ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវឱ្យស្ថាប័នតុលាការពិចារណាក្នុងការបញ្ឈប់ដីកាតាមចាប់ខ្លួនលោក សេង សារី អ្នកវិភាគ និងជាអ្នកស្រាវជ្រាវអភិវឌ្ឍន៍សង្គម និងកុំឱ្យក្រុមគ្រួសាររបស់លោកបារម្ភ បន្ទាប់ពីលោកនាយករដ្ឋមន្ត្រីបានស្តាប់ការបកស្រាយមានលក្ខណៈសមហេតុសមផល។
លោកនាយករដ្ឋមន្ត្រី ហ៊ុន សែន កាលពីថ្ងៃទី ១៧ ខែកញ្ញា បានឱ្យដឹងថា តុលាការបានចេញដីកាឱ្យតាមចាប់ខ្លួនលោក សេង សារី ដែលបានសរសេរលើកឡើងនូវសេណារីយោកម្លាំងចំនួន ៦ ក្នុងការបង្កើតរដ្ឋាភិបាលចម្រុះតាមការអំពាវនាវរបស់លោក សម រង្ស៊ី ដោយយកគំរូតាមប្រទេសមីយ៉ាន់ម៉ា ហើយត្រូវបានលោកនាយករដ្ឋមន្ត្រីចាត់ទុកជាទង្វើខុសច្បាប់មិនអាចអត់ឱនឱ្យបាន។
លោក សេង សារី កាលពីថ្ងៃទី ២១ ខែ កក្កដា ឆ្នាំ ២០២១ បានសរសេរវិភាគតាមទំព័រហ្វេសប៊ុករបស់លោកពាក់ព័ន្ធនឹងការផ្តួចផ្តើមគំនិតបង្កើតរដ្ឋាភិបាលបង្រួបបង្រួមជាតិរបស់លោក សម រង្ស៊ី ដោយលោកថា កម្លាំងដែលអាចធ្វើឱ្យនយោបាយកម្ពុជាប្រែប្រួលមានចំនួន ៦ ធំៗរួមមាន កម្លាំងអ្នកគាំទ្រគណបក្សប្រឆាំង កម្លាំងមហាជន កម្លាំងយុវជន កម្លាំងផ្ទៃក្នុងគណបក្សកាន់អំណាច កម្លាំងប្រដាប់អាវុធ និងកម្លាំងអន្តរជាតិ និងប្រទេសជិតខាង។ លុះក្រោយមកក៏មានដីកាតុលាការតាមចាប់ខ្លួនលោក។
ប៉ុន្តែលោកនាយករដ្ឋមន្ត្រី ហ៊ុន សែន បានសរសេរនៅលើទំព័រហ្វេសប៊ុកផ្លូវការរបស់លោកនៅថ្ងៃទី ២០ ខែ កញ្ញា ឆ្នាំ ២០២១ ថា ក្រោយពីលោកបានស្តាប់នូវការសម្ភាសរបស់លោក សេង សារី ជាមួយកាសែត The Cambodia Daily កាលពីថ្ងៃទី ១៨ កញ្ញា ២០២១ បកស្រាយពន្យល់អំពីគោលបំណងនៃការវិភាគថា «ជាការវិភាគបែបសេណារីយោ» ។
លោកនាយករដ្ឋមន្ត្រីបានចាត់ទុកថាការបកស្រាយនេះមានលក្ខណៈសមហេតុផល និងអាចទទួលយកបានហើយក្នុងនាមប្រមុខនៃរាជរដ្ឋាភិបាលកម្ពុជាលោកបានអំពាវនាវឱ្យស្ថាប័នតុលាការពិនិត្យពិចារណាក្នុងការបញ្ឈប់ដីកាចាប់ខ្លួនលោកបណ្ឌិត សេង សារី។
លោក ហ៊ុន សែន បានមានប្រសាសន៍ថា៖ «ទន្ទឹមនឹងនេះ ខ្ញុំក៏សូមលើកទឹកចិត្តឱ្យលោក បណ្ឌិត សេង សារី បន្តកិច្ចការស្រាវជ្រាវ និងវិភាគបញ្ហាសង្គមបន្តទៀត ដើម្បីជាប្រយោជន៍ដល់ការសិក្សាស្រាវជ្រាវផ្នែកវិទ្យាសាស្ត្រសង្គម។
ខ្ញុំក៏អំពាវនាវឱ្យភរិយា កូន និងឪពុកម្តាយរបស់បណ្ឌិត សេង សារី កុំឱ្យមានការព្រួយបារម្ភ»។
ទាក់ទងនឹងបញ្ហានេះ លោក សេង សារី បានប្រាប់ ភ្នំពេញ ប៉ុស្ដិ៍ ពីប្រទេសថៃ នៅថ្ងៃទី ២០ កញ្ញាថា លោកថ្លែងអំណរគុណដល់លោកនាយករដ្ឋមន្ត្រី ហ៊ុន សែន ចំពោះការយោគយល់ទៅលើសំណេររបស់លោកកន្លងមក។ លោកបន្តថា នេះគឺជាឥរិយាបថមួយដែលបង្ហាញពីការបើកនូវលម្ហ និងស្តាប់នូវមតិផ្ទុយ និងការទទួលយកការពន្យល់ពីអ្នកវិភាគ និងអ្នកស្រាវជ្រាវ។
លោកថ្លែងថា៖ «ប្រសិនបើករណីបើកចំហ និងទទួលយកបទវិភាគផ្សេងៗ ត្រូវបានរដ្ឋាភិបាលយកទៅពិចារណា ខ្ញុំគិតថា អាចជាផលប្រយោជន៍ និងធាតុចូល ចូលរួមពីបញ្ញវន្តដែលមានមតិផ្ទុយនៅក្នុងការដោះស្រាយបញ្ហា សង្គម និងនយោបាយនៅកម្ពុជាបាន»។
