ភ្នំពេញៈ វ៉ាក់សាំងកូវីដ ១៩ ប្រភេទស៊ីណូវ៉ាក់ចំនួន ៣ លានដូស ដែលជាការបញ្ជាទិញរបស់រាជរដ្ឋាភិបាលម្ពុជាពីសាធារណរដ្ឋប្រជាមានិតចិន នឹងដឹកមកដល់ប្រទេសកម្ពុជានៅព្រឹកថ្ងៃទី ២៤ ខែកញ្ញា ស្អែកនេះ ហើយវ៉ាក់សាំងជាច្រើនលានដូសទៀតនឹងដឹកមកដល់ជាបន្តបន្ទាប់ទៀត។ នេះបើតាមការបញ្ជាក់ពីលោកស្រី យក់ សម្បត្តិ រដ្ឋលេខាធិការក្រសួងសុខាភិបាលនាព្រឹកថ្ងៃទី ២៣ ខែកញ្ញានេះ។
លោកនាយករដ្ឋមន្ត្រី ហ៊ុន សែន បានប្រកាសកាលពីចុងសប្តាហ៍មុនក្នុងពិធីបើកយុទ្ធនាការថ្នាក់ជាតិ ចាក់វ៉ាក់សាំងការពារជំងឺកូវីដ ១៩ ជូនដល់កុមារអាយុចាប់ពី ០៦ ឆ្នាំ ដល់អាយុក្រោម ១២ ឆ្នាំថា ក្នុងខែកញ្ញានេះ វ៉ាក់សាំងចំនួន ៩ លានដូសនឹងដឹកមកដល់ប្រទេសកម្ពុជា ទាំងវ៉ាក់សាំងបញ្ជាទិញ និងការផ្តល់ជូនរបស់ប្រទេសចិន។
លោកបានបញ្ជាក់ទៀតថា វ៉ាក់សាំងចំនួន ៣ លានដូស នឹងដឹកមកដល់ថ្ងៃទី ២៦ ឬ ២៧ ខែកញ្ញានេះ៕