.jpg)
សមត្ថកិច្ចសម្រួលចរាចរណ៍ជូនប្រជាពលរដ្ឋទៅកាន់បិណ្ឌថ្ងៃទី១ នៅវត្តលង្កា កាលពីម្សិលមិញ។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន និងប្រធានរដ្ឋសភា លោក ហេង សំរិន នាថ្ងៃទី ២២ កញ្ញា ស្នើឱ្យអាជ្ញាធរគ្រប់លំដាប់ថ្នាក់ត្រូវយកចិត្តទុកដាក់ការពារសុវត្ថិភាព សន្តិសុខ សណ្តាប់ធ្នាប់សាធារណៈ និងសម្រួលចរាចរណ៍ ដើម្បីបង្កលក្ខណៈងាយស្រួលជូនប្រជាពលរដ្ឋ និងអ្នកទេសចរ ក្នុងអំឡុងពេលបុណ្យកាន់បិណ្ឌ និងភ្ជុំបិណ្ឌ ដែលប្រព្រឹត្តទៅចាប់ពីថ្ងៃទី ២២ ខែកញ្ញា ដល់ថ្ងៃទី ៦ ខែ តុលា ឆ្នាំ ២០២១។
លោក ហ៊ុន សែន បានលើកឡើងតាមហ្វេសប៊ុកផ្ទាល់ខ្លួនរបស់លោកថា ថ្ងៃទី ២២ ខែកញ្ញា ជាថ្ងៃកាន់បិណ្ឌ ១ នៃពិធីបុណ្យភ្ជុំបិណ្ឌ ដែលជាពិធីបុណ្យប្រពៃណីជាតិរបស់ខ្មែរ ដែលមានតាំងពីបុរាណកាលមក។ នេះជាពេលវេលាមួយដែលប្រជាពលរដ្ឋពុទ្ធបរិស័ទ មានឱកាសក្នុងការធ្វើបុណ្យទានសន្សំកុសល និងជួបជុំសាច់ញាតិបងប្អូននៅតាមទីកន្លែងជិតឆ្ងាយ ជាពិសេសតាមទីវត្តអារាមនានា។
លោកនាយករដ្ឋមន្ត្រីបញ្ជាក់ថា៖ «សូមអាជ្ញាធរគ្រប់លំដាប់ថ្នាក់ បង្កើនកិច្ចការពារសុវត្ថិភាព សន្តិសុខ សណ្តាប់ធ្នាប់សាធារណៈ របៀបរៀបរយ និងសម្រួលចរាចរណ៍ឱ្យបានល្អប្រសើរ ដើម្បីបង្កលក្ខណៈងាយស្រួលជូនដល់បងប្អូនប្រជាពលរដ្ឋ និងទេសចរ នៅក្នុងអំឡុងពេលបុណ្យភ្ជុំនេះ»។
ទន្ទឹមនឹងនេះ លោកក៏បានអំពាវនាវដល់ប្រជាពលរដ្ឋបន្តចូលរួមទប់ស្កាត់ការឆ្លងរីករាលដាលជំងឺកូវីដ ១៩ ដោយត្រូវអនុវត្តវិធានការ ៣កុំ និង៣ការពារ ឱ្យបានខ្ជាប់ខ្ជួនជានិច្ច។
លោក ហេង សំរិន ប្រធានរដ្ឋសភាជាតិក៏បានលើកឡើងដែរថា ដោយសារកម្ពុជាស្ថិតក្នុងគ្រាលំបាកពីការរាតត្បាតជំងឺកូវីដ ១៩ ការប្រារព្ធពិធីបុណ្យភ្ជុំបិណ្ឌ ប្រព្រឹត្តទៅដោយមានការប្រុងប្រយ័ត្នខ្ពស់។
លោកសរសេរលើហ្វេសប៊ុករបស់លោក នាថ្ងៃទី ២២ កញ្ញាថា៖ «សូមបងប្អូនជនរួមជាតិគោរពតាមរាល់ការណែនាំ និងវិធានការសុខាភិបាល ឬរដ្ឋបាលឱ្យបានខ្ពស់បំផុត ដោយប្រកាន់ឱ្យខ្ជាប់វិធានការ ៣កុំ ៣ការពារ ធ្វើយ៉ាងណាឱ្យការប្រារព្ធពិធីប្រពៃណីជាតិយើងបានដំណើរការទៅដោយរលូន ជ្រះថ្លា និងចៀសឆ្ងាយពីជំងឺកូវីដ ១៩»។
ពិធីបុណ្យភ្ជុំបិណ្ឌ ជាបុណ្យប្រពៃណីប្រចាំឆ្នាំដ៏ធំរបស់កម្ពុជា ដែលបានប្រារព្ធធ្វើតាំងពីបុរាណកាលមក ដើម្បីតបស្នងសងគុណលោកអ្នកមានគុណមានឪពុកម្តាយ ជីដូនជីតា និងដើម្បីឧទ្ទិសបុណ្យកុសល ដល់ពពួកញាតិ និងជីដូនជីតាទាំងឡាយ ដែលបានចែកស្ថានទៅហើយ តាមរយៈការឧទ្ទិសកុសលផលបុណ្យដោយប្រគេននូវចង្ហាន់ និងទេយ្យវត្ថុផ្សេងៗ ចំពោះព្រះសង្ឃ ដែលបានគង់ចាំព្រះវស្សាតាមទីវត្តអារាមនានា។
ជាងនេះទៀត លោក ហេង សំរិន ក៏បានស្នើឱ្យអាជ្ញាធរគ្រប់លំដាប់ថ្នាក់ បង្កើនកិច្ចការពារសុវត្ថិភាព សន្តិសុខ សណ្តាប់ធ្នាប់សាធារណៈ របៀបរៀបរយ និងសម្រួលចរាចរណ៍ឱ្យបានល្អប្រសើរ ដើម្បីបង្កលក្ខណៈងាយស្រួលជូនដល់ប្រជាពលរដ្ឋ និងទេសចរក្នុងអំឡុងពេលបុណ្យភ្ជុំនេះ។
ក្រសួងធម្មការ និងសាសនាបានអនុញ្ញាតឱ្យប្រជាពលរដ្ឋប្រារព្ធពិធីបុណ្យកាន់បិណ្ឌ និងភ្ជុំបិណ្ឌ ប៉ុន្តែត្រូវតែអនុវត្តតាមវិធានការសុខាភិបាល ពិសេសវិធានការ ៣ការពារ និង៣កុំ ដើម្បីកុំឱ្យមានការឆ្លងរាលដាលវីរុសកូវីដ ១៩។
រដ្ឋមន្ត្រីក្រសួងធម្មការ និងសាសនា លោក ឈិត សុខុន បានលើកឡើងថា ដើម្បីរៀបចំបុណ្យកាន់បិណ្ឌឱ្យដំណើរការ និងប្រព្រឹត្តទៅស្របតាមទំនៀមទម្លាប់ និងប្រពៃណីព្រះពុទ្ធសាសនា គ្រប់មន្ទីរធម្មការ និងសាសនា និងគ្រប់វត្តអារាមទាំងអស់ ត្រូវចូលរួមបដិបត្តិតាមសេចក្តីណែនាំនានារបស់រាជរដ្ឋាភិបាល ក្រសួងសុខាភិបាល និងអាជ្ញាធរដែនដី តាមសភាពជាក់ស្តែងនៃទីកន្លែងនីមួយៗ ដើម្បីទប់ស្កាត់ការឆ្លងរាលដាលជំងឺកូវីដ ១៩ នេះ។
លោកបញ្ជាក់ថា៖ «គ្រប់មន្ទីរធម្មការ និងសាសនា រាជធានីខេត្ត ត្រូវយកចិត្តទុកដាក់បង្កលក្ខណៈឱ្យបានល្អប្រសើរប្រគេន ព្រះសង្ឃ ជូនពុទ្ធបរិស័ទប្រារព្ធពិធីកាន់បិណ្ឌ ភ្ជុំបិណ្ឌ និងកឋិនទាន ស្របតាមប្រពៃណី ព្រះពុទ្ធសាសនា ដោយក្នុងនោះត្រូវអនុវត្តនូវវិធានការពាក់ម៉ាស់ វាស់កម្ដៅ រក្សាអនាម័យ លាងដៃ សាប៊ូ ឬអាល់កុល ជែល និងរក្សា គម្លាតសុវត្ថិភាពសង្គមបុគ្គល និងវិធានការ ៣កុំ ៣ការពារ»។
គួរបញ្ជាក់ថា សម្រាប់រាជធានី ភ្នំពេញ ស្នងការដ្ឋាននគរបាលរាជធានីក៏បានត្រៀមកងកម្លាំងជិត ២ ០០០ នាក់ សម្រាប់ត្រៀមការពារនៅតាមចំណុចសំខាន់ៗមួយចំនួន ពិសេសនៅតាមវត្តអារាមជាង ១៥០ ក្នុងរាជធានីភ្នំពេញ និងនៅតាមច្រកចេញចូលក្នុងទីក្រុង ដើម្បីសម្រួលចរាចរណ៍ដល់ប្រជាពលរដ្ឋក្នុងពេលធ្វើដំណើរទៅវត្តអារាមនានាផងដែរ៕
