.jpg)
អ្នកវិភាគសង្គមលោក សេង សារី។ រូបថត FB
ភ្នំពេញៈ លោក ញឹម ពិសាល ចៅក្រមស៊ើបសួរនៃសាលាដំបូងរាជធានីភ្នំពេញ នៅថ្ងៃទី២១ ខែកញ្ញា បានចេញសេចក្តីសម្រេចលើកលែងការចោទប្រកាន់ និងបញ្ឈប់ការចាប់ខ្លួន លោក សេង សារី អ្នកវិភាគ និងស្រាវជ្រាវអភិវឌ្ឍន៍សង្គម ដែលមានដីកាបង្គាប់ឱ្យចាប់ខ្លួនកាលពីថ្ងៃទី០៥ ខែសីហា ឆ្នាំ២០២១។
សេចក្ដីសម្រេចនេះ ធ្វើក្រោយពីលោកនាយកដ្ឋមន្ត្រី ហ៊ុន សែន កាលពីថ្ងៃទី ២០ ខែកញ្ញានេះ បានស្តាប់ការបកស្រាយពន្យល់អំពីគោលបំណងនៃការវិភាគអំពីសេនារីយោ ៦ ចំណុច របស់លោកពាក់ព័ន្ធនឹងគម្រោងបង្កើតរដ្ឋាភិបាលចម្រុះរបស់លោក សម រង្ស៊ី កាលពីថ្ងៃទី២១ កក្កដា ២០២១ ថា «ជាការវិភាគបែបសេនារីយោ»។
លោក សេង សារី ត្រូវបានចោទប្រកាន់ពីបទ រួមគំនិតក្បត់ និងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តនៅព្រះរាជាណាចក្រកម្ពុជា និងទីកន្លែងផ្សេងទៀត កាលពីថ្ងៃទី១៧ ថ្ងៃទី២០ ថ្ងៃទី២១ ខែកក្កដា ឆ្នាំ ២០២១ និងអំឡុងពេលបន្តបន្ទាប់ បទល្មើសព្រហ្មទណ្ឌដែលមានចែងឱ្យផ្តន្ទាទោសតាមបញ្ញត្តិមាត្រា ៤៥៣ មាត្រា ៤៩៤ និងមាត្រា ៤៨៥ នៃក្រមព្រហ្មទណ្ឌ។
បន្ទាប់ពីទទួលបានដីកាបញ្ឈប់ឱ្យចាប់ខ្លួនរបស់សាលាដំបូងរាជធានីភ្នំពេញ លោក សេង សារី ប្រាប់ ភ្នំពេញប៉ុស្តិ៍ នៅថ្ងៃទី២១ ខែកញ្ញា ឆ្នាំ២០២១ នេះ ពីប្រទេសថៃ ថា ចាប់ពីពេលនេះតទៅ លោកមានសេរីភាពពេញលេញបរិបូរណ៍ និងបំពេញការងារដោយគ្មានការភ័យខ្លាចទៀតហើយ។
លោកបន្តថា លោកនឹងបន្តចូលរួមចែករំលែក និងផ្តល់ការវិភាគនានាដល់បណ្តាសារព័ត៌មាន និងធ្វើកិច្ចការស្រាវជ្រាលើបញ្ហាសង្គម ដែលបច្ចុប្បន្ននេះ លោកកំពុងធ្វើការស្រាវជ្រាវ សម្រាប់ថ្នាក់ក្រោយបណ្ឌិតរបស់លោកនៅក្នុងប្រទេសថៃ ដែលនឹងបញ្ចប់នៅពាក់កណ្តាលឆ្នាំ ២០២២ ខាងមុខ រួចត្រឡប់មកកាន់កម្ពុជាវិញ។
លោកថ្លែងថា៖ «នៅពេលដែលខ្ញុំចប់គម្រោងស្រាវជ្រាវរបស់ខ្ញុំ ខ្ញុំនឹងវិលទៅកម្ពុជាវិញហើយ ព្រោះម្តាយ ប្រពន្ធកូនខ្ញុំ នៅក្នុងស្រុកខ្មែរ។ ខ្ញុំទៅណាខ្ញុំ»៕
