.jpg)
មន្ត្រីជំនាញបំពាក់កាមេរ៉ាត្រួតពិនិត្យចរាចរណ៍តាមស្ដុបកន្លងមក។ ហេង ជីវ័ន
ភ្នំពេញៈ ខណៈប្រទេសកម្ពុជា កំពុងមានការអភិវឌ្ឍ ពិសេសហេដ្ឋារចនាសម្ព័ន្ធផ្លូវថ្នល់ លោក ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានលើកឡើងនូវយុទ្ធសាស្ត្រកាត់បន្ថយការប្រើប្រាស់កងកម្លាំងនគរបាលចរាចរណ៍ឈរនៅតាមដងផ្លូវដោយជំនួសមកនូវការប្រើប្រាស់សម្ភារឧបករណ៍បច្ចេកទេស ដូចជាប្រព័ន្ធកាមេរ៉ាគំនូស និងស្លាកសញ្ញាចរាចរណ៍ជំនួសវិញ។
លោក ស ខេង លើកឡើងនូវផែនការយុទ្ធសាស្ដ្រនេះក្នុងពេលលោកធ្វើជាអធិបតីដឹកនាំកិច្ចប្រជុំបូកសរុបការងារសុវត្ថិភាពចរាចរណ៍ផ្លូវគោកឆមាសទី១ និងលើកទិសដៅការងារឆមាសទី២ ឆ្នាំ ២០២១ របស់គណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ.) តាមប្រព័ន្ធវីដេអូហ្ស៊ូមជាមួយមន្ដ្រីពាក់ព័ន្ធតាមបណ្ដាក្រសួង ស្ថាប័ន និងរដ្ឋបាលរាជធានី-ខេត្ដសរុបប្រមាណ ១៦៤ នាក់ កាលពីថ្ងៃទី ២១ កញ្ញា ។
លោកថ្លែងថា ផ្អែកលើរបាយការណ៍ប្រចាំថ្ងៃគិតជាមធ្យមក្នុង ១ ថ្ងៃ ហេតុការណ៍គ្រោះថ្នាក់ចរាចរណ៍កើតឡើងប្រមាណ ៧ លើក ធ្វើឱ្យមនុស្សស្លាប់ប្រមាណ ៤ នាក់ និងរបួសប្រមាណ ១០ នាក់ ដែលស្ថានភាពនេះនៅតែជាក្ដីបារម្ភ និងជាកម្មវត្ថុដែលគ្រប់យន្តការពាក់ព័ន្ធទាំងអស់ត្រូវសិក្សាដកពិសោធបន្ថែមទៀត ដើម្បីដាក់ចេញនូវវិធានការឱ្យកាន់តែមានប្រសិទ្ធភាពសំដៅពង្រឹងនូវសុវត្ថិភាពចរាចរណ៍ផ្លូវគោកឱ្យសម្រេចបានតាមបំណងប្រាថ្នាដែលបានកំណត់។
លោកថ្លែងថា៖ «យើងមិនអាចចេះតែរើសកម្លាំងប៉ូលិសបន្ថែមជារៀងរហូត អ៊ីចឹងទេ។ យើងត្រូវមានការគិតគូរមួយថា កាត់បន្ថយនូវក្របខ័ណ្ឌមន្ដ្រីរាជការ មុខងារសាធារណៈ ដែលក្នុងនោះមាននគរបាលចរាចរណ៍ផងដែរ។ អ៊ីចឹងដើម្បីកាត់បន្ថយបានការប្រើមនុស្ស វាមានឧបករណ៍សម្ភារបច្ចេកទេស កាមេរ៉ាសុវត្ថិភាព ហើយផ្លូវមានគំនូស ប៉ូលិសយើងមានមធ្យោបាយដើម្បីនឹងធ្វើការ។ នេះជាគោលដៅយុទ្ធសាស្ដ្ររបស់យើងត្រូវក្ដាប់អាហ្នឹងឱ្យជាប់»។