ទន្ទឹមនឹងនេះលោកក៏បានសរសេរផ្ញើសារតាមហ្វេសប៊ុកមកកាន់ក្រុមគ្រួសាររបស់លោកដែរថា៖ «ម៉ែអាចទៅវត្តនៅថ្ងៃកាន់បិណ្ឌខាងមុខនេះបានហើយ ម៉ែមិនបាច់បារម្ភពីអ្នកណាថាឱ្យម៉ែ មានកូនជាជនក្បត់ជាតិទេ! ប្រពន្ធសម្លាញ់ អូនអាចបើកទ្វាររបងឱ្យកូនរត់លេងវិញបានហើយ!»។
លោក ជិន ម៉ាលីន អ្នកនាំពាក្យក្រសួងយុត្តិធម៌ប្រាប់ភ្នំពេញប៉ុស្តិ៍នៅថ្ងៃទី ២០ ខែកញ្ញាថា លោកនាយករដ្ឋមន្ត្រី ហ៊ុន សែន គ្រាន់តែស្នើសុំទៅតុលាការឱ្យមានការបញ្ឈប់ចេញដីកាចាប់ខ្លួន លោក សេង សារី ប៉ុណ្ណោះមិនមានទាស់ខុស ឬជ្រៀតជ្រែកលើស្ថាប័នតុលាការទេ ប៉ុន្តែការសម្រេចយ៉ាងណានោះ វាជាឆន្ទានុសិទ្ធិរបស់តុលាការ។
លោកថ្លែងថា៖ «អ្វីដែលសម្តេចនាយកលើកឡើងពីការចេញដីកាវាជាការបញ្ចេញទស្សនៈយោបល់ និងបញ្ចេញព័ត៌មានដែលតុលាការបានធ្វើ មិនមែនបង្គាប់ឱ្យតុលាការចេញដីកាឯណា ហើយអ្វីដែលសម្តេចនាយកស្នើសុំឱ្យបញ្ឈប់បញ្ចេញដីកា វាគ្រាន់តែជាការស្នើសុំ និងយោបល់ ប៉ុន្តែការសម្រេចយ៉ាងណា វាជាសិទ្ធិរបស់តុលាការទេ»។
លោក អំ សំអាត នាយករងអង្គការលីកាដូបានគាំទ្រចំពោះការអំពាវនាវរបស់លោកនាយករដ្ឋមន្ត្រី ហ៊ុន សែន ឱ្យស្ថាប័នតុលាការបញ្ឈប់តាមចាប់ខ្លួន លោក សេង សារី ដោយលោកថា លោក សេង សារី គឺជាបញ្ញវន្ត ១ រូប ដែលតែងរួមចំណែកក្នុងសង្គមតាមរយៈបទវិភាគ និងការផ្តល់អនុសាសន៍ល្អៗ ដើម្បីរួមចំណែកអភិវឌ្ឍប្រទេសជាតិ។
លោក សំអាត បញ្ជាក់ថា៖ «លោក សេង សារី បានបកស្រាយថា វិភាគរបស់គាត់តាមបែបសេណារីយោទេ។ ខ្ញុំយល់ថា ការវិភាគហ្នឹង គឺជាការមួយដែលគ្រាន់តែបញ្ចេញគំនិត និងទស្សនៈផ្ទាល់ខ្លួនរបស់លោកប៉ុណ្ណោះ។ សេណារីយោទាំងនោះ បើយើងគិតទៅចំណុចណាដែលវាប៉ះពាល់ដល់បញ្ហាប្រទេសជាតិ ការអភិវឌ្ឍ និងបែកបាក់សាមគ្គីអីហ្នឹង យើងគួរចៀសវាងទៅ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា និងជាអ្នកវិភាគបញ្ហានយោបាយបានថ្លែងដែរថា ការអំពាវនាវរបស់លោកនាយករដ្ឋមន្ត្រី ហ៊ុន សែន ឱ្យទម្លាក់ចោលដីកាតាមចាប់លោក សេង សារី នេះ គឺជាការគិតគូរ និងពិចារណាគ្រប់ទិដ្ឋភាពគ្រប់ជ្រុងជ្រោយ និងជាការល្អសម្រាប់សង្គមកម្ពុជា។
យ៉ាងណាក្ដី លោកថា ចំពោះការអំពាវនាវនេះបើមើលតែមួយជ្រុងអវិជ្ជមានថា ជាការបំបិទសិទ្ធិរបស់អ្នកវិភាគ នៅពេលដែលមានដីកាចាប់ខ្លួន ឬតាមចាប់ខ្លួន និងគំរាមកំហែងជាដើម ប៉ុន្តែបើមើលមួយជ្រុងទៀត អ្នកវិភាគនៅតែវិភាគបានដើម្បីប្រយោជន៍ជាតិ។
លោកថ្លែងថា៖ «បើវិភាគដើម្បីឱ្យសង្គមខ្មៅងងឹត និងមើលទុទ្ទិដ្ឋិនិយមចំពោះប្រជាជន វិភាគដើម្បីឱ្យមានចលាចលក្នុងសង្គម ខ្ញុំយល់ថា មិនគួរត្រូវបានលើកទឹកចិត្តទេ ហើយអ្នកវិភាគទាំងឡាយ គួរតែពិចារណាថា តើគោលដៅនៃការវិភាគរបស់យើងក្នុងគោលបំណងផ្ទាល់ខ្លួន ភាពល្បីល្បាញក្នុងសង្គម និងចង់ទៅរស់នៅប្រទេសទី ៣ ក៏គួរពិចារណាឡើងវិញ»៕