សៀមរាប/ស្វាយរៀងៈ រដ្ឋបាលខេត្តសៀមរាបសម្រេចបិទខ្ទប់ និងដាក់ជាតំបន់ក្រហមនូវភូមិចំនួន ២ ក្នុងឃុំមានជ័យ និងឃុំរលួស ស្រុកប្រាសាទបាគង ចំនួន ១ សប្តាហ៍ដែលអនុវត្តចាប់ពីថ្ងៃទី ២០ ខែកញ្ញា ខណៈរដ្ឋបាលខេត្តស្វាយរៀង ក៏បិទជាបណ្តោះអាសន្ននូវការលក់ដូរនៅផ្សារស្រះក្នុងស្រុករមាសហែកចំនួន ២ សប្តាហ៍ផងដែរ។
លោក ទៀ សីហា អភិបាលខេត្តសៀមរាបប្រកាសឱ្យដឹងថា រដ្ឋបាលខេត្តបានសម្រេចបិទខ្ទប់ និងកំណត់ជាតំបន់ក្រហម ក្នុងភូមិសាស្ត្រភូមិដូនទាវ នៅឃុំរលួស និងភូមិតាប្រាក់ នៅឃុំមានជ័យ ដែលជាតំបន់មានការឆ្លងរាលដាលនៃជំងឺកូវីដ ១៩។
លោកថា៖ «ការបិទជាបណ្តោះអាសន្នមានរយៈពេល ១ សប្ដាហ៍គិតចាប់ពីវេលាម៉ោង ១ រសៀល ថ្ងៃទី ២០ នេះរហូតដល់ថ្ងៃទី ២៦ ខែកញ្ញាក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ ១៩ នៅក្នុងភូមិសាស្ត្រ ដែលត្រូវបិទ និងទប់ស្កាត់ជំងឺនេះមិនឱ្យឆ្លងរាលដាលទៅតំបន់ផ្សេងទៀត រហូតមានការចេញសេចក្តីសម្រេចជាថ្មី»។
លោក ទៀ សីហា បញ្ជាក់ថា ក្នុងអំឡុងពេលនៃការអនុវត្តបិទខ្ទប់នេះ បុគ្គលគ្រប់រូបត្រូវបានហាមឃាត់មិនឱ្យធ្វើដំណើរចេញពីលំនៅឋាន ឬទីសំណាក់បច្ចុប្បន្នរបស់ខ្លួនឡើយ។ ក្នុងករណីការបំពានវិធានការហាមឃាត់ការធ្វើដំណើរនេះ អាជ្ញាធរអនុវត្តវិធានការបិទខ្ទប់ ត្រូវអនុវត្តវិធានការច្បាប់យ៉ាងម៉ឺងម៉ាត់ ដោយរួមទាំងការឃាត់ទុកជាបណ្តោះអាសន្ននូវមធ្យោបាយធ្វើដំណើរដោយអនុលោមតាមបទប្បញ្ញត្តិ និងនីតិវិធីជាធរមាន។
បើតាមលោកអភិបាលខេត្ត ផ្សារ និងទីកន្លែងលក់ម្ហូបអាហារ និងគ្រឿងឧបភោគបរិភោគ ដោយរួមទាំងទីកន្លែងលក់គ្រឿងស្រវឹងគ្រប់ប្រភេទ ព្រមទាំងសកម្មភាពការងារមុខរបរ និងអាជីវកម្មទាំងអស់ នៅតំបន់ក្រហមត្រូវផ្អាកជាបណ្តោះអាសន្ន។ រាល់ការជួបជុំ ឬការប្រមូលផ្តុំមនុស្សជាលក្ខណៈឯកជន និងការជួបជុំ ឬការប្រមូលផ្តុំមនុស្ស ដើម្បីសេពគ្រឿងស្រវឹងគ្រប់ប្រភេទ និងការចាក់ឧបករណ៍ បំពងសំឡេង ការច្រៀង ឬរាំកម្សាន្ត ក៏ត្រូវបានហាមឃាត់ផងដែរ។
លោកអភិបាលខេត្តបញ្ជាក់ថា ប្រជាពលរដ្ឋមិនត្រូវបានអនុញ្ញាតឱ្យធ្វើដំណើរឆ្លងកាត់ពីភូមិ ១ ទៅភូមិ ១ ក្នុងភូមិសាស្ត្រភូមិដូនទាវ ឃុំរលួស និងភូមិតាប្រាក់ ឃុំមានជ័យ ស្រុកប្រាសាទបាគងឡើយ។
គួរបញ្ជាក់ថា កាលពីថ្ងៃទី ១៩ កញ្ញា រដ្ឋបាលខេត្តសៀមរាបក៏បានសម្រេចបិទខ្ទប់ និងកំណត់ជាតំបន់ក្រហមនូវភូមិចំនួន ២ គឺភូមិកំពង់ និងភូមិស្រមរ ក្នុងឃុំជីក្រែង ស្រុកជីក្រែង រយៈពេល ១ សបា្តហ៍ ដើម្បីទប់ស្កាត់ការឆ្លងរាលដាលជំងឺកូវីដ ១៩ ក្នុងសហគមន៍ផងដែរ។
