បន្ទាយមានជ័យៈ អាជ្ញាធរក្រុងប៉ោយប៉ែតបានអះអាងនៅថ្ងៃទី ២០ កញ្ញាថា ទឹកភ្លៀង និងទឹកហូរធ្លាក់ពីប្រទេសថៃតាមអូរព្រំដែនក្នុងរយៈពេល ២ ថ្ងៃជាប់គ្នានេះបានបង្កជន់លិចហេដ្ឋារចនាសម្ព័ន្ធ និងលំនៅឋានពលរដ្ឋជាច្រើនខ្នងក្នុងភូមិសាស្ត្រសង្កាត់ផ្សារកណ្ដាល និងសង្កាត់ប៉ោយប៉ែត ហើយពលរដ្ឋយ៉ាងហោចណាស់ ៤០ គ្រួសារត្រូវបានជម្លៀសមកកាន់ទីទួលសុវត្ថិភាព។
លោក ញឹម ភឿង នាយករដ្ឋបាលក្រុងប៉ោយប៉ែតបានប្រាប់ភ្នំពេញប៉ុស្តិ៍ថា នៅពេលនេះ ក្រុមកម្លាំងបញ្ជាការឯកភាពក្រុងប៉ោយប៉ែតបានប្រើគ្រឿងចក្រកាយប្រឡាយបើកមុខទឹកឱ្យបានធំទូលាយ ដើម្បីឱ្យទឹកហូរធ្លាក់ចុះទៅតាមប្រព័ន្ធប្រឡាយ អូរ និងបឹងមួយចំនួននៅផ្នែកខាងក្រោម ដើម្បីកាត់បន្ថយការជន់លិចលំនៅឋានពលរដ្ឋ និងបណ្ដាញផ្លូវសំខាន់ៗក្នុងតំបន់ទីប្រជុំជននៃទីក្រុងនេះ។
លោក ភឿង បានបញ្ជាក់ថា៖ «គិតត្រឹមម៉ោង ១១ ព្រឹកថ្ងៃទី ២០ ខែកញ្ញា ឆ្នាំ ២០២១ នេះ ក្រុមការងារយើងបានជួយអន្តរាគមន៍ជម្លៀសពលរដ្ឋ ៤០ គ្រួសារ ដែលរស់នៅជាប់ដងអូរព្រំដែន ក្នុងភូមិសាស្ត្រសង្កាត់ផ្សារកណ្ដាល និងសង្កាត់ប៉ោយបែតមកកាន់ទីទួលសុវត្ថិភាពដោយជោគជ័យ និងកំពុងបន្តជីកកាយផ្លូវលំមួយចំនួន ដើម្បីបើកមុខទឹកឱ្យហូរធ្លាក់ទៅតាមប្រព័ន្ធដៃអូរ និងប្រឡាយមួយចំនួននៅផ្នែកខាងក្រោម ដើម្បីកាត់បន្ថយការលិចលង់ផ្ទះពលរដ្ឋ និងផលប៉ះពាល់ដល់ហេដ្ឋារចនាសម្ព័ន្ធផ្លូវសំខាន់នៅក្នុងទីក្រុង»។
បើតាមលោក ភឿង ភ្លៀងនៅតែបន្តធ្លាក់ និងកំពុងជន់លិចស្ទើរតែគ្រប់ច្រកល្ហកព័ទ្ធជុំវិញក្រុងប៉ោយប៉ែត ប៉ុន្តែនៅមិនទាន់បង្កជាហានិភ័យធ្ងន់ធ្ងរនោះទេ ហើយក៏គ្មានពលរដ្ឋណាម្នាក់រងគ្រោះថ្នាក់ដោយជំនន់ទឹកភ្លៀង និងទឹកដែលហូរធ្លាក់ពីប្រទេសថៃតាមអូរព្រំដែននោះនៅឡើយដែរ។
ចំណែក លោក រ័ត្ន ដាស៊ីណង់ អភិបាលស្រុកមង្គលបុរីបានថ្លែងថា នៅពេលនេះទឹកស្ទឹងមង្គលបុរីបានជន់ឡើងព្រៀបមាត់ស្ទឹង និងកំពុងជន់លិចហូរកាត់ផ្លូវលំជាច្រើនខ្សែក្នុងភូមិសាស្ត្រឃុំចំនួន ៣ រួមមាន ឃុំសឿ ឃុំចំណោម និងឃុំរហាត់ទឹក។ ក្នុងនោះនៅឃុំសឿ ទឹកបានជន់លិច និងហូរកាត់ផ្លូវ ៣ កន្លែងស្ថិតក្នុងភូមិបឹងតូចភូមិបល្ល័ង្កព្រះ និងភូមិអូរជួបថ្មី ៤០០ ម៉ែត្រ ប៉ុន្តែនៅមិនទាន់ដល់ដីលំនៅឋានអ្នកភូមិទេ ខណៈនៅឃុំចំណោម ទឹកជន់លិចផ្លូវលំក្នុងភូមិសាយសាម៉ន និងភូមិដំណាក់ព្រះអង្គ ប្រវែង ៣ គីឡូម៉ែត និងលិចផ្ទះពលរដ្ឋ ៦ ខ្នង។
