The Phnom Penh Post Search

Search form

Logo of Phnom Penh Post newspaper Phnom Penh Post - គ.ជ.ប កំពុង​ចែក​លិខិត​ឱ្យ​ពលរដ្ឋ​ទៅពិនិត្យ​ឈ្មោះ​ក្នុង​បញ្ជី​ឈ្មោះ​បោះឆ្នោត​ឆ្នាំ​ ២០២១




គ.ជ.ប កំពុង​ចែក​លិខិត​ឱ្យ​ពលរដ្ឋ​ទៅពិនិត្យ​ឈ្មោះ​ក្នុង​បញ្ជី​ឈ្មោះ​បោះឆ្នោត​ឆ្នាំ​ ២០២១

Content image - Phnom Penh Post
គណៈកម្មាធិការ​ជាតិ​រៀបចំ​ការបោះឆ្នោត ក្នុង​កិច្ចប្រជុំ​កាលពីម្សិលមិញ។ រូបថត NEC

គ.ជ.ប កំពុង​ចែក​លិខិត​ឱ្យ​ពលរដ្ឋ​ទៅពិនិត្យ​ឈ្មោះ​ក្នុង​បញ្ជី​ឈ្មោះ​បោះឆ្នោត​ឆ្នាំ​ ២០២១

ភ្នំពេញៈ គណៈកម្មាធិការ​ជាតិ​រៀបចំ​ការបោះឆ្នោត (​គ.ជ.ប) បាននិង​កំពុង​ចែក​លិខិតអញ្ជើញ​ប្រជាពលរដ្ឋ​ដែលមាន​ឈ្មោះ​នៅក្នុង​បញ្ជី​បោះឆ្នោត​ឆ្នាំ​ ២០២០ ឱ្យទៅ​ពិនិត្យ​បញ្ជី​ឈ្មោះ​បោះឆ្នោត ឆ្នាំ​ ២០២១ ដែល​នឹង​ចាប់ផ្តើម​នៅ​ថ្ងៃទី​ ១២ ខែតុលា ដល់​ថ្ងៃទី​ ៣០ ខែវិច្ឆិកា ឆ្នាំ​ ២០២១​។

លោក នុត សុខុម អនុប្រធាន​ គ.ជ.ប ថ្លែង​នៅក្នុង​កិច្ចប្រជុំ​ផ្សាយ​ជាមួយ​ភាគី​ពាក់ព័ន្ធ​នៅ​ថ្ងៃទី​ ២២ ខែកញ្ញា ឆ្នាំ​ ២០២១ នេះ​ឱ្យដឹងថា ការចែក​លិខិតអញ្ជើញ​ប្រជាពលរដ្ឋ​ត្រូវបាន​ធ្វើឡើង​ចាប់ពី​ថ្ងៃទី​ ១២ ខែកញ្ញា ដល់​ថ្ងៃទី​ ១១ ខែតុលា ឆ្នាំ ២០២១ ក្នុង​គោលដៅ​ដើម្បី​ជម្រាប​ជូនដំណឹង​ដល់​ប្រជាពលរដ្ឋ ដែល​មាន​ឈ្មោះ​នៅក្នុង​បញ្ជី​បោះឆ្នោត​ផ្លូវការ​ឆ្នាំ​ ២០២០ ឱ្យ​ពិនិត្យ​ឈ្មោះ​របស់ខ្លួន​នៅតាម​ឃុំ-សង្កាត់​ដែល​ខ្លួន​កំពុង​​រស់នៅ​។

លោក នុត សុខុម បន្តថា គិត​ត្រឹម​ថ្ងៃទី​ ២២ ខែកញ្ញា ឆ្នាំ ២០២១ នេះ គ.ជ.ប បាន​ចុះចែក​លិខិតអញ្ជើញ​ជូន​ដល់​ប្រជាពលរដ្ឋ​បាន​ចំនួន ៥ ៣៥៥ ៩០២ សន្លឹក ស្មើនឹង ៦០,៦៥ ភាគរយ​នៃ​ចំនួន​លិខិតអញ្ជើញ​ដែល គ.ជ.ប បោះពុម្ព​។ នេះ​ជា​ទិន្នន័យបឋម ដែល គ.ជ.ប ទទួលបាន​ប៉ុណ្ណោះ ប៉ុន្តែ​ក៏​កំពុង​អនុវត្ត​ការងារ​នេះ​បន្តទៀត នៅតាម​ឃុំ-សង្កាត់ រហូតដល់​ថ្ងៃទី ១១ ខែតុលា ខាងមុខ​។

លោក​ថ្លែងថា​៖ «​ប្រជាពលរដ្ឋ​ដែល​មាន​ឈ្មោះ​ក្នុង​បញ្ជី​បោះឆ្នោត​ផ្លូវការ ឆ្នាំ​ ២០២០ ហើយ​ដែល​បាន​ប្រើប្រាស់​អត្តសញ្ញាណប័ណ្ណ សញ្ជាតិ​ខ្មែរ ដែលមាន​សុពលភាព​ក្នុង​ការចុះឈ្មោះ​បោះឆ្នោត​កន្លងមកនេះ សូម​អញ្ជើញ​ទៅពិនិត្យ​ផ្ទៀងផ្ទាត់ ឈ្មោះ និង​ទិន្នន័យ​របស់ខ្លួន​ក្នុង​បញ្ជី​បោះឆ្នោត ប្រសិនបើ​ពិនិត្យឃើញថា មាន​ការកត់ត្រា​មិនបាន​ត្រឹមត្រូវ តាម​អត្តសញ្ញាណប័ណ្ណ សញ្ជាតិ​ខ្មែរ ដែលមាន​សុពលភាព ត្រូវ​ស្នើសុំ​កែតម្រូវ​ក្នុង​អំឡុងពេល​ពិនិត្យ​បញ្ជី​ឈ្មោះ​បោះឆ្នោត ឆ្នាំ ២០២១ នេះ​»​។

បើតាម​លោក នុត សុខុម កាលពី​ឆ្នាំ​ ២០២០ លទ្ធផល​នៃ​ការចែក​លិខិត​អញ្ជើញ​ប្រជាពលរដ្ឋ​នៅ​ទូទាំងប្រទេស មាន​ចំនួន ៧ ៨៤៥ ៤០៣ សន្លឹក ស្មើនឹង ៩០,៩២ ភាគរយ នៃ​លិខិតអញ្ជើញ​សរុប​។ ចំពោះ​ប្រជាពលរដ្ឋ​ដែលមាន​សិទ្ធិ​បោះឆ្នោត ហើយ​មិនទាន់បាន​ចុះឈ្មោះ​បោះឆ្នោត​ពីមុនមក និង​ប្រជាពលរដ្ឋ​ខ្មែរ​ដែលមាន​អាយុ ១៨ ​ឆ្នាំ​ឡើង​ក៏​ត្រូវ​ទៅ​ចុះឈ្មោះ​បោះឆ្នោត​ចាប់ពី​ថ្ងៃទី ១២ ខែតុលា ដល់​ថ្ងៃទី​ ៣០ ខែ​វិច្ឆិកា នៅតាម​សាលាឃុំ-សង្កាត់ និង​ទីតាំង​មួយចំនួន​ដែល​ខ្លួន​កំពុង​រស់នៅ ដើម្បី​មានឈ្មោះ​នៅក្នុង​បញ្ជី​បោះឆ្នោត​ឆ្នាំ​ ២០២១ សម្រាប់​យកទៅ​ប្រើប្រាស់​ក្នុង​ការបោះឆ្នោត​ជ្រើសរើស​ក្រុមប្រឹក្សាឃុំ-សង្កាត់ ឆ្នាំ​ ២០២២​។

លោក ទេព នីថា អគ្គលេខាធិការ គ.ជ.ប ឱ្យដឹងថា ការពិនិត្យ​បញ្ជី ឈ្មោះ និង​ការចុះឈ្មោះ​បោះឆ្នោត ឆ្នាំ​ ២០២១ គឺ​ដើម្បី​កសាងបាន​នូវ​បញ្ជី​បោះឆ្នោត​ផ្លូវការ សម្រាប់​ការបោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់ អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃអាទិត្យ​​ទី​ ៥ ខែមិថុនា ឆ្នាំ​ ២០២២ ដែល​នេះ គ.ជ.ប ត្រូវ​ផ្តល់​សុពលភាព និង​ប្រកាស​ផ្សាយ​បញ្ជី​បោះឆ្នោត​ផ្លូវការ ៩០ ​ថ្ងៃ​យ៉ាងតិច មុន​ថ្ងៃ​បោះឆ្នោត នេះ​។ ស្ថិតិ​ប្រជាពលរដ្ឋ​ដែលមាន​សិទ្ធិ​បោះឆ្នោត​ក្នុង​ឃុំ-សង្កាត់ តាម​ការប៉ាន់ស្មាន​ថា ប្រជាពលរដ្ឋ​អាយុ ១៨ ​ឆ្នាំ​ឡើង​មាន​ចំនួន ១០ ៨៦៧ ៩៦១ ​នាក់​។ ប្រជាពលរដ្ឋ​ដែល​ត្រូវ​ចុះឈ្មោះ​ថ្មី​មាន​ចំនួន ១ ៦៣៥ ៩៩០ នាក់ និង​លុប​ចេញពី​បញ្ជី​បោះឆ្នោត​៨៣ ០៤៣ នាក់​៕

អត្ថបទគួរចាប់អារម្មណ៍