កាលពីថ្ងៃទី ១៧ កញ្ញា អាជ្ញាធរខេត្តសៀមរាបបានដាក់ភូមិចំនួន ៣ និងសង្កាត់ ចំនួន ៤ ក្នុងក្រុងសៀមរាប ជាតំបន់ក្រហម និងបានបិទខ្ទប់តំបន់ទាំងនោះរយៈពេល ១ សប្តាហ៍ផងដែរ រហូតដល់ថ្ងៃទី ២៣ កញ្ញា ដើម្បីទប់ស្កាត់ជំងឺកូវីដ ១៩ មិនឱ្យឆ្លងរាលដាលទៅតំបន់ផ្សេងទៀត។
តំបន់ទាំងនោះរួមមាន សង្កាត់ស្លក្រាម សង្កាត់ស្វាយដង្គំ សង្កាត់គោកចក សង្កាត់ជ្រាវ ភូមិតាវៀនស្ថិតក្នុងសង្កាត់សាលាកំរើក និងភូមិព្រៃធំ និងភូមិស្រងែស្ថិតក្នុងសង្កាត់ស្រងែ។
គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ នៃក្រសួងសុខាភិបាលសហការជាមួយគណៈកម្មការប្រយុទ្ធនឹងជំងឺកូវីដ ១៩ ខេត្តសៀមរាបក៏បានបន្ថែមប្រព័ន្ធទូរស័ព្ទទាន់ហេតុការណ៍ (Hot Line) 115 សម្រាប់ខេត្តនេះផងដែរ ដោយចុចលេខ 115 រួចចុចលេខ 4។
ទន្ទឹមនឹងនេះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានចេញលិខិតអនុញ្ញាតឱ្យសណ្ឋាគារ ឡូទុសប្លង្គ (Lotus Blanc Hotel & Resort) ដែលជាសណ្ឋាគារដំបូងគេក្នុងខេត្តសៀមរាបផ្តល់សេវាថែទាំ និងព្យាបាលអ្នកជំងឺកូវីដ ១៩។
លោក ម៉ម ប៊ុនហេង បញ្ជាក់ក្នុងលិខិតអនុញ្ញាតចុះថ្ងៃទី ២០ កញ្ញា ថា៖ «អនុញ្ញាតឱ្យមានការផ្តល់សេវាថែទាំ និងព្យាបាលអ្នកជំងឺកូវីដ ១៩ កម្រិតស្រាល នៅសណ្ឋាគារឡូទុសប្លង្គ ក្នុងសង្កាត់ស្វាយដង្គំ ក្រុងសៀមរាប ដែលមានលោកស្រី គួយ ណាលីន ជាតំណាងឱ្យសណ្ឋាគារ និងលោកវេជ្ជបណ្ឌិត អ៊ិតឆប ឆរ័ត្ន ជាអ្នកទទួលខុសត្រូវផ្នែកបច្ចេកទេស»។
លោកបញ្ជាក់ថា សណ្ឋាគារនេះមិនត្រូវផ្តល់សេវាព្យាបាលជំងឺផ្សេងក្រៅពីជំងឺកូវីដ ១៩ ឬផ្តល់សេវាផ្សេងៗឡើយ។
សណ្ឋាគារ Lotus Blanc Hotel & Resort នឹងចាប់ផ្តើមបើកទទួលផ្តល់សេវាថែទាំ និងព្យាបាលអ្នកជំងឺកូវីដ ១៩ កម្រិតស្រាលចាប់ពីថ្ងៃទី ២៥ ខែ កញ្ញា ឆ្នាំ ២០២១ តទៅផងដែរ។
ចំណែករដ្ឋបាលខេត្តស្វាយរៀងក៏បានប្រកាសបិទជាបណ្តោះអាសន្ននូវការដំណើរការតូបលក់ដូរនៅផ្សារស្រះស្ថិតក្នុងភូមិស្រះ ឃុំជ្រៃធំ ស្រុករមាសហែក រយៈពេល ១៤ ថ្ងៃចាប់ពីថ្ងៃទី ២០ ខែកញ្ញា ដល់ថ្ងៃទី ៤ ខែតុលា។
សេចក្តីសម្រេចនេះបានបញ្ជាក់ថា អំឡុងពេលបិទបណ្តោះអាសន្ននេះ គឺរឹតត្បិតការធ្វើដំណើរ ហាមឃាត់ ការប្រមូលផ្តុំ ឬការជួបជុំមនុស្សនៅក្នុងទីតាំងនៃផ្សារនេះផងដែរ៕
វីដេអូ៖