.jpg)
ទិដ្ឋភាពអគ្គិភ័យឆេះផ្ទះកាលពីរំលងអធ្រាត្រឈានចូលថ្ងៃទី ២២ កញ្ញា។ រូបថត នគរបាលពន្លត់អគ្គិភ័យ
ភ្នំពេញៈ បុរសវ័យ ៧០ ឆ្នាំម្នាក់ ត្រូវបានក្រុមកម្លាំងនគរបាលសង្គ្រោះអគ្គិភ័យរាជធានីភ្នំពេញ ប្រទះឃើញស្លាប់ក្នុងបន្ទប់ផ្ទះល្វែងមួយកន្លែង នៅសង្កាត់វាលវង់ ខណ្ឌ៧មករា បន្ទាប់ពីមានករណីគ្រោះអគ្គិភ័យកើតឡើងកាលពីវេលាម៉ោង ១ និង ៤០ នាទីរំលងអធ្រាត្ រឈានចូលថ្ងៃទី ២២ ខែ កញ្ញា ឆ្នាំ ២០២១។
លោក ព្រំ យ៉ន ប្រធានការិយាល័យ បង្ការ ពន្លត់អគ្គិភ័យ និងសង្គ្រោះរាជធានីភ្នំពេញបានប្រាប់ភ្នំពេញប៉ុស្តិ៍ថា ជនរងគ្រោះឈ្មោះ ង្វៀង យ៉ាំងណាវ អាយុ៧០ឆ្នាំ ជាពលរដ្ឋខ្មែរដើមកំណើតវៀតណាម មានលំនៅផ្ទះលេខ ១៥៩E២z ផ្លូវលេខ ១៦៩ ភូមិ ៤ សង្កាត់វាលវង់ ខណ្ឌ៧មករា រាជធានីភ្នំពេញ។
លោកបានបញ្ជាក់ថា៖ «សពជនរងគ្រោះត្រូវបានក្រុមមន្ត្រីនគរបាលពន្លត់អគ្គិភ័យយើង ប្រទះឃើញស្លាប់ក្នុងបន្ទប់ផ្ទះល្វែងរបស់គាត់ទំហំ ៤ ម៉ែត្រ× ១២ ម៉ែត្រ ដែលរងការឆាបឆេះដោយគ្រោះអគ្គិភ័យ»។
លោក ជា សុខលាង នាយនគរបាលប៉ុស្តិ៍សង្កាត់វាលវង់ដែលបានចូលរួមពិនិត្យសពជនរងគ្រោះជាមួយក្រុមមន្ត្រីនគរបាលជំនាញផ្នែកកោសល្យវិច័យកាលពីព្រឹកថ្ងៃទី ២២ ខែ កញ្ញា ឆ្នាំ ២០២១ នោះ បានឱ្យដឹងថា ការស្លាប់របស់ជនរងគ្រោះខាងលើនេះត្រូវបានគេសន្និដ្ឋានថាបណ្ដាលមកពី «ស្រូបក្លិនឈ្ងៀមនៃផ្សែងភ្លើងច្រើនពេកបង្កឲ្យថប់ដង្ហើមស្លាប់»។
លោក សុខលាង បានបន្តថា មកទល់ពេលនេះសមត្ថកិច្ចជំនាញ នៅពុំទាន់ដឹងពីមូលហេតុច្បាស់លាស់ អំពីករណីគ្រោះអគ្គិភ័យនេះនៅឡើយទេ ខណៈសពជនរងគ្រោះ ត្រូវបាននាំយកទៅរក្សាទុកនៅវត្តទឹកថ្លា ក្នុងខណ្ឌ សែនសុខ ដើម្បីរង់ចាំក្រុមគ្រួសារសាច់ញាតិមកទទួលយកទៅរៀបចំពីធីបុណ្យសពតាមប្រពៃណី។
ទោះយ៉ាងណាក៏ដោយ លោកថា ករណីគ្រោះអគ្គិភ័យនោះ មិនបង្កឆេះរាលដាលដល់លំនៅឋានរបស់ពលរដ្ឋផ្សេងទៀតឡើយ ដោយក្រុមសមត្ថកិច្ចបានជួយអន្តរគមន៍បាញ់ទឹកពន្លត់ទាន់ពេលដោយប្រើប្រាស់រថយន្តពន្លត់អគ្គិភ័យចំនួន ៥ គ្រឿង និងប្រើប្រាស់ទឹកអស់ ២០ ម៉ែត្រគុប។
