានកាត់ឆ្វៀលមានកន្លែងខ្លះវាប៉ះគងគ្នា ហើយកន្លែងខ្លះគឺមិនស្ថិតនៅក្នុងសេចក្តីសម្រេចទេ។ នេះហើយជាបញ្ហាថា បងប្អូនប្រជាពលរដ្ឋខ្លះគាត់មានបណ្ណកម្មសិទ្ធិមុន ២០០២ មកម្ល៉េះ ហើយយកមកពិនិត្យ គឺមិនស្ថិតក្នុងតំបន់តែមួយ» ។
លោកអភិបាលខេត្តបានបន្តថា បញ្ហាដីធ្លីនៅទីនោះមានបញ្ហាស្មុគស្មាញ ដោយសារតែមានពលរដ្ឋមួយចំនួនមានដីនៅទីតាំងនោះបានលក់ទៅឱ្យម្ចាស់ផ្សេង។ ចំណែកម្ចាស់ផ្សេងក៏បានលក់ទៅឱ្យក្រុមហ៊ុន ឡេង ណាវ៉ាត្រា ហេតុនេះក្រដាសស្នាមមួយចំនួននៅមានការខ្វះខាត ប៉ុន្តែក្រដាសស្នាមមួយចំនួនក៏ត្រឹមត្រូវតាមច្បាប់ផងដែរ។
លោកថ្លែងថា៖ «នេះជាបញ្ហាមួយដែលយើងត្រូវតែពិនិត្យឱ្យបានច្បាស់លាស់ តើប្រជាពលរដ្ឋគាត់មានការទិញលក់ ពិតប្រាកដមែនឬមួយក៏ប្រជាពលរដ្ឋគាត់មានបំណងផ្សេងក្នុងការមកចាប់យកដីនៅទីតាំងហ្នឹង» ។
តាមរយៈអនុក្រឹត្យលេខ ១២០ អនក្រ.បក ចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ២៣ កក្កដា ឆ្នាំ ២០២១ បញ្ជាក់ថា ដីចំនួន ១៧២ ហិកតា ស្ថិតនៅភូមិរំចេក ឃុំរំចេក និងភូមិខ្នារ ឃុំខ្នារសណ្ដាយ ស្រុកបន្ទាយស្រី ខេត្តសៀមរាប ត្រូវបានរាជរដ្ឋាភិបាលកាត់ចេញពីគម្របព្រៃឈើ។
លោក ឃឹម ហ្វីណង់ អភិបាលស្រុកបន្ទាយស្រីថ្លែងនៅថ្ងៃទី ១៩ ខែកញ្ញាថា ដីនៅតំបន់នោះត្រូវបានធ្វើអនុបយោគទៅឱ្យក្រុមហ៊ុនមួយ ដែលលោកមិនបានដឹងច្បាស់ថា ជាក្រុមហ៊ុនឈ្មោះអ្វីនោះទេ ប៉ុន្តែលោកថា ប្រហែលអាចជាក្រុមហ៊ុន ឡេង ណាវ៉ាត្រា។
បើតាមលោក ហ្វីណង់ ដីតំបន់នោះអត់មានព្រៃតាំងពីឆ្នាំ ២០០០ មកម្ល៉េះ។ ទោះបីជាមានការកាន់កាប់អាស្រ័យផលដោយមិនមានគម្របព្រៃឈើតាំងពីឆ្នាំ ២០០០ មកក៏ដោយ ក៏មិនទាន់មានការកាត់ចេញពីបញ្ជីសារពើភណ្ឌនៃដីរដ្ឋដែលជាដីគម្របព្រៃឈើនោះទេ។
លោកបញ្ជាក់ថា ដីដែលធ្វើអនុបយោគទៅឱ្យក្រុមហ៊ុនជាដីដែលប្រជាពលរដ្ឋអាស្រ័យផលក្នុងរយៈពេលយូរ ហើយដីនោះទៀតសោតជាដីដែលមិនទាន់បានកាត់ចេញពីបញ្ជីសារពើភណ្ឌជាដីរបស់រដ្ឋនៅឡើយ។
លោកបានថ្លែងថា៖ «មិនមែនមានន័យថា យើងយកដីកំពុងមានព្រៃឈើកាត់ចេញយកទៅអភិវឌ្ឍទេ ប៉ុន្តែយើងគ្រាន់តែផ្តល់ភាពស្របច្បាប់ខាងផ្នែកគតិយុត្តទៅលើដីដែលកាន់កាប់អាស្រ័យផលដោយជាក់ស្តែងរួចមក ហើយគ្រាន់តែផ្តល់កម្មសិទ្ធិស្របច្បាប់ជូនតែប៉ុណ្ណោះ»៕
វីដេអូ៖
