ភ្នំពេញៈរដ្ឋបាលរាជធានីភ្នំពេញ បានសម្រេចបន្តផ្អាកបណ្តោះអាសន្នរយៈពេល ១៤ ថ្ងៃទៀត ចំពោះសកម្មភាពការងារ មុខរបរ ឬអាជីវកម្មដែលមានហានិភ័យខ្ពស់ក្នុងការឆ្លងរីករាលដាលជំងឺកូវីដ ១៩ និងការជួបជុំ ឬការប្រមូលផ្តុំមនុស្សជាលក្ខណៈឯកជនផងដែរ ដែលការអនុវត្តនឹងចាប់ផ្តើមពីថ្ងៃទី ២៤ ខែកញ្ញា ដល់ថ្ងៃទី ៧ ខែតុលា ក្នុងបំណងបន្តប្រយុទ្ធប្រឆាំងការរីករាលដាលជំងឺនេះ។
លោក ឃួង ស្រេង អភិបាលរាជធានីភ្នំពេញ បានចេញសេចក្តីសម្រេចនេះនារសៀលថ្ងៃទី ២២ ខែកញ្ញា ដោយលោកបានលើកឡើងថា គ្រឹះស្ថានសិក្សាសាធារណៈ និងឯកជន ដែលមិនទាន់មានគោលការណ៍អនុញ្ញាតឱ្យបើកដំណើរការឡើងវិញត្រូវបន្តបណ្តុះបណ្តាលតាមប្រព័ន្ធអនឡាញ។ ចំណែកអាជីវកម្មក្លិបកម្សាន្តគ្រប់ប្រភេទ ដូចជា ខារ៉ាអូខេ រង្គសាល កាស៊ីណូ រមណីយដ្ឋាន សារមន្ទីរ សួនកុមារ ហាងលក់ និងសេពគ្រឿង ស្រវឹងគ្រប់ប្រភេទ ក៏ត្រូវបន្តផ្អាកជាបណ្តោះអាសន្នផងដែរ។
លោក ឃួង ស្រេង បានបញ្ជាក់ថា ៖ «ក្នុងអំឡុងពេលនៃការបន្តដាក់ចេញវិធានការរដ្ឋបាល ត្រូវបានផ្អាកជាបណ្តោះអាសន្នការជួបជុំ ឬការប្រមូលផ្ដុំមនុស្សជាលក្ខណៈឯកជនដែលមានមនុស្សចូលរួមលើសពី ១៥ នាក់ លើកលែងតែក្នុងករណីចាំបាច់»។
អភិបាលក្រុងរូបនេះបានបន្តថា ត្រូវអនុវត្តវិធានការ សុវត្ថិភាពផ្នែកសុខាភិបាលឱ្យបានម៉ឺងម៉ាត់ ដូចជា កាតព្វកិច្ចពាក់ម៉ាស់ កាតព្វកិច្ចរក្សាគម្លាតសុវត្ថិភាព ការធ្វើអនាម័យ ការវាស់កម្ដៅ ការស្កេន QR Code ត្រូវអនុវត្តតាមការណែនាំរបស់ក្រសួងសុខាភិបាល សម្រាប់សកម្មភាពការងារ មុខរបរ និងអាជីវកម្មណាដែលមិនត្រូវបានហាមឃាត់។
លោក ឃួង ស្រេង បានបន្ថែមថា៖ «ត្រូវអនុវត្តទណ្ឌកម្មរដ្ឋបាល និងទណ្ឌកម្មច្បាប់ ចំពោះបុគ្គលល្មើសច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវី១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ដោយគ្មានការលើកលែងឡើយ ចំពោះបុគ្គលណា ដែលបំពានវិធានការនេះ»។
ជាមួយគ្នានេះ រដ្ឋបាលរាជធានីភ្នំពេញ ក៏បានលើកឡើងផងដែរថា ចំពោះទីតាំងដែលមានករណីវិជ្ជមានជំងឺកូវីដ ១៩ ដែលត្រូវបានបិទទីតាំងមុនពេលចូលជាធរមាននៃសេចក្តីសម្រេចនេះនិងទីតាំងដែលត្រូវបានអនុញ្ញាតឱ្យព្យាបាលអ្នកជំងឺកូវីដ ១៩ នៅតាមផ្ទះ គឺរដ្ឋបាលខណ្ឌទាំងអស់ មន្ទីរសុខាភិបាល និងមន្ទីរ អង្គភាពជំនាញពាក់ព័ន្ធ ត្រូវបន្តគ្រប់គ្រង និងចាត់វិធានការឱ្យបានចប់សព្វគ្រប់ ដើម្បីកាត់ផ្តាច់ឫសគល់នៃប្រភពចម្លងជំងឺនេះ។
ចំពោះទីតាំងដែលបានរកឃើញថា មានការឆ្លងរាលដាលជំងឺកូវីដ ១៩ មេរោគបំប្លែងខ្លួនថ្មី ប្រភេទដែលតា (Delta) អាជ្ញាធរពាក់ព័ន្ធ ត្រូវចាត់វិធានការឆ្លើយតបបន្ទាន់ សំដៅគ្រប់គ្រង និងកាត់ផ្តាច់កុំឱ្យឆ្លងទៅតំបន់ផ្សេងទៀត ព្រមទាំងត្រូវស្រាវជ្រាវរកអ្នកពាក់ព័ន្ធដោយផ្ទាល់និងដោយប្រយោល៕
វីដេអូ៖