លោក ស ខេង លើកឡើងថា ប្រជាពលរដ្ឋកាលណាឃើញប៉ូលិសច្រើនមានការខ្លាចប៉ូលិស ទើបមានការប្រុងប្រយ័ត្ន។ ប៉ុន្ដែពេលគ្មានប៉ូលិសក៏នាំគ្នាមិនខ្លាចករណីគ្រោះថ្នាក់ចរាចរណ៍ មិនគោរពច្បាប់។ ដូច្នេះបានន័យថា ការភ្ញាក់រឭករបស់ប្រជាពលរដ្ឋ គឺនៅមិនទាន់មានទេ។
លោកបន្ថែមថា ការភ្ញាក់រឭករបស់ប្រជាពលរដ្ឋ បើគ្រាន់តែផ្សព្វផ្សាយ គ្រាន់តែនិយាយគឺមិនគ្រប់គ្រាន់ទេ។ ការធ្វើបែបនេះ ពេលខ្លះពលរដ្ឋទទួលបាន ពេលខ្លះក៏មិនទទួលបាន។ ប៉ុន្ដែសម្រាប់ការអនុវត្ដច្បាប់ ពលរដ្ឋមិនអាចឆ្លើយថា មិនបានឮ មិនបានដឹងទេ។
លោក ស ខេង បញ្ជាក់ថា៖ «យើងធ្វើម៉េចឱ្យគាត់ភ្ញាក់រឭកខ្លួនឯង អាហ្នឹងជាមធ្យោបាយមួយ ជាកត្តា ១ គន្លឹះ។ អ្នកបើកបរ អ្នកធ្វើដំណើរតាមដងផ្លូវត្រូវគោរពច្បាប់»។
លោកបន្តថា៖ «គោលដៅរបស់យើងធ្វើម៉េចដើម្បីឱ្យសុវត្ថិភាពចរាចរណ៍វាល្អប្រសើរ។ ខ្ញុំមិនបោះបង់ទេការប្រើកម្លាំងនគរបាលចរាចរណ៍ ក៏ប៉ុន្ដែយើងមិនត្រូវពឹងផ្អែកទៅលើកម្លាំងចរាចរណ៍មនុស្សជាក់ស្ដែងច្រើនពេកទេ។ បើមិនអ៊ីចឹងទេក្របខ័ណ្ឌនៅភ្នំពេញដាក់ប៉ុន្មានក៏មិនឈ្នះដែរ។ ណាមួយចរាចរណ៍ផង ណាមួយបញ្ហាផ្សេងៗទៀតផងគឺមិនអាចគ្រប់ទេ។ អ៊ីចឹងហើយមានតែការយកចិត្ដទុកដាក់ដើម្បីធ្វើអាហ្នឹង (ដាក់កាមេរ៉ាស្លាក និងគំនូសចរាចរណ៍) ខេត្ដផ្សេងទៀតក៏ដូចគ្នាដែរ»។
លោកស្នើឱ្យមានការឯកភាពគ្នា ជាគោលការណ៍រួមជាយុទ្ធសាស្ដ្ររួម ដើម្បីឈានទៅកាត់បន្ថយនគរបាលចរាចរណ៍ ហើយជំនួសដោយសម្ភារ ឧបករណ៍បច្ចេកទេស ដូចជាប្រព័ន្ធគ្រប់គ្រងតាមរយៈ កាមេរ៉ាសុវត្ថិភាពជាដើម។ លោកក៏បានស្នើឱ្យមានការគិតគូររវាងការចំណាយថវិកាដើម្បីនឹងបំពាក់ឧបករណ៍ សម្ភារបច្ចេកទេសនៅតាមដងផ្លូវ មានស្លាកសញ្ញា ភ្លើងស្ដុប គំនូសចរាចរណ៍ និងកាមេរ៉ាជាដើមទៅនឹងការចំណាយថវិកាលើការបង្កើនកម្លាំងនគរបាល កម្លាំងជាក់ស្ដែង ដើម្បីធ្វើការគ្រប់គ្រងបញ្ហាចរាចរណ៍នេះ តើមួយណាជាយុទ្ធសាស្ដ្រជាងមួយណា ហើយមួយណាចំណេញជាង?