ចំណែកនៅឃុំរហាត់ទឹកវិញទឹកបានលិចផ្ទះពលរដ្ឋ ២៦ ខ្នង ក្នុងភូមិចំនួន ៤ រួមមាន ភូមិចម្ការចេក ១០ ខ្នង ភូមិចកលិច ៤ ខ្នង ភូមិចកកើត ៦ ខ្នង និងភូមិក្រម៉ុល ៦ ខ្នង និងលិចកំណាត់ផ្លូវលំ ១ ខ្សែក្នុងភូមិជួបប្រវែង ៥០ ម៉ែត្រ។
លោកថា៖ «ពេលនេះ អាជ្ញាធរកំពុងត្រៀមបម្រុងកម្លាំង និងមធ្យោបាយចុះជួយអន្តរាគមន៍ពលរដ្ឋពីតំបន់ងាយរងគ្រោះ ខណៈកម្ពស់ទឹកស្ទឹងមង្គលបុរីកំពុងបន្តជន់ឡើងគួរឱ្យព្រួយបារម្ភ»។
ជាមួយគ្នានេះ លោក សិង្ហ ទុំ មេបញ្ជាការកងពលតូចលេខ ៥១ ប្រចាំខេត្តបន្ទាយមានជ័យបានប្រាប់ភ្នំពេញប៉ុស្តិ៍ថា កម្លាំងរបស់លោកកំពុងចុះអន្តរាគមន៍ជួយពលរដ្ឋពីគ្រោះទឹកជំនន់ ទៅទីទួលសុវត្ថិភាពដែលគិតត្រឹមថ្ងៃទី ២០ កញ្ញា បានជាង ៤០ គ្រួសារ។
លោកថា៖ «ពេលនេះផ្ទះពលរដ្ឋតាមដងអូរព្រំដែនគឺត្រូវទឹកជន់លិចអស់ហើយ ប៉ុន្តែគ្រួសារមួយចំនួនបានព្យាយាមរស់នៅលើផ្ទះដែលហ៊ុមព័ទ្ធដោយទឹកជំនន់ ចំណែកគ្រួសារខ្លះ ដែលផ្ទះរបស់គាត់លិចមិនអាចនៅបាន កម្លាំងរបស់យើងបានជម្លៀសមកកាន់ទីទួលសុវត្ថិភាពហើយ»។
បើតាមលោក សិង្ហ ទុំ ជំនន់ទឹកភ្លៀងក្នុងក្រុងប៉ោយប៉ែតអាចនឹងជន់លិចបន្ថែមទៀត ប្រសិនបើភ្លៀងនៅតែបន្តធ្លាក់ដូចការព្យាកររបស់ក្រសួងធនធានទឹក និងឧតុនិយម។
ក្រសួងធនធានទឹក និងឧតុនិយមកាលពីថ្ងៃទី ១៨ ខែកញ្ញា បានព្យាករថា ភ្លៀងនឹងបន្តធ្លាក់ខ្លាំងអូសបន្លាយដល់ថ្ងៃទី ២៥ ខែកញ្ញា និងបានអំពាវនាវឱ្យពលរដ្ឋ និងអាជ្ញាធរបង្កើនការប្រុងប្រយ័ត្នចំពោះគ្រោះជំនន់ទឹកភ្លៀង ជាពិសេសអ្នកដែលរស់នៅជាប់តំបន់ជួរភ្នំក្រវាញ និងជួរភ្នំដងរែក ព្រមទាំងតំបន់ទំនាបជាប់មាត់ទឹក។
ទន្ទឹមនឹងនេះដែរ លោក គន់ គីម ប្រធានទី ១ គណៈកម្មាធិការជាតិគ្រប់គ្រងគ្រោះមហន្តរាយបានរំឭកដល់មន្ត្រីឱ្យសហការផ្សព្វផ្សាយព័ត៌មានគ្រោះមហន្តរាយជូនពលរដ្ឋ និងត្រូវត្រៀមលក្ខណសម្បត្តិ ដើម្បីជួយសង្គ្រោះពលរដ្ឋក្នុងពេលមានគ្រោះមហន្តរាយ។
ជុំវិញបញ្ហាគ្រោះមហន្តរាយធម្មជាតិនេះដែរ អាជ្ញាធរក្រុងសៀមរាបនៃខេត្តសៀមរាបបានប្រាប់ឱ្យដឹងផងដែរថា ភ្លៀងលាយឡំជាមួយខ្យល់កន្ត្រាក់ កាលពីព្រលប់ថ្ងៃទី ១៩ ខែកញ្ញា ឆ្នាំ ២០២១ កន្លងទៅបានបង្កផលប៉ះពាល់ផ្ទះពលរដ្ឋចំនួន ៥ ខ្នង និងដំបូលអគារសាលារៀន ១ ខ្នង និងដំបូលអគារមន្ទីរពេទ្យ ១ ខ្នង ប៉ុន្តែមិនទាន់បានបង្កឱ្យមានផលប៉ះពាល់ដល់ពលរដ្ឋណាម្នាក់នៅឡើយទេ៕
វីដេអូ៖