.jpg)
ស្ថានភាពជំនន់ទឹកភ្លៀងក្នុងស្រុកមង្គលបុរី ខេត្តបន្ទាយមានជ័យ។ រូបថត ក្រសួងព័ត៌មាន
ភ្នំពេញៈ ដំណាំដំឡូងមី និងដំណាំស្រូវរដូវវស្សាវគ្គ ២ សរុបប្រមាណជាង ៥ ០០០ ហិកតាក្នុងខេត្តបន្ទាយមានជ័យកំពុងរងផលប៉ះពាល់ ដោយជំនន់ទឹកភ្លៀង និងទឹកដែលហូរធ្លាក់ពីប្រទេសថៃ តាមដងអូរព្រំដែន និងប្រជាពលរដ្ឋជាង ៨០ គ្រួសារត្រូវបានជម្លៀសទៅកាន់ទីទួលសុវត្ថិភាព។ នេះបើតាមការអះអាងរបស់អាជ្ញាធរ និងមន្ត្រីជំនាញកាលពីថ្ងៃអង្គារ។
លោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ បានប្រាប់ភ្នំពេញប៉ុស្តិ៍ថា ជំនន់ទឹកភ្លៀង និងទឹកដែលហូរចាក់ពីតំបន់នានា តាមអូរព្រំដែនបានជន់លិច និងបង្កផលប៉ះពាល់ដំណាំដំឡូងមី និងស្រូវរដូវវស្សាវគ្គ ២ របស់ប្រជាកសិករជាច្រើនពាន់ហិកតា នៅក្នុងក្រុង-ស្រុកចំនួន ៥ នៃខេត្តបន្ទាយមានជ័យ រួមមានក្រុងប៉ោយប៉ែត ស្រុកមង្គលបុរី ថ្មពួក ម៉ាឡៃ និងស្រុកអូរជ្រៅ។
លោក វណ្ណាសេដ្ឋ បានបញ្ជាក់ថា គិតមកទល់ពេលនេះ ដំណាំដំឡូងមី សរុបជាង ២ ៥០០ ហិកតា បានរងផលប៉ះពាល់ និងខូចខាតជាង ១ ២៦០ ហិកតា ខណៈដំណាំស្រូវជាង ៤ ០០០ ហិកតា បានរងផលប៉ះពាល់ ហើយអាចប្រឈមការខូចខាតប្រមាណជាង ១០០ ហិកតាប្រសិនបើទឹកនៅតែបន្តជន់លិចក្នុងរយៈពេលយូរលើសពី ១០ ថ្ងៃឡើងទៅ។
លោក វណ្ណាសេដ្ឋ ថ្លែងថា ដំណាំស្រូវអាចធន់ទ្រាំនឹងការលិចលង់បានរហូតដល់ ២ សប្ដាហ៍ ទើបអាចស្អុយរលួយ ចំណែកដំឡូងមី គឺមិនអាចធន់ទ្រាំនឹងការជន់លិចបានយូរនោះទេ គឺ ក្នុងរយៈពេល ៣ ថ្ងៃយ៉ាងយូរមើមរបស់វានឹងស្អុយរលួយ ហេតុដូច្នេះប្រជាកសិករម្ចាស់ចម្ការ បានបង្ខំចិត្តដកយកមើមរបស់វាលក់ ដើម្បីដោះស្រាយជីវភាពគ្រួសារ និងកាត់រំលស់ការខាតបង់ទៅលើថ្លៃដើម។
ជាមួយគ្នានេះ លោក គាត ហ៊ុល អភិបាលក្រុងប៉ោយប៉ែតបានប្រាប់ភ្នំពេញប៉ុស្តិ៍ថា គិតត្រឹមរសៀលថ្ងៃទី ២១ ខែកញ្ញា ឆ្នាំ ២០២១ នេះ ក្រុមការងារនៃរដ្ឋបាលក្រុងប៉ោយប៉ែតបានជម្លៀសពលរដ្ឋពីតំបន់ដែលរងការជន់លិចទៅកាន់ទីទួលសុវត្ថិភាពសរុបជាង ៨០ គ្រួសារ និង កំពុងបន្តជួយអន្តរាគមន៍ កាយប្រឡាយបើកមុខទឹក ដើម្បីរំដោះទឹកចេញពីទីក្រុងពាណិជ្ជកម្មដ៏ធំបំផុតនៃខេត្តភាគពាយព្យប្រទេសកម្ពុជា។
ខណៈកំពុងដឹកនាំកម្លាំងអន្តរាគមន៍ចុះកាយប្រឡាយបើកមុខទឹកនៅចំណុច ភូមិប៉ាលេលេយ្យ ២ ក្នុងសង្កាត់ផ្សារកណ្ដាល លោក គាត ហ៊ុល បានបញ្ជាក់ថា៖ «នៅពេលនេះ ក្រុងប៉ោយប៉ែតទាំងមូលកំពុងបន្តជន់លិច និងហ៊ុមព័ទ្ធដោយជំនន់ទឹកភ្លៀង និងទឹកដែលហូរធ្លាក់ពីប្រទេសថៃ តាមដងអូរព្រំដែន។ ប្រជាពលរដ្ឋជាង ៨០ គ្រួសារហើយ ដែលត្រូវបានជម្លៀសទៅកាន់ទីទួលសុវត្ថិភាព។ ទន្ទឹមនឹងនេះក្រុមការងាររដ្ឋបាលក្រុងប៉ោយប៉ែតយើងនៅតែបន្តសកម្មភាពជីកស្ដារប្រព័ន្ធលូ និងកាយផ្ដាច់ផ្លូវលំមួយចំនួន ដើម្បីរំដោះទឹកចេញពីទីក្រុង និងកាត់បន្ថយផលប៉ះពាល់ផ្លូវ និងលំនៅឋានប្រជាពលរដ្ឋ»។
បើតាមលោក ហ៊ុល អាកាសធាតុនៅតែអួអាប់ និងមានភ្លៀងធ្លាក់ក្នុងកម្រិតមធ្យម ដែលធ្វើឱ្យកម្ពស់ទឹកនៅតាមអូរព្រំដែន និងអាងស្តុកទឹកមួយចំនួននៅក្នុងក្រុងប៉ោយប៉ែតបានបន្តជន់ឡើងលិចហៀរហូរលើដងផ្លូវ និងហូរចូលដល់លំនៅឋានពលរដ្ឋជាច្រើនគ្រួសារថែមទៀតក្នុងតំបន់ទីប្រជុំជននៃទីក្រុងនេះ។ ទោះជាយ៉ាងក៏ដោយមកទល់ពេលនេះ ជំនន់ទឹកភ្លៀងនៅមិនទាន់បង្កគ្រោះថ្នាក់ណាមួយដល់ជីវិតមនុស្ស និងសត្វនៅឡើយទេ។
ថ្វីបើយ៉ាងដូច្នេះក្ដីកំណាត់ផ្លូវជាច្រើនខ្សែត្រូវបានទឹកជន់លិច និងហូរកាត់ បណ្ដាលឱ្យមានការកកស្ទះចរាចរណ៍ទៅមករបស់ប្រជាពលរដ្ឋ និងត្រូវបានអាជ្ញាធរតម្រូវឱ្យមានការផ្អាកធ្វើដំណើរឆ្លងកាត់ជាបណ្ដោះអាសន្ន ដើម្បីកាត់បន្ថយការខូចខាតហេដ្ឋារចនាសម្ព័ន្ធផ្លូវធ្ងន់ធ្ងរ។
ជាក់ស្ដែងនៅស្រុកព្រៃឈរ ខេត្តកំពង់ចាម ជំនន់ទឹកភ្លៀងបានជន់លិចកំណាត់ផ្លូវជាតិលេខ ៧ ប្រមាណជាង ២០០ ម៉ែត្រ ចាប់ពីចំណុចវិទ្យាល័យអូរដា ដល់ភូមិអំពិលធំ ស្ថិតក្នុងឃុំខ្វិតធំ បានរងការជន់លិចត្រឹមជង្គង់ និងត្រូវបានអាជ្ញាធរតម្រូវឱ្យផ្អាកការធ្វើចរាចរណ៍រថយន្តដឹកទំនិញធំៗជាបណ្ដោះអាសន្ន។ នេះបើតាមការអះអាងរបស់លោក ឡោ ចាន់លី អភិបាលស្រុកព្រៃឈរ កាលពីថ្ងៃទី ២១ ខែកញ្ញា ឆ្នាំ ២០២១។
លោក ចាន់លី បាននិយាយថា៖ «ដើម្បីកាត់បន្ថយផលប៉ះពាល់ និងខូចខាតផ្លូវជាតិ រដ្ឋបាលស្រុកព្រៃឈរយើងបានសម្រេចឱ្យរថយន្តដឹកទំនិញធំៗ លើសពី ៣ តោនឡើងទៅ ត្រូវបើកតាមផ្លូវវាងជាបណ្ដោះអាសន្ន គឺចាប់ពីស្គន់ទៅសំពៅជ័យ ព្រោះនៅពេលនេះទឹកបានជន់លិចហូរកាត់ផ្លូវជាតិលេខ ៧ ត្រង់ចំណុចខាងលើនេះក្នុងជម្រៅជាង ៣ តឹក [ជាង ០,៣ ម៉ែត្រ] និងក្នុងរយៈចម្ងាយជាង ២០០ ម៉ែត្រឯណោះ»។
លោក ចាន់លី បានបន្តថា កម្លាំងរដ្ឋបាលស្រុកព្រៃឈរ បានសហការជាមួយមន្ទីរជំនាញបានប្រើគ្រឿងចក្រអេស្ការវ៉ាទ័រ កាយជាប្រឡាយបើកមុខទឹកឱ្យហូរធ្លាក់ទៅតាមដងអូរ វាលស្រែ និងបឹងបួមួយចំនួនដែលស្ថិតនៅផ្នែកខាងក្រោមភាគខាងជើងផ្លូវ ដែលមកទល់ពេលនេះ ក្រុមការងារបានកាយផ្ដាច់ផ្លូវខ្នងទំនប់ចំនួន ៦ កន្លែង ដើម្បីរំដោះទឹកពីផ្លូវជាតិ។
ជុំវិញករណីទឹកជន់លិចផ្លូវនេះផងដែរ លោក ហេង រតនា ប្រធានមជ្ឈមណ្ឌលកំចាត់មីនកម្ពុជា (ស៊ីម៉ាក់) បានលើកឡើងថា ផ្លូវ និងទំនប់ ដែលធ្វើជាប់ជាងគេ គឺនៅមណ្ឌលអភិវឌ្ឍន៍ស៊ីម៉ាក់មរតកតេជោស្រុកគាស់ក្រឡ ខេត្តបាត់ដំបង គឺធ្វើរាល់ឆ្នាំជួនកាល ១ ឆ្នាំធ្វើ ២ ដង ដោយទឹកជន់បាក់ទំនប់ និងដាច់ផ្លូវ។
លោក ហេង រតនា បានបញ្ជាក់ថា៖ «តំបន់នេះបើរដូវប្រាំងរកទឹកឱ្យគោផឹកគ្មាន តែរដូវវស្សា គឺងាកទឹកជន់លិចដាច់ផ្លូវៗមិនបន្ទោសធម្មជាតិ និងមនុស្សលោកនោះទេ មូលហេតុពិតប្រាកដដឹងអស់ហើយគឺមកពីអភិវឌ្ឍតាមលទ្ធភាព មិនតាមបច្ចេកទេសនោះទេ ហើយតំបន់ភ្នំ គឺទឹកជន់លឿនស្រកក៏លឿនណាស់ដែរ ហើយស្រកលឿនបំផុតព្រោះបាក់ទំនប់»។
ទន្ទឹមនឹងនេះ រដ្ឋបាលខេត្តបាត់ដំបងនៅថ្ងៃទី ២១ ខែកញ្ញានេះបានអំពាវនាវឱ្យពលរដ្ឋដែលរស់នៅតាមដងស្ទឹងសង្កែ បង្កើនការប្រុងប្រយ័ត្នអំពីការហក់ឡើងនៃកម្ពស់ទឹកស្ទឹងសង្កែ ខណៈភ្លៀងនៅតែបន្តធ្លាក់ជាបន្តបន្ទាប់នៅផ្នែកខាងលើ។
លោក មូល ធន ប្រធានរដ្ឋបាលខេត្តបាត់ដំបងបានប្រាប់ភ្នំពេញ-ប៉ុស្តិ៍ថា មកទល់ពេលនេះ ទឹកស្ទឹងសង្កែបានជន់ឡើងលឿនខុសប្រក្រតី ដែលធ្វើឱ្យមានការព្រួយបារម្ភយ៉ាងខ្លាំង ខណៈភ្លៀងនៅតែបន្តធ្លាក់ខ្លាំងនៅផ្នែកខាងលើដូចជានៅស្រុកសំឡូត ស្រុកបវេល និងស្រុកបាណន់ ភ្លៀងបានធ្លាក់ខ្លាំង ៣-៤ ថ្ងៃជាប់គ្នាមកហើយ ចាប់តាំងពីថ្ងៃទី ១៨ ខែកញ្ញាមកម្ល៉េះ។
លោក មូល ធន បាននិយាយថា៖ «ថ្វីបើពេលនេះ កម្ពស់ទឹកស្ទឹងសង្កែនៅមិនទាន់ជន់ឡើងដល់ចំណុចដែលត្រូវប្រកាសអាសន្នក៏ដោយ តែយើងចាំបាច់ត្រូវប្រកាសជូនដំណឹងដល់ពលរដ្ឋឱ្យមានការត្រៀមខ្លួនជាមុន ដើម្បីបង្ការទប់ស្កាត់ និងកាត់បន្ថយនូវគ្រោះថ្នាក់ឱ្យបានជាអតិបរមា»។
យោងតាមការព្យាកររបស់ក្រសួងធនធានទឹក និងឧតុនិយម ដែលបានចេញផ្សាយនៅថ្ងៃទី ២១ ខែកញ្ញានេះ ភ្លៀងនឹងបន្តធ្លាក់រាយប៉ាយក្នុងក្របខ័ណ្ឌទូទាំងប្រទេសរហូតដល់ថ្ងៃទី ២៨ ខែកញ្ញាខាងមុខនេះ និងអាចបង្កឱ្យមានជំនន់ទឹកភ្លៀងបន្ថែមទៀត នៅក្នុងតំបន់ទីទំនាបមួយចំនួនក្នុងភូមិសាស្ត្រ រាជធានីភ្នំពេញ ខេត្តកណ្ដាល កំពង់ស្ពឺ ព្រះសីហនុ កោះកុងពោធិ៍សាត់ បាត់ដំបង ប៉ៃលិន បន្ទាយមានជ័យ សៀមរាប ខេត្តព្រះវិហារ និងខេត្តឧត្តរមានជ័យ។
ការព្យាករនេះបានធ្វើឡើងបន្ទាប់ពីក្រុមមន្ត្រីជំនាញបានពិនិត្យឃើញប្រព័ន្ធសម្ពាធទាបកំពុងអូសកាត់លើតំបន់ជួរភ្នំដងរែក និងខ្ពង់រាបឦសាននៃប្រទេសកម្ពុជាជាមួយខ្យល់មូសុងនិរតីបក់ក្នុងល្បឿនលឿន ពិសេសចាប់ពីថ្ងៃទី ២៤ និង ២៥ សម្ពាធទាបសកម្ម និងវិសម្ពាធទាប ដែលបានកើតឡើងនៅប្រទេសហ្វីលីពីន នឹងបក់ចូលមកដល់ប្រទេសវៀតណាមភាគខាងជើង និងបន្តអូសកាត់ប្រទេសកម្ពុជា ភាគឦសាន៕