លោក ស ខេង បញ្ជាក់ថា៖ «និយាយអ៊ីចឹងមិនមែនថា អត់មានប៉ូលិសទេ ប៉ូលិសត្រូវតែមាន ក៏ប៉ុន្ដែគេកាត់បន្ថយ។ ឧទាហរណ៍ពីមុនមកគេប្រើ ១០ នាក់ ឥឡូវគេប្រើតែ ២ នាក់ ដើម្បីគ្រប់គ្រងផ្លូវ ហើយចាប់ត្រង់ណាក៏បានដែរ។ ប៉ូលិស តែកាលណាដូរមកជាក្របខ័ណ្ឌមន្ដ្រីរាជការ ចូលមកគឺ ១ ជីវិតហើយ។ ចំណាយថវិការដ្ឋ គឺត្រូវដោះស្រាយ ១ ជីវិតសម្រាប់គាត់ ប្រាក់ខែប្រាក់អីសម្រាប់គាត់។ សម្ភារក៏ត្រូវចំណាយដែរ ប៉ុន្ដែចំណាយធំ ម្ដងវាចប់។ ប៉ុន្ដែយ៉ាងណាក៏ដោយយើងខិតខំអាហ្នឹង។ ប្រើប៉ូលិសតិច ប៉ុន្ដែមានប្រសិទ្ធភាពខ្ពស់ចង់បានអ៊ីចឹង»។
លោកបានថ្លែងថារាជធានីភ្នំពេញ ហើយនិងបណ្ដាខេត្ដដែលធំៗ ត្រូវតែរៀបចំគំនូសសញ្ញានៅក្នុងក្រុង ទីប្រជុំជន។ ចំណែកក្រសួងសាធារណការ និងដឹកជញ្ជូន គឺថាទទួលខុសត្រូវលើគំនូសសញ្ញាថ្នល់ជាតិ។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជាលើកឡើងថា ស្របពេលដែលមានការវិវឌ្ឍជាវិជ្ជមានគួរឱ្យកត់សម្គាល់មួយចំនួនក្នុងកិច្ចខិតខំលើកកម្ពស់សុវត្ថិភាពចរាចរណ៍នៅកម្ពុជា គ្រោះថ្នាក់ចរាចរណ៍នៅតែជាបញ្ហាប្រឈមដ៏ធ្ងន់ធ្ងរបំផុតមួយសម្រាប់ប្រទេសកម្ពុជា ដោយក្នុង ១ ថ្ងៃៗ គ្រោះថ្នាក់នេះបានសម្លាប់ជីវិតមនុស្ស និងបង្កឱ្យមានការរងរបួសធ្ងន់ស្រាលជាច្រើននាក់ ព្រមទាំងបន្សល់ទុកនូវផលវិបាកជាច្រើនដល់ក្រុមគ្រួសារជនរងគ្រោះ និងសង្គមជាតិ។
លោកបានថ្លែងថា៖ «ខ្ញុំគាំទ្រប្រសាសន៍របស់សម្ដេចក្រឡាហោម ស ខេង ដែលបានលើកឡើងនេះ ដោយសារតែយើងមានមន្ដ្រីនគរបាលរបស់យើងច្រើនឈរនៅតាមដងផ្លូវនៅក្នុងការអនុវត្ដច្បាប់។ ការដាក់មន្ដ្រីនគរបាលឈរជើងច្រើនបែបនេះ វាល្អផង វាមានបញ្ហាអវិជ្ជមានផង។ បញ្ហាអវិជ្ជមានគឺរូបភាព និងងាយបង្កើតបាតុភាពផ្សេងៗនៅពេលធ្វើការពង្រឹងការអនុវត្ដច្បាប់ ដែលកន្លងទៅយើងក៏ធ្លាប់បានឃើញកើតមានឡើងហើយ»។
លោក បញ្ញា ស្នើឱ្យរាជរដ្ឋាភិបាលសិក្សាបន្ថែមពីប្រទេសជិតខាង ដែលបានអនុវត្ដជោគជ័យរួចហើយ ទាក់ទងនឹងការបំពាក់ប្រព័ន្ធ កាមេរ៉ា ឬឧបករណ៍ សម្ភារបច្ចេកទេសសម្រាប់គ្រប់គ្រងបញ្ហាចរាចរណ៍នៅលើដងផ្លូវនេះ។ ការអនុវត្ដបច្ចេកទេសថ្មី ឬវិធីសាស្ដ្រថ្មីនេះ គួរធ្វើឡើងជាជំហានៗ ដើម្បីដកស្រង់នូវចំណុចល្អ និងចំណុចខ្វះខាត សម្រាប់យកទៅអនុវត្ដទូទាំងប្រទេស។
លោកថ្លែងថា៖ «អាចយកភូមិសាស្ដ្រខណ្ឌណា ១ ឬ ២ មកអនុវត្ដសាកល្បងមើល តើការកាត់បន្ថយកម្លាំងនគរបាល ដោយជំនួសមកប្រើប្រាស់ប្រព័ន្ធកាមេរ៉ា និងឧបករណ៍ សម្ភារបច្ចេកទេសសម្រាប់ការគ្រប់គ្រងនេះទទួលបានលទ្ធផលបែបណា?»៕
វីដេអូ៖
