តូក្យៈ រាជរដ្ឋាភិបាលជប៉ុនបានសម្រេចកែសម្រួលវិធានការព្រំដែនដោយបានដកប្រទេសកម្ពុជា ចេញពីបញ្ជីប្រទេសដែលតម្រូវឲ្យធ្វើចត្តាឡីស័ក ៣ ថ្ងៃ នៅកន្លែងដែលរៀបចំដោយប្រធានចត្តាឡីស័កជប៉ុន ហើយត្រូវធ្វើតេស្តនៅថ្ងៃទី៣ ដោយប្ដូរឱ្យទៅធ្វើចត្តាឡីស័កនៅតាមផ្ទះរៀងៗខ្លួនរយៈពេល ១៤ ថ្ងៃវិញ។ នេះបើតាមសេចក្តីជូនដំណឹងរបស់ស្ថានឯកអគ្គរាជទូតក្រកម្ពុជាប្រចាំនៅប្រទេសជប៉ុន។
សេចក្តីជូនដំណឹងចុះថ្ងៃទី ២៣ ខែ កញ្ញា ឆ្នាំ ២០២១ ដែលបានជម្រាបដល់ពលរដ្ឋខ្មែរដែលកំពុងរស់នៅ ធ្វើការ និងសិក្សានៅប្រទេសជប៉ុននេះបានឱ្យដឹងថា វិធានការនេះចាប់អនុវត្តពីថ្ងៃទី ២០ ខែ កញ្ញា ឆ្នាំ ២០២១ តទៅ។ ដូច្នេះអ្នកដំណើរមកពីប្រទេសកម្ពុជា នឹងត្រូវបានអនុញ្ញាតឱ្យធ្វើចត្តាឡីស័កនៅកន្លែងផ្ទាល់ខ្លួនឱ្យបានគ្រប់ ១៤ ថ្ងៃ។
ស្ថានឯកអគ្គរាជទូតកម្ពុជាប្រចាំប្រទេសជប៉ុន បានអំពាវនាវដល់បងប្អូនពលរដ្ឋខ្មែរ ចូលរួមសហការ និងប្រតិបត្តិតាមការអំពាវនាវរបស់អាជ្ញាធរមានសមត្ថកិច្ចជប៉ុន និងកម្ពុជា និងបង្កើនស្មារតីប្រុងប្រយ័ត្នខ្ពស់ជាប់ជានិច្ច និងសូមថែរក្សាសុខភាព ប្រកាន់ខ្ជាប់នូវអនាម័យល្អ ពាក់មាស់ជាប្រចាំ ចៀសវាសការជួបជុំគ្នាច្រើន រក្សាគម្លាតពេលមានការជួបជុំគ្នាច្រើន។
សេចក្ដីជូនដំណឹងនេះបានបន្ថែមថា ទទួលបានដំណឹងនេះស្ថានទូតសូមបងប្អូនមេត្តាជួយផ្សព្វផ្សាយបន្ត និងសូមជូនពរបងប្អូនទាំងអស់ មានសុខភាពល្អ និងចៀសផុតពីការឆ្លងវីរុសកូវីដ ១៩៕