.jpg)
ទីតាំងលក់រថយន្ត ១ កន្លែង នៅភ្នំពេញពីខែមិថុនា ឆ្នាំនេះ។ ហ៊ាន រង្សី
ភ្នំពេញៈ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានណែនាំដល់ម្ចាស់ក្រុមហ៊ុន រោងចក្រ សហគ្រាស និងអ្នកនាំចូលយានយន្តថ្មីមកកម្ពុជាដាក់ពាក្យស្នើសុំអាជ្ញាប័ណ្ណបញ្ជាក់សុវត្ថិភាពផលិតផលយានយន្តរបស់ខ្លួននៅវិទ្យាស្ថានស្តង់ដាកម្ពុជា ដើម្បីបញ្ជាក់ពីសុវត្ថិភាព។
តាមសេចក្តីជូនដំណឹងរបស់ក្រសួងពីថ្ងៃទី ១៧ ខែកញ្ញា ឆ្នាំនេះឱ្យដឹងថា បច្ចុប្បន្ននេះការធ្វើចរាចរណ៍ចែកចាយលក់ផលិតផលយានយន្តថ្មីនៅលើទីផ្សារកម្ពុជាបាន និងកំពុងប្រព្រឹត្តទៅតាមរូបភាពផ្សេងៗ ដោយពុំបានគិតគូរឱ្យបានគ្រប់គ្រាន់លើសុវត្ថិភាពផលិតផលស្របតាមស្តង់ដា និងបទប្បញ្ញត្តិបច្ចេកទេសទេ។
សេចក្តីជូនដំណឹងនេះបន្តថា ក្នុងទិសដៅគ្រប់គ្រងបញ្ហាសុវត្ថិភាព ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នឹងចុះត្រួតពិនិត្យស្តង់ដាសុវត្ថិភាពផលិតផលយានយន្តនៅតាមរោងចក្រសហគ្រាស និងមូលដ្ឋានចែកចាយលក់ផលិតផលយានយន្តថ្មី ដែលមានវត្តមាននៅក្នុងទីផ្សារកម្ពុជា នាពេលខាងមុខ។
ដើម្បីពង្រឹងដល់កិច្ចការត្រួតពិនិត្យសុវត្ថិភាព ក្រសួងនេះបានតម្រូវឱ្យម្ចាស់ក្រុមហ៊ុន រោងចក្រ សហគ្រាស និងអ្នកនាំចូលដាក់ពាក្យសុំអាជ្ញាប័ណ្ណបញ្ជាក់សុវត្ថិភាពនេះនៅវិទ្យាស្ថានស្តង់ដាកម្ពុជាដោយភ្ជាប់មកជាមួយនូវឯកសារថតចម្លង និងផ្តល់កិច្ចសហការក្នុងការចុះធ្វើអធិការកិច្ចរបស់មន្ត្រីអធិការកិច្ចស្តង់ដាកម្ពុជា។
សេចក្តីជូនដំណឹងបញ្ជាក់ថា «បុគ្គល ឬជនណាដែលរារាំងក្នុងការធ្វើអធិការកិច្ច និងមិនមានឯកសារភ័ស្តុតាងដែលបង្ហាញពីសុវត្ថិភាពផលិតផលយានយន្តនឹងត្រូវទទួលទោស ឬពិន័យទៅតាមច្បាប់ជាធរមាន»។
លោក ចាន់ សូផា អគ្គនាយកនៃវិទ្យាស្ថានស្តង់ដាកម្ពុជា ប្រាប់ ភ្នំពេញ ប៉ុស្តិ៍ នៅថ្ងៃទី ២១ ខែកញ្ញា ថា ដើម្បីធានាសុវត្ថិភាពដល់អ្នកប្រើនៅកម្ពុជាគ្រប់អ្នកនាំចូលរថយន្តថ្មី ទាំងអ្នកផលិតនៅកម្ពុជាផង ត្រូវតែមានការវាយតម្លៃលើផលិតនោះ ដោយតម្រូវឱ្យយានយន្តធ្វើតេស្តស្របទៅតាមស្តង់ដាដែលត្រូវបានកំណត់។
លោកបន្តថា ក្នុងក្របខ័ណ្ឌអាស៊ាន និងនៅប្រទេសមួយចំនួនលើពិភពលោកកម្ពុជាបានឯកភាពគ្នាលើការធ្វើពាណិជ្ជកម្មយានយន្តដែលមុននឹងនាំចូលមកកម្ពុជាក៏ត្រូវតែគោរពតាមស្តង់ដារបស់កម្ពុជាផងដែរ។
លោកបានថ្លែងថា៖ «កិច្ចព្រមព្រៀងដែលយើងធ្វើយើងធ្វើតែទៅលើរថយន្តថ្មីទេ និងមិនធ្វើទៅលើរថយន្តជជុះ ឬរថយន្ត ១ ទឹក ឬ ២ ទឹកទេ ព្រោះរថយន្តប្រភេទនេះត្រូវបានផ្លាស់ប្តូរគ្រឿងបន្លាស់គ្រប់បែបយ៉ាង។ អ៊ីចឹងមិនអាចកំណត់បានទេ»។
លោក សឿន ដារ៉ា នាយកប្រតិបត្តិសហព័ន្ធឧស្សាហកម្មយានយន្តកម្ពុជាបានឱ្យដឹងនៅថ្ងៃទី ២១ ខែកញ្ញាថា សហព័ន្ធបានទទួលសេចក្តីជូនដំណឹងនេះរួចហើយ ព្រោះសហព័ន្ធ និងវិទ្យាស្ថានស្តង់ដាកម្ពុជាបានធ្វើកិច្ចការនេះជាមួយគ្នា។
លោកបន្តថា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានចេញបទប្បញ្ញត្តិបច្ចេកទេសសម្រាប់ផលិតផលយានយន្តក្នុងឆ្នាំ ២០១៦ ដើម្បីគ្រប់គ្រងការនាំចូលរថយន្តថ្មីឱ្យស្របតាមបទដ្ឋានបច្ចេកទេស និងស្តង់ដាដោយបានអនុវត្តតាំងពីថ្ងៃទី ១ ខែមករា ឆ្នាំមុនមក។
លោកបន្តថា រថយន្តថ្មីដែលបានផលិត និងនាំចូលមកកម្ពុជាត្រូវអនុវត្តនីតិវិធីស្នើសុំអាជ្ញាប័ណ្ណ ដើម្បីអាចមានសិទ្ធិប្រើប្រាស់និមិត្តសញ្ញាស្តង់ដាកម្ពុជា “សុវត្ថិភាព" លើរថយន្តថ្មី។
លោកថា បន្ទាប់ពីទទួលបានអាជ្ញាប័ណ្ណប្រើប្រាស់និមិត្តសញ្ញាស្តង់ដា "សុវត្ថិភាព" រថយន្តថ្មីនឹងត្រូវបំពាក់ជាមួយនិមិត្តសញ្ញា "S" ដើម្បីបញ្ជាក់ថា ពិតជាបានផលិត នាំចូល និងត្រួតពិនិត្យយ៉ាងត្រឹមត្រូវតាមបច្ចេកទេស។
យ៉ាងណាក្ដី លោកបញ្ជាក់ថា ប្រសិនបើរថយន្តថ្មីនោះមិនមានបំពាក់និមិត្តសញ្ញាសុវត្ថិភាព “S” ទេ មានន័យថា រថយន្តនោះពុំបានគោរពតាមបទដ្ឋានបច្ចេកទេសឡើយ។
លោកថា៖ «យើងស្វាគមន៍ការដាក់ចេញនូវបទប្បញ្ញត្តិបច្ចេកទេសសម្រាប់រថយន្តថ្មី និងចូលរួមអនុវត្តដើម្បីធានានូវប្រយោជន៍ដល់អ្នកប្រើប្រាស់ និងភាគីពាក់ព័ន្ធក្នុងឧស្សាហកម្មយានយន្តកម្ពុជា។ ក៏ប៉ុន្តែអ្វីដែលជាបញ្ហាប្រឈមនោះគឺការអនុវត្តបទប្បញ្ញត្តិបច្ចេកទេសធ្វើឡើងទៅលើតែក្រុមហ៊ុននាំចូលរថយន្តទទួលសិទ្ធិនាំចូល និងចែកចាយផ្តាច់មុខប៉ុណ្ណោះ»។
លោកបានបន្តថា៖ «ដោយឡែកក្រុមហ៊ុនដែលមិនទទួលបានសិទ្ធិផ្តាច់មុខអាចនាំចូលរថយន្តដោយពុំតម្រូវឱ្យស្នើសុំសិទ្ធិប្រើប្រាស់និមិត្តសញ្ញាស្តង់ដាកម្ពុជា "សុវត្ថិភាព" លើរថយន្ត ឬអនុវត្តបទប្បញ្ញត្តិបច្ចេកទេសនោះទេគឺអាចនាំចូលរថយន្តបានដោយងាយ»។
ពាក់ព័ន្ធនឹងបញ្ហានេះ លោក សឿន ដារ៉ា បានស្នើសុំដល់រាជរដ្ឋាភិបាលក៏ដូចជា វិទ្យាស្ថានស្តង់ដាកម្ពុជា គួរពិចារណាឡើងវិញក្នុងការអនុវត្តបទប្បញ្ញត្តិបច្ចេកទេស និងស្ដង់ដារថយន្តទាំងក្រុមហ៊ុនដែលទទួលបានសិទ្ធិផ្តាច់មុខ និងក្រុមហ៊ុនដែលមិនទទួលបានសិទ្ធិផ្តាច់មុខដោយតម្រូវឱ្យអនុវត្តតាមបទប្បញ្ញត្តិបច្ចេកទេសសម្រាប់ការនាំចូលគ្រប់រថយន្តថ្មីមកកម្ពុជា៕
វីដេអូ៖
