ភ្នំពេញ: ការប្រឡងប្រជែងជ្រើសរើសក្របខ័ណ្ឌមន្ត្រីរាជការស៊ីវិល ២៤ រូប នៃក្រសួងព័ត៌មានក្នុងឆ្នាំ ២០២០ ដែលត្រូវបានពន្យារពេលដោយសារការរីករាតត្បាតនៃជំងឺកូវីដ ១៩ នឹងត្រូវប្រឡងនៅថ្ងៃទី ១៧ ខែ តុលា ឆ្នាំ ២០២១ នៅតាមមណ្ឌលប្រឡងដោយផ្ទាល់។
យោងតាមសេចក្ដីជូនដំណឹងរបស់ក្រសួងព័ត៌មាន ការប្រឡងជ្រើសរើសមន្ត្រីនៅថ្ងៃទី ១៧ ខែតុលា នឹងប្រព្រឹត្តទៅរយៈពេល ២ ម៉ោង នៅមណ្ឌលប្រឡងវិទ្យាល័យ ប៊ុនរ៉ានី ហ៊ុន សែន វត្តភ្នំ សម្រាប់ផ្នែកសារព័ត៌មានដែលនឹងធ្វើឡើងលើវិញ្ញាប្រឡងចំណេះដឹងទូទៅចាប់ពីម៉ោង ៨ ដល់ម៉ោង ១១:៣០ ព្រឹក។ ដោយឡែកផ្នែកព័ត៌មានវិទ្យានិងប្រព្រឹត្តទៅនៅថ្ងៃនិងម៉ោងដូចគ្នានៅទីស្ដីការក្រសួងព័ត៌មានដែលនឹងធ្វើឡើងលើវិញ្ញាសាប្រឡងចំណេះដឹងផ្នែកព័ត៌មានវិទ្យា។
លោក មាស សុភ័ណ្ឌ អ្នកនាំពាក្យក្រសួងព័ត៌មានបានប្រាប់ ភ្នំពេញ ប៉ុស្តិ៍ថា ការប្រឡងជ្រើសរើសបុគ្គលិកក្របខ័ណ្ឌក្រសួងព័ត៌មានក្នុងកូតាឆ្នាំ ២០២០ ដែលត្រូវលើកពេលមកប្រឡងក្នុងខែតុលា ឆ្នាំ ២០២១ គឺនឹងត្រូវជ្រើសរើសបេក្ខជនចូលបំពេញជំនាញព័ត៌មានវិទ្យាចំនួន ៨ រូប និងសារព័ត៌មានចំនួន ១៦ រូប។
លោកបានបញ្ជាក់ថា ចំនួនជ្រើសរើសមន្ត្រីក្របខ័ណ្ឌក្រសួងព័ត៌មានមានចំនួនប្រហាក់ប្រហែលនឹងឆ្នាំកន្លងទៅដោយពុំមានចំនួនខុសប្លែកគ្នាច្រើននោះទេ។
លោកបានបញ្ជាក់ថា៖ «ជាទូទៅការជ្រើសរើសមន្ត្រីចូលបម្រើការនៅក្នុងក្របខ័ណ្ឌថ្មីនៃទីស្ដីការក្រសួងនីមួយៗក៏ដូចជាក្រសួងព័ត៌មានហ្នឹងគឺវាអាស្រ័យទៅលើចំនួនមន្ត្រីដែលបានចូលនិវត្តន៍នៅតាមក្រសួងស្ថាប័ននីមួយៗក៏ដូចជានៅក្រសួងព័ត៌មាន។អ៊ីចឹងហើយចំនួនដែលយើងចូលនិវត្តន៍ប៉ុន្មានក្នុងមួយឆ្នាំអ៊ីចឹងយើងក៏ស្នើសុំនូវចំនួនដើម្បីបំពេញបន្ថែមឱ្យគ្រប់ទៅតាមចំនួនមន្ត្រីដែលបានចូលនិវត្តន៍តាមឆ្នាំនីមួយៗអ៊ីចឹងដែរ»។
លោកបានបន្តថា៖ «អ៊ីចឹងសម្រាប់ការជ្រើសរើសនេះគឺជាការជ្រើសរើសមន្ត្រីថ្មីក្នុងក្របខ័ណ្ឌឆ្នាំ ២០២០ សម្រាប់ឆ្នាំ ២០២១ នេះគឺយើងពុំមានការប្រឡងជ្រើសរើសមន្ត្រីចូលក្របខ័ណ្ឌថ្មីទេអ៊ីចឹងការប្រឡងជ្រើសរើសនៅពេលនេះ គឺជាការជ្រើសរើសទៅតាមចំនួនដែលបានកំណត់តាំងពី ២០២០ មកម្ល៉េះ»។
សេចក្តីជូនដំណឹងរបស់ក្រសួងព័ត៌មានបានសរសេរថា៖ «ថ្ងៃប្រឡងបេក្ខជនទាំងពីរភេទត្រូវភ្ជាប់មកជាមួយនូវបង្កាន់ដៃប្រឡង កាត ឬលិខិតសម្គាល់ថា បានចាក់វ៉ាក់សាំងរួចហើយក្នុងករណីដែលបេក្ខជនមិនអាចទទួលវ៉ាក់សាំងការពារជំងឺកូវីដ ១៩ បានត្រូវមានលិខិតបញ្ជាក់ពីមន្ទីរសុខាភិបាលរាជធានី-ខេត្ត»។
លោក មាស សុភ័ណ្ឌ បានលើកឡើងថា៖«ដើម្បីចូលរួមចំណែកជាមួយរាជរដ្ឋាភិបាលក៏ដូចជាក្រសួងសុខាភិបាលការត្រៀមលក្ខណៈប្រឡងនេះ គឺយើងនឹងអនុវត្តឱ្យបានខ្ជាប់ខ្ជួនទៅតាមវិធានការសុខាភិបាល ៣ កុំ ៣ ការពារ ហើយក៏មានការឱ្យបេក្ខជនបញ្ជាក់អំពីការទទួលបានការចាក់វ៉ាក់សាំងគ្រប់ដូសរួចមកហើយផងដែរ»។
លោកបានបន្តថា៖ «ទី២ ទាក់ទងនឹងទិដ្ឋភាពក៏ដូចជាដំណើរការនៃការប្រឡងវិញ គឺយើងបានរៀបចំនូវគណៈកម្មការប្រឡងមួយរបស់ក្រសួងព័ត៌មានហើយទន្ទឹមនឹងនោះក៏មានការចូលរួមពីក្រសួងស្ថាប័នពាក់ព័ន្ធ ដើម្បីចូលរួមត្រួតពិនិត្យទៅលើដំណើរការប្រឡងរហូតទៅដល់ចេញលទ្ធផលនេះផងដែរដូចជាការចូលរួមរបស់ក្រសួងមុខងារសាធារណៈជាដើម»។
កាលពីឆ្នាំ ២០១៩ កន្លងទៅ ក្រសួងព័ត៌មានបានជ្រើសរើសមន្ត្រីរាជការនិស្សិតឱ្យចូលបម្រើការងារក្នុងក្របខ័ណ្ឌក្រសួងព័ត៌មានចំនួន ២៤ នាក់ ដោយក្នុងនោះមានមុខជំនាញសារព័ត៌មានចំនួន ១៤ រូប និងមុខជំនាញព័ត៌មានវិទ្យាចំនួន ១០ រូប៕
រ៉ូ គីមឡុង