បន្ទាយមានជ័យៈ មកទល់ពេលនេះ ជំនន់ទឹកភ្លៀងកំពុងជន់លិចជាបន្តបន្ទាប់ នៅស្ទើរគ្រប់ក្រុង ស្រុក នៃខេត្តបន្ទាយមានជ័យ ខណៈពលរដ្ឋជាង ១០០ គ្រួសារ ត្រូវបានជម្លៀសទៅកាន់ទីទួលសុវត្ថិភាព។ ចំណែក បណ្ដាខេត្តដែលស្ថិតនៅជាប់ជួរភ្នំដងរែក ក៏កំពុងទទួលរងនូវជំនន់ទឹកភ្លៀងផងដែរ។ នេះបើតាមការអះអាងពីអាជ្ញាធរមូលដ្ឋាននៅថ្ងៃទី ២២ ខែកញ្ញា។
លោក ស្វាយ ជា អភិបាលស្រុកម៉ាឡៃប្រាប់ ភ្នំពេញ ប៉ុស្តិ៍ថា នៅពេលនេះ កម្លាំងសមត្ថកិច្ចនៃអង្គភាពពាក់ព័ន្ធក្រោមចំណុះរដ្ឋបាលស្រុកម៉ាឡៃកំពុងចុះអន្តរាគមន៍ជួយសង្គ្រោះគ្រួសារពលរដ្ឋមួយចំនួនទៅកាន់ទីទួលសុវត្ថិភាព បន្ទាប់ពីមានភ្លៀងធ្លាក់ខ្លាំងជាប់ៗគ្នា ៣-៤ ថ្ងៃ បង្កឱ្យមានការជន់លិចដាច់ផ្លូវជាច្រើនកន្លែង និងលិចប៉ះពាល់ផ្ទះប្រជាពលរដ្ឋប្រមាណជាង ៦៨០ ខ្នងក្នុងតំបន់អភិវឌ្ឍន៍ភូមិបឹងជង្រុកនៃឃុំទួលពង្រ ស្រុកម៉ាឡៃ ខេត្តបន្ទាយមានជ័យ។
លោកថ្លែងថា៖ «គិតត្រឹមរសៀល ថ្ងៃទី ២២ ខែកញ្ញា ២០២១ នេះក្រុមការងារយើងបានជួយអន្តរាគមន៍សង្គ្រោះពលរដ្ឋ ជាង ៣០ គ្រួសារទៅកាន់ទីទួលសុវត្ថិភាព និងរៀបចំសាងសង់ជម្រកតង់កៅស៊ូ ដើម្បីឱ្យពលរដ្ឋរងគ្រោះដោយទឹកជំនន់ស្នាក់នៅជាបណ្ដោះអាសន្ន»។
បើតាមលោក ស្វាយ ជា នៅរសៀលថ្ងៃពុធ ភ្លៀងបានបន្តធ្លាក់ខ្លាំងនៅតំបន់ផ្នែកខាងលើ ដែលជាតំបន់ប្រជុំភ្នំ ពិសេសនៅតំបន់ភ្នំដូនសំ ទឹកភ្លៀងដែលហូរធ្លាក់តាមជម្រាលភ្នំនេះ និងប្រជុំភ្នំផ្សេងទៀតក្នុងភូមិសាស្ត្រស្រុកម៉ាឡៃ បានជន់លិចហូរកាត់ផ្លូវ និងធ្វើឱ្យបាក់ស្ពានឈើ ១ កន្លែង នៅតាមបណ្ដោយផ្លូវលំចូលទៅក្នុងតំបន់អភិវឌ្ឍន៍ភូមិបឹងជង្រុកទាំងមូល។
លោកថាក្រុមអន្តរាគមន៍សង្គ្រោះរបស់រដ្ឋបាលស្រុកម៉ាឡៃ និងក្រុមអន្តរាគមន៍សង្គ្រោះរបស់គណៈកម្មាធិការជាតិគ្រប់គ្រងគ្រោះមហន្តរាយ រួមទាំងមន្ទីរអង្គភាពពាក់ព័ន្ធកំពុងកាយផ្ដាច់ផ្លូវលំចូលទៅក្នុងតំបន់អភិវឌ្ឍន៍បឹងជង្រុកចំនួន ៥ ទីតាំង ដើម្បីបើកមុខទឹកឱ្យហូរចាក់ទៅតាមប្រឡាយ បឹងបួ និងវាលស្រែមួយចំនួនដែលស្ថិតនៅផ្នែកខាងក្រោមនៃតំបន់នេះ។
ចំណែកលោក កែវ តារារស្មី អភិបាលរង និងជាអ្នកនាំពាក្យរដ្ឋបាលក្រុងប៉ោយប៉ែត ប្រាប់ភ្នំពេញប៉ុស្តិ៍ថា នៅពេលនេះ ប្រជាពលរដ្ឋចំនួន ១០៤ គ្រួសារហើយ ត្រូវបានជម្លៀសមកកាន់ទីទួលសុវត្ថិភាព ខណៈជំនន់ទឹកភ្លៀងនៅមិនទាន់ថមថយ បើទោះជាមន្ត្រីនៃអង្គភាពជំនាញបានកាយប្រឡាយបើកមុខទឹកឱ្យហូរធ្លាក់ទៅតាមប្រឡាយ ស្ទឹង បឹង ព្រែកមួយចំនួនដែលនៅផ្នែកខាងក្រោមក៏ដោយ។
លោកបញ្ជាក់ថា៖ «នៅពេលនេះ ក្រុមការងារយើងកំពុងរៀបចំសាងសង់ជម្រកតង់ ដើម្បីឱ្យប្រជាពលរដ្ឋចំនួន ១០៤ គ្រួសារដែលរងគ្រោះដោយជំនន់ទឹកភ្លៀងស្នាក់នៅជាបណ្ដោះអាសន្នក្នុងទីតាំងចំនួន ៣ រួមមាន នៅរ៉ារថភ្លើង សាលាកូរ៉េ និងបុរី KN។ ក្នុងកាលៈទេសៈនេះ ការជួយសង្គ្រោះពលរដ្ឋឱ្យរួចជីវិតពីគ្រោះមហន្តរាយធម្មជាតិទឹកជំនន់ គឺជាវិធានការចាំបាច់បំផុត ប៉ុន្តែយើងក៏ត្រូវតែគោរព និងអនុវត្តឱ្យបានជាប្រចាំនូវវិធានការ ៣កុំ ៣ការពារ ផងដែរ»។
ស្រដៀងគ្នានេះ លោក រ័ត្ន ដាស៊ីណង់ អភិបាលស្រុកមង្គលបុរី ប្រាប់ ភ្នំពេញ ប៉ុស្តិ៍ថា នៅពេលនេះ ទឹកស្ទឹងមង្គលបុរីបានហក់ឡើងដល់ ៨,៣ ម៉ែត្រ ដែលកម្រិតប្រកាសអាសន្ន ៩,១០ ម៉ែត្រ និងបានលិចប៉ះពាល់ផ្ទះប្រជាពលរដ្ឋជាង ៣០០ គ្រួសារ ក្នុងឃុំចំនួន ៤ គឺ ឃុំបត់ត្រង់ ឃុំរហាត់ទឹក ឃុំចំណោម និងឃុំសឿ ព្រមទាំងដំណាំស្រូវជាច្រើនរយហិកតាផងដែរ។
លោក ដាស៊ីណង់ បានថ្លែងថា៖ «ទោះយ៉ាងណា មកទល់ពេលនេះមានប្រជាពលរដ្ឋចំនួនជាង ១០ គ្រួសារប៉ុណ្ណោះ ដែលបាននាំគ្នាមកបោះតង់ស្នាក់នៅជាបណ្ដោះអាសន្ននៅលើទីទួលសុវត្ថិភាពក្នុងភូមិបត់ត្រង់»។
ទោះយ៉ាងណា ស្ថានភាពអាកាសធាតុនៅប្រទេសកម្ពុជា នាពេលនេះ ក៏កំពុងរងនូវឥទ្ធិពលជាប្រព័ន្ធសម្ពាធទាប និងខ្យល់មូសុងនិរតី ដែលបណ្ដាលឱ្យមានភ្លៀងធ្លាក់ច្រើនគ្របដណ្ដប់លើផ្ទៃប្រទេស។ បើតាមការព្យាកររបស់ក្រសួងធនធានទឹក និងឧតុនិយមនៅចុងសប្ដាហ៍នេះ ប្រព័ន្ធសម្ពាធទាបថ្មីមួយទៀត នឹងអូសកាត់ខេត្តភាគឦសាននៃប្រទេសកម្ពុជាដែលនាំឱ្យមានភ្លៀងធ្លាក់ខ្លាំងនៅតំបន់ ជួរភ្នំដងរែក និងខ្ពង់រាបឦសាន រហូតដល់ចុងខែកញ្ញានេះ។
ជុំវិញករណីនេះ លោក ជា ពិសិដ្ឋ ប្រធានគណៈកម្មការគ្រប់គ្រងគ្រោះមហន្តរាយនៃខេត្តឧត្តរមានជ័យបានប្រាប់ ភ្នំពេញ ប៉ុស្តិ៍ថា បណ្ដាញផ្លូវលំជនបទជាច្រើនខ្សែបានរងការខូចខាតដោយអន្លើដោយសារទឹកភ្លៀងជន់លិច និងហូរច្រោះកាត់ផ្លូវ។
លោកបានបញ្ជាក់ថា៖ «ភ្លៀងកាលពីយប់ថ្ងៃទី ២១ ខែកញ្ញា បានជន់លិចផ្លូវ និងផ្ទះប្រជាពលរដ្ឋមួយចំនួនក្នុងក្រុងសំរោង ដែលធ្វើឱ្យអាជ្ញាធរបង្ខំចិត្តប្រើគ្រឿងចក្រកាយប្រឡាយបើកមុខទឹកទាំងយប់ ដើម្បីកាត់បន្ថយការជន់លិច»។
ដោយឡែកនៅខេត្តកំពង់ឆ្នាំងក៏មានភ្លៀងធ្លាក់ច្រើននៅតំបន់ផ្ទៃរងទឹកភ្លៀង អាងស្ទឹងក្រាំងពន្លៃផងដែរ។ មកទល់ពេលនេះ បានបណ្តាលឱ្យមានជំនន់ទឹកភ្លៀង ហូរកាត់លើកំណាត់ផ្លូវជាតិលេខ ៥ ត្រង់ចំណុចគីឡូម៉ែត្រលេខ ៣៩-៤០ បង្កឱ្យមានការកកស្ទះចរាចរណ៍។ នេះបើតាមការអះអាងរបស់លោក វន ស៊ីផា អភិបាលស្រុកសាមគ្គីមានជ័យ។
លោក ជា ពិសិដ្ឋ បានថ្លែងថា៖ «កំណាត់ផ្លូវជាតិលេខ ៥ ត្រង់ចំណុចភូមិសាស្ត្រខាងលើនេះត្រូវបានទឹកហូរកាត់ ប៉ុន្តែមិនប៉ះពាល់ធ្ងន់ធ្ងរនោះទេគឺគ្រាន់តែប៉ះពាល់ដល់ការធ្វើចរាចរណ៍បន្តិចបន្តួចប៉ុណ្ណោះ។ នៅពេលនេះ ក្រុមការងារយើងកំពុងសហការជាមួយមន្ត្រីជំនាញនៃមន្ទីរធនធានទឹក និងឧតុនិយមខេត្តកំពង់ឆ្នាំង និងក្រុមការងារធ្វើផ្លូវជាតិលេខ ៥ បាននិងកំពុងអនុវត្តវិធានការមួយចំនួន ដើម្បីជួយរំដោះទឹកនោះឱ្យបានឆាប់ពីចំណុចខាងលើនេះ»